Lenkawl

Serchhip SP Gavit Gogna chuan Vawiin December 22, 2025 khan Serchhip Bazar-ah Police Beat Post thar a hawng.

India rama Sawrkar damdawi In tha tehnaah Serchhip District Hospital chu tlingin a rual hian HWC- Primary Health Centre pahnih,  Zawlnuam PHC leh Thingsai PHC te an tling thar bawk. India rama Damdawi In tha tehna atan hian District Hospital, Serchhip hi kumin Oct. 17 leh 18 khan rawn enfiah leh niin tehna hrang hranga teh a nih hnuah Serchhip District Hospital hian 93.73% hmuin NQAS National-Level Certificate a hmu a, NQAS bakah hian India ram pum huapa nau neihna hmun tha bik tehna, LaQshya-ah Serchhip DH chhunga Department pahnih Maternity OT leh Labour Room chuan Certificate nei tharin, a tehnaah 94.95% leh 94.12% te hmuin Platinum Badge an dawng a. Heng bakah hian Blood Bank-ah 96.5%, Paed Ward-ah 90.59%, General Admin-ah 92.81% leh Laboratory-ah 95.18% a hmu phak bawk a ni. Heti hian damdawi In tha tehna National Quality Assurance Standards (NQAS)-ah Mizoram chhunga District Hospital 9 leh HWC-PHC 57 target awm zinga 45-in National-Level NQAS certificate an nei tawh a, sawrka...

Khawlailung khuaa F. Lalrinthanga hnenah nimin (Dec. 19, 2025) Solar Drier hlan a ni.

Serchhip District Truck Owner's Association chuan Vawiin khan General Assembly vawi 18-na neiin heng mite hi kum 2026 chhunga an pawl hruaitu atan an thlang :

Lunglei-a Mizoram State University awm tura tih anih angin Dan thenkhat siamrem ngai chu Assembly Session lo awm leh hmasa bera pharh tura hmalak a ni.

National Institute of Technology (NIT) Mizoram leh Indian Institute of Technology (IIT) Madras a thawk Zirtirtu leh Zirlaite chuan nimin khan RD&A Minister Prof. Lalnilawma chu a Pisa-ah an kawm.

Adviser to Chief Minister TBC. Lalvenchhunga kaihhruai ‘Study Team of DRP, GST Collection, Contractor Profit Deduction & Committed Liability’ te chuan nimin khan Chief Minister Lalduhoma hnenah an rawtna te an sawifiah.

Agriculture and Farmers Welfare Minister PC. Vanlalruata’n a Department chan Agriculture and Farmers Welfare department-in sawrkar laipui atangin Digital Crop Survey kalpui tha lawmman pakhatna a dawn thu sawiin, thawktute inpekna rahchhuah a nih thu a sawi bawk.

National Highways & Infrastructure Development Corporation Limited (NHIDCL) chuan Corporate Social Responsibility (CSR) kaltlangin Sub-Hqrs. YMA Lunglei hnenah ram leh mipui rawngbawlnaa an hman turin Ambulance an hlan a, he Motor (Force Trax Van) hi nimin khan Lunglei Bawrhsap Navneet Mann-i chuan Lunglei Sub-Hqrs. YMA hruaitute kutah a hlan a ni. Lunglei District chhunga National Highway kawngpui zauh leh siam that mek enkawltu NHIDCL-in CSR atanga Lunglei Sub-Hqrs. YMA hnena Ambulance an pek hi a cheibawlna zawng zawng nen cheng nuai 16 man a ni a, he hunah hian YMA hruaitute leh sawrkar hotute bakah NHIDCL aiawh mi engemaw zat an tel a ni.

Mizoram sawrkar chhinchhiah danin Mizoram chhungah School 4316 a awm mek.

Mizoram People Forum (MPF) Annual General Meeting vawi 18-na chu nimin khan Aizawl Vanapa Hall-ah neih niin President mawhphurhna inhlanna neih a ni.

