MIFCO Documentary Film tlangzarh a ni

Mizoram Food & Allied Industries Corporation (MIFCO) in kum hnih kalta chhunga hma a lakna hrang hrang tarlanna, MIFCO Documentary Film chu nimin khan Commerce & Industry Department changtu Secretary Dr. H. Lianzela chuan a tlangzarh.

Commerce & Industries Department Secretary Office-a he Documentary Film tlangzarhna hunah hian Dr. H. Lianzela chuan Mizoram sawrkar in Agriculture Sector lam a dah pawimawhin hma pawh a la nasa hle tih sawiin, A bikin Lakhuihthei leh Sapthei chingtu beidawng tawhten beiseina thar an nei hi ka lawm takzet a ni,” a ti a. “Mizoram sawrkar hnuaia PSU Board hrang hrangte pawh tihlen a, thuneihna sang zawk pe-a tihchak an pawimawh hle nia a hriat thu sawiin, “Sawhthing leh kan thlai hrang hrangte pawh tha zawk leh tui zawka sawngbawl theih ni se a duhawm hle a ni,” a ti a. “Mizoram-ah khualzin (Tourist) an rawn pung zel dawn a, Mizoram ti Mizoram theitu tur, kan economy thlenga tisang thei tur kan ngaihtuah a ngai. Hetiang kawnga bul tan thartu MIFCO hmalakna leh hmachhawpte a ropui ka ti takzet a, an kal zelna tura duhsakna ka hlan a ni,” tiin MIFCO Documentary Film chu Mizo mipuite leh ram pawn thlenga an lo en theih turin a tlangzarh a ni.

He hunah hian Mizoram Food & Allied Industry Corporation (MIFCO) Chairman Lalthazuala Rawite pawhin Mizoram sawrkarin PSU-te aenkawl chhoh dan chu lawmawm a tih thu sawiin, a bikin Chief Minister Lalduhoma'n a tuipui em em thu a sawi a, “Kuthnathawktuten an thawhrah senga hlawkna an tel lai hi hmuh nuam a ti thin. Kum hnih chhung chauha hmalakna a la nih avangin hlawhtlinna lian leh ropui tak la awm lo mah se kan tih chin leh hmachhawpte ngaihtuahin thawktute kan phur a, MIFCO hmang hian nasa taka ram siam danglam kan tum a ni,” a ti a. “Mizo kuthnathawktute hi kaihhruai thiam a, an thawh hlawh tha taka an hmu thei dawn a nih chuan an taima em em a. Tunah hian hmachhawp kan nei mek a, Rawtuai leh Baibing Tin siam kan tum a, hmalakna hmasa atan Lakhuihthei leh Sapthei tui, Plastic Bottle te-ah in mai theih (ready to serve) dawr hrang hranga zawrh turin kan siam dawn a ni,” a ti bawk.

Minute 20 awh MIFCO Documentary Film tlangzarhna hun hi MIFCO General Manager H. Lalrochama chuan a kaihruai a, he documentary film-ah hian Mizoram-a Lakhuihthei leh Sapthei chinna khaw hrang hrang - Chawngtlai, Khawihai, Sialhawk New Chalrang leh Chalrang a kuthnathawktuten hma an lak dan leh MIFCO-in a buaipui chhoh dan te, Chhingchhip khuaa MIFCO-in thei leh thlai chi hrang hrang an buaipui dan te, Zemabawk huamchhung Bung Bangla-a mipuite ei tur sa thianghlim an sawngbawl dante tarlan a ni.