Serchhip-a Veng pathum ah ASF vanga Vawk thi tam

Zonuna Kawlni /

Kumin chhungin Serchhip-ah African Swine Fever (ASF) vangin Vawk 214 thi tawhin Vawk 109 suat a ni tawh bawk a, ASF hri hi hmun dang ah chuan a darh rih lo nia ngaih a ni.
 Serchhip-a AH&Vety Department hotute hnen atanga LENKAWL in thu a dawn danin Serchhip-ah hian Veng pathum-a ASF avanga Vawk thi leh suat hi an chhinchhiah a, nimin khan Vawk thi chhinchhiah thar 19 awmin heng te nen hian kumin chhungin Serchhip-ah ASF avanga Vawk thi hi 214 a awm tawh a, nimin vek khan Vawk 12 suat ni lehin kumin chhunga ASF hri darh zel tur venna atana vawk suat chu 109 tling tawh bawk a ni.

Serchhip-a Veng pathum zingah hian P&E Veng-ah Vawk thi chhinchhiah tam berin nimin thleng khan Vawk thi 95 chhinchhiah a nih tawh bakah Vawk 31 suat a ni tawh a, nimin khan Vawk thi 15 chhinchhiah belh a awm bawk. Ser-chhip Kawnpui North-ah nimin khan ASF vanga Vawk thi chhinchhiah thar pathum awmin Vawk 9 suat a ni leh bawk a, an huamchhung ah hian kumin hian ASF vanga Vawk thi 92 awm tawhin Vawk 40 suat a ni tawh bawk a ni. Serchhip Chanmari-ah pawh nimin khan Vawk thi pakhat chhinchhiah belh awmin Vawk 2 suat leh a ni a, Chamari Veng-ah hian kumin hian ASF vang hian Vawk thi 27 awm tawhin Vawk 38 suat a ni tawh bawk a ni.

Serchhip-a District AH&Vety Officer, Dr. H. Vanlalrawna chuan Serchhip-a ASF hri awm mek nia lang hi hmundang ah chuan a darh rih lo nia an hriat thu sawiin, chutihrual chuan he hri hi awlsam taka darh thei a nih avangin mipuite chu fimkhur turin a chah a. ASF hri laka kan Vawk vulh te a him theihna tura sawrkar in Dan leh thupek a siam te chu mipui ten tha takin zawm se an duh thu sawiin, Vawk vulhtu zingah ASF hri kai nia rinhlelh nei te chuan a rang lamin AH & Vety Department-a mithiam te hriattir vat thin se an duh thu a sawi bawk a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »

Serchhip-a Damdawi In helna kawng siam tum a ni

Zonuna Kawlni /
Image
District Hospital Serchhip paltlangtu Vantlang kawng chungchang chu nimin khan Serchhip DC Meeting Hall-ah Bawrhsap, Paul L. Khuma hovin sawiho a ni a. He thutkhawm ah hian PWD Ser-chhip Division-a Executive Engineer-in kawng siam dan tur ruahmanna (plan) leh a lem (map) te a tarlang a. Hemi hnu hian sawihona neiin District Hospital Serchhip paltlangtu kawngpui thlakna tur kawngpui siam tum tawh chu Hospital tana harsatna siam lo leh ram la hek lutuk lo zawnga siam chu thil tul leh tha nia pawmtlan a ni a. He thutkhawm neih zawh hnu hian kawng siamna tur hmun hi tlawhin kawng lak tur chinte enfiah nghal a ni bawk.
Kimchang zawkin »