PHE leh Rural Development Department changtu Minister Prof. Lalnilawma chuan niminpiah khan Saitual-ah PHE WATSAN Division, District Panchayat Resource Centre leh Saitual Bawrhsap Multipurpose Centre te a hawng a, PHE Saitual WATSAN Division-ah hian Sr. EE, UDC, LDC leh IV Grade te dah a ni anga, Sub-Division pahnih- Ngopa Sub-Division leh Saitual Sub-Division a awm dawn a ni. Saitual DPRC Office building hi DC Complex-ah awmin Conference Room 1, Office Room 3 leh Toilet 6 te a awm a, Hostel building-ah Room 6, Dormitory leh Choka pakhat awmin, Room tinah Toilet dah vek a ni bawk. Saitual Bawrhsap Multipurpose Centre hi DC Complex-ah a awm a, mipa leh hmeichhia inthiarna tur awmin, Stage zau tha tak a awm bawk a ni.

Nimin khan Siaha Govt. College Seminar Hall-ah Kaladan Multi-Modal Transit Transport Project (KMMTTP) Road leh Bairabi- Sairang Railway Line-in Socio, Cultural leh Economy lama nghawng a neih theih dan zirhona neih a ni a, he hun hi MADC-a Deputy CEM S. Lalremthanga chuan hmanpuiin KMMTTP kawngpui leh Bairabi- Sairang Railway Line te chu a tangkai zawnga hman a nih loh chuan chhungkaw tam tak tan harsatna leh buaina a thlen thei dawn tih sawiin, chutiang dinhmuna ding lo turin Sawrkar, Kohhran, NGO leh Mipuite thawhho leh tanho thiam a tul thu a sawi. He hunah hian Addl. DC Abraham Beirazi Khithie leh Study Committee Member Zomuana ten thu sawiin, sawihona hun hman a ni bawk.

Rajya Sabha MP K. Vanlalvena’n ngenna a siam angin Dec. ni 22 leh December ni 24-ah Guwahati atangin Aizawl pan Rel tlan belh tir a ni dawn a, Guwahati to Aizawl Special Train for Christmas pahnih Guwahati atanga Aizawl panin December ni 22 leh 24-ah tlanin December ni 23 leh 25-ah te Aizawl atangin Guwahati panin an let leh dawn a, Coach 14 ve ve a awm ang.

Aizawl Smart City Limited (ASCL) Project pakhat-Soil Dumping Ground (Leivung paihna tur hmun) chu nimin zing khan UD&PA Secretary Lalmalsawma Pachuau chuan Khatla High School Veng-ah a hawng a, he hmun hi Insak leh lei laih atanga leivung paihna tur bika duan a ni. He Project hi M/s LHM Infra, Lawipu ten thawkin Project Cost hi cheng nuai 103.16 a ni a. Soil Dumping Ground-ah hian lirthei leivung paih tawlh thla palh tur ven nan Gabion Retaining Wall chu meter 3-a sang leh meter 7-a hlaiin siam a ni. He leivung paihna hmun hian pickup lirthei trip 12,000 a dawl thei anga, chu chu cubic meter 18,000 vel bawr a ni.

Reserve Bank of India (RBI) chuan tun thla ni 15 - 17 chhung khan Mizoram sawrkar hnuaia Finance Officer-te tan Government Banking leh Accounting chungchang zirna tur Workshop a buatsaih a, RBI hmalakna lian tak ‘E-Kuber’ khawl hmanga ‘E-Payments’ leh ‘E-Receipts’ kalpui dante, sawrkar laipuiin CSS sum pek-chhuahna atana kalphung thar a duan, ‘SNA SPARSH’ chungchang te leh Open Market Borrowings (OMB) an kalpui dante bakah RBI-in India rampuma ‘Inter-governmental transactions’ an kalpui dan te, central sawrkar leh state sawrkar hrang hrang accounts an vawn dan te, RBI in Bond Market a State-te tan investment a kalpui dan te leh Consolidated Sinking Fund leh Guarantee Redemption Fund hmanga sum enkawl a nih dan te zirho a ni.

Mizoram Public Service Commission (MPSC) chuan sawrkar kum liamta kum April 1, 2024 atanga March 31, 2025 chhung khan sawrkar hna 349 atan hna lakna Advertisement 55 a tichhuak a, hemi chhung vek hian RTI hmanga zawhna 1056 an dawng bawk.

