Serchhip DCA ten Vawiin ah Final an khel dawn

Serchhip Sports Complex-a ‘5th Inter-District Cricket Tournament’ khelh mekah Serchhip DCA chuan Final lutin Vawiin hian Saitual DCA nen Final an khel ang.
Cricket Association of Mizoram (CAM) buatsaih Inter-District Cricket Tournament khelh mekah hian nimin khan Semi Final khelh niin inkhel hmasa zawkah Serchhip DCA chuan Saiha DCA chu run 53 in an hneh a, Toss-a chak Serchhip DCA in vuak hmasak thlangin Overs 20-ah run 129 siamin Wicket 9 an hloh a, hemi hnu hian Saitual DCA hian vaw ve leh thungin Overs 16.5 ah run 76 siamin Wicket an hloh vek a, Ser-chhip DCA hiaan run 53 in hnehna an chang a ni. He inkhel ah hian Serchhip DCA player Suraj Singh chu ‘Player of the Match’ atan thlan niin run 30 siamin Wicket 2 a la bawk a ni.

Nimin-a Semi Final inkhel hnuhnung zawk ah Saitual DCA chuan Champhai DCA chu run 134 in an hneh bawk a, he inkhel ah hian Toss-a chak Champhai DCA in vawm hmasak thlangin Saitual DCA hian Overs 20-ah run 257 siamin Wicket 4 an hloh a, Champhai DCA hian bat ve lehin Overs 16.2-ah run 123 siamin Wicket an hloh vek a, Saitual DCA hian run 134 in hnehna an chang ta a ni.

Heti hian Serchhip DCA leh Saitual DCA te hian Vawiin chawhma dar 10:30 hian Serchhip Sports Complex-ah Final an khel dawn a, heng District pahnih te hi Group Match-ah lo inhmachhawn tawhin Saitual DCA hian run 42 in hnehna an lo chang tawh a ni.