Tun hi library hlutna tharthawh leh hun a ni - Larsap

Mizoram Larsap, General (Dr) Vijay Kumar Singh chuan, “Tun hi Library hlutna tharthawh leh hun chu a ni,” a ti.

Niminpiah khan Delhi University-a Department of Library and Information Science chuan an kum 80 tlinna Delhi University Campus-a Convention Hall, Vice Regal Lodge-ah lawmin he hun hi Larsap General (Dr) Vijay Kumar Singh chuan kuallian niin a hmanpui a, Larsap chuan Public Library leh Lehkhabu te ngaihhlutawm leh tlo zia tarlangin, tunhma anga ngaihhlut an hlawh tawk ta lo chu veiawm a tih thu a sawi a. Europe ram te'n Public Library an dah pawimawh dante sawiin, entawntlak a tih thu a sawi a, he huna kalkhawmte chu tunhma anga library ngaihhlut nachang hre thar leh tura chahin, “Tun hi Library hlutna tharthawh leh hun chu a ni,” a ti bawk.

Delhi University Vice Chancellor Prof. Yogesh Singh-a kaihhruai he hunah hian Larsap chuan zirna In-a Library pawimawhna pawh a inher danglam ve zel thu sawiin, Library chu ram hmasawn nana inghahna pawimawh tak anih thu a sawi a. Zirna kawnga India sulhnu ropui tak takte chhuanawm a tih thu sawiin, Nalanda University chu zirna lama sulsutu pawimawh tak anih thu a tarlang bawk a. Department of Library and Information Science, Delhi University te'n kum 80-na hmel an hmu chu a lawmpui thu sawiin, an kalzelna turah duhsakna a hlan a ni.