Serchhip chhimlam kawtchhuah, Sailiamkawn-a ‘Kawlni Filling Station’ chu nimin khan Mizoram Legislative Assembly Speaker Lalbiakzama chuan a mamawhtu apiangte tana hman theih turin a hawng.

Chief Minister Lalduhoma chuan sawrkarin mi taima leh thawkrimte tana hmasawn theihna kawng zau taka kan sial laiin, thalaite zawk an lo inbuatsaih lo vang tih an hlau tih sawiin, inelna hrang hranga hnamdangte kan tluk loh thin chhan chu kan taihmakna leh tumruhna in min hruai thlen phak loh vang niin a sawi bawk.

Sub-Hqrs. YMA Serchhip chuan sawrkar in Halpuah leh halmawi khapna thupek a chhuah te zawm theuh turin YMA Member te an ngen.

Nikum April thla atanga kumin October chhungin Mizoram-ah HIV hrik kai mi 3,117 hmuhchhuah a ni a, HIV hrik kai hmuhchhuah zingah kumtin mipa, mahni anpui kawp atanga kai an pung chho zel niin a lang.

Excise & Narcotics Department changtu Minister Lalnghinglova Hmar chuan nimin khan a Pisa-ah thuthar thehdarhtute kawmin Bairabi leh Sairang-ah Station thar hawn phalna an hmuh tawh thu a sawi.

Fisheries Department leh Tuipui South khawtlang tangkawpin an buatsaih, ‘Tuipui South Fish Festival, 2025’ chu nimin khan Tuipui South-ah Fisheries Minister Lalthansanga chuan a hawng.

Mizoram State Library-ah member 9970 an awm mek a, kum hmasa lam aiin State Library tlawhtu an pung nia tarlan a ni bawk.

Mizoram Flagship Programme ‘Bana Kaih Scheme’ tihchangtlunna kawngah Mizoram State Policy Coordination Committee (MSPCC) chuan Doordarshan Kendra (DDK) Aizawl leh Industrial Development Bank of India (IDBI) te chu thawhhona thuthlung, Memorandum of Agreement (MoA) a ziahpui.

Integrated Ayush Hospital, Thenzawl-a thawktuten khaw panga(5) - Leite, Rotlang East, Dawn, Ralvawng leh Hlumte-a ‘AYUSH Health Camp 2025’ an buatsaih chu nimin khan Bialtu MLA leh Health Minister Lalrinpuii chuan Leite-a YMA Run-ah a hawng a, AYUSH chu India rama natna enkawl dan hrang hrang (System of Medicine) khaikhawmna a nih thu leh hengte hi India ram chhulchhuak leh Germany chhuak (Homeopathy), India in a lo sengluh te an nih thu a sawi bawk. Health Minister chuan a Bial chhung a Rotlang East, Ralvawng leh Dawn khua tlawhin khawtlang in an thlanchhuah chhungkaw 50 te hnenah Krismas thilpek a hlan nghal bawk a ni.

Mizoram Chief Secretary Khilli Ram Meena IAS chuan nimin khan Lunglei District tlawhin DC Conference Hall-ah sawrkar Department hrang hrang hotute a kawm a. He inkawmna ah hian Chief Secretary chuan sawrkar laipui duh dan anga ram mipuite mamawh ngaihtuahna leh hmasawnna hna thawh hrang hrangah tih tur hlen-chhuah (saturate) a nih theih nan ruahmanna kimchang leh felfai tak a awm a tul thu sawiin, department hrang hrangte chu an hna thawhna turah leh mipui rawng an bawlna kawngah ruahmanna fel tak siam turin a chah a. Khaw tin leh mi tin thleng phak ruahmanna leh hmasawnna a awm a pawimawh thu pawh a sawi bawk a ni.

Health Minister Lalrinpuii chuan Mizoram Universal Health Care Scheme tihchangtlunna atan Asian Developoment Bank kaltlangin loan US Dollar vbc. 108 lak a nih tur thu a sawi. Niminpiah-a chanchinbu mite a kawmna ah Health Minister chuan MUHCS tihchangtlunna atana Mizoram sawrkar rawtna chu sawrkar laipuiin a pawmsak bakah, Asian Development Bank hnenah sawrkar laipui hian a  thehluh sak thu leh ABD Board chuan tun thla December ni 5-a a pawm thu a sawi a. Hemi atan hian Health Minister chuan hmalakna tur tam tak awm thu leh theihtawp chhuah a nih thu sawiin, Sawrkar laipui leh Asian Development duh danin a project hming pawh ‘Supporting Public Healthcare System Strengthening to Achieve Universal Health care for Mizoram’ tih vuah a nih thu a sawi a, Mizoram sawrkarin a pawisa a puk tur chu zaa 90% sawrkar laipuiin a tum dawn bakah 10% chu kum 15 chhung Mizoram sawrkar rulh tura tih a nih thu a sawi bawk.

MHIP General Hqrs. hruaitute chuan nimin khan Aizawl SP, Zosangliana IPS chu a Pisa-ah kawmin Hmeichhiate venhimna kawngah te, tawhsual tawk tanpuina ah te, tualthihna a awm a hnuchhhuina kawngah te chak tak leh tha taka hma an lak thin avangin Mizoram Police te chungah an lawm hle tih an hrilh.

Lai Autonomous District Council (LADC) Inthlanpui vawi 12-na neih a nih hnuah sawrkar thar din tum awm mah se thutawp siamtu tur Mizo-ram Governor chu tul pawimawhah a zinchhuah lai a nih vangin LADC-a Sawrkar thar pian hun tur ala hriat theih loh a, karleh tir lamah chuan sawrkar thar hi lakluh hman a nih beisei a ni.

Sub-Hqrs. YMA Serchhip chuan nimin khan kumin atana an Office kharna hun hmangin Serchhip District chhunga damdawi In leh Home hrang hrang 17-ah Krismas thilpek an sem bawk.

MNF Party chuan nimin khan ‘Exodus Day’ vawi 54-na hmangin he ni hi hmun hrang hrangah urhsun taka hman a ni.

Serchhip-a Excise & Narcotics Department te chuan nizan hmasa khan Serchhip Chanmari Veng-ah Ganja ni ngeia hriat gram 133.85 a rit an man a, a neitu nia hriat Lallawmzuali, Lower Chanmari nia insawi pawh man nghal a ni bawk. Thudawn danin heng Ganja te hi Plastic thutthleng hniam ke chhungah thuhruk a ni.

MNF Vice President leh Leader of Opposition Lalchhandama Ralte chuan nimin khan Aizawl-a Mizo Hnam Run-ah Lai District Council inthlanah an duh ber danin thil a thleng lo tih sawiin, “Lai ram mipuiin sawrkar a din ngei an mamawh si a, ZPM nen kan thawkho dawn ta a ni,” a ti a. “Hei hian State-ah ZPM nen kan thawkho tih a kawk lo a, an thiltih dik loh hrang hrangte kan la puang chhuak zel dawn a, kan la bei dawn chauh a ni,” a ti a. “MNF mi leh sa zawng zawngte thil tha a thlen theihna tur leh thil tha lo dona tur chuan timna nei lo turin ka chah a ni,” a ti bawk.

Mizoram-a Solar Market Shed hmasa ber tur chu nimin khan Rural Development & Administration Department Minister Prof. Lalnilawma chuan a Bial chhunga Seling leh Keifang-ah a hawng a, a hmangtu tur ten an tangkaipui ngei a beisei thu a sawi bawk. Market Solar Lighting leh Rubber Farmer te Solar Lighting sem hi SELCO Foundation leh MLA Fund hmanga hmalakna a ni a, Ni zung hmanga kawlphetha pek tur Seling leh Keifang-a Market Shed hian Bazara chawhmeh zuarte chu khawlum-ah lum lutuk lova fan hmang thei leh zan lam pawh rei zawk dawr nghak theia sum tam zawk an lakluh phah theih beisei a ni.

Social Welfare, Women & Child Development Department Minister Lalrinpuii chuan Krismas hmain Tar Pension-ah State Contribution bik chu sem fel tura hma an lak thu a sawi.

Kumin April ni 1 atanga nimin, December 16, 2025 thleng khan Mizoram Universal Health Care Scheme (MUHCS) hnuaiah mi 59,602 enkawl an ni tawh a, hemi atan hian Sawrkar chuan cheng vbc. 100 vel a seng tawh a, Health Minister Lalrinpuii chuan MUHCS chu a hlawhtling chho viau tawh nia an hriat thu a sawi.

India leh Pakistan indonaa India sipai boral te hriatrengna ni, ‘Vijay Diwas’ chu nimin khan hmun hrang hrangah hman a ni.

Chief Minister Lalduhoma chuan nimin khan Aizawl Zotlang-a Mara Boys Hostel-ah Mara Girls Hostel sakna tur te, MADC Area-a School thar pariat (8) sakna leh School awmsa paruk (6) chei tharna tur lungphum a phum a, heng zirna In te hi PMJVK atanga sak tur an ni.

Ministry of Home Affairs duhdan anga India rama Dan thar chi thum - BNSS, BNS leh BSA chungchanga mipuite hriattur pawimawh tarchhuahna ‘Exhibition on New Criminal Laws’ chu Aizawl Lammual-a Winter Festival neih mek ah buatsaih a ni a, he Exhibition hi nimin khan Home Minister K. Sapdanga chuan a tlawh a, Home Minister chuan dan thar chungchang hriattur pawimawh te a tam thei ang ber mipuite hriattir tura hma la zel tura chahin, Dan chungchang hriat duh neite tan Free Legal Aid Clinic buatsaih a ni bawk.

Social Welfare Minister Lalrinpuii chuan nimin khan Phunchawng a Operation Kingdom Ministry Home-ah ‘Pangthianga Building’ a hawng.

India Hmarchhak Bial chhunga Chess intihsiakna lian ber, 23rd NE States Chess Championship chu nimin khan Aizawl Mualpuia-a R. Dengthuama Indoor Stadium-ah khelh tan a ni a, Sports & Youth Services Minister Lalnghinglova Hmar chuan a hawng a ni. 23rd NE State Chess Championship-ah hian India Hmarchhak State hrang hrang atangin infiammi 280 an tel thei dawn a, Arunachal Pradesh atangin mi 14, Assam atangin mi 52, Manipur atangin mi 7, Nagaland atangin mi 16, Sikkim atangin mi 49 leh Tripura atangin mi 9 an tel bakah Mizoram chuan thawh-hlawk berin player 103 an tel a. Kum bithliah hrang hrang pasarihah inelna a awm dawn a, Hmeichhia lam infiammi 24 an tel bawk a ni. He Championship hi Mizoram in a thlen vawi hnihna a ni a, tun tumah hian ni li (4) chhung khelin tun thla ni 20-ah zawhfel tur a ni ang.

Ni 7 chhung awh tura ruahman ‘Winter Festival’ chu nizan hmasa khan Tourism Minister Lalnghinglova Hmar chuan Aizawl Lammual-ah a hawng.

Mizoram sawrkar chuan kumthar February thla atangin Hmunphiah a lei tan dawn a, a ro tha chauh a lei dawn nia tarlan a ni.

International Year of Cooperation 2025 kharna puala Cooperation Department leh a kaih-hnawih State-Level Federation hrang hrangte hmalakna thlirhona hun chu nimin khan Aijal Club ah neih niin Horticulture Minister C. Lalsawivunga chuan khuallian niin a hmanpui a ni.

Mizoram Consumers’ Union (MCU) Hqrs. chuan nimin khan Aizawl Venghlui-a Central Hall-ah Annual General Meeting vawi 28-na leh Consumer Awareness Campaign neiin FCS&CA Minister B. Lalchhanzova chuan khuallian niin a hmanpui a, Consumers’ Union hmalakna chu phung-thlu taka hlenchhuah chi a ni lo tih sawiin, hawihhawm tak chunga thil ti diklo te hremna pek ngam a tul thu a sawi a, “Kan hnathawh hlutna hi mual eng kil phalo, sawisaktu nei ve lo ten a parzu an chhim pha tur a ni,” tiin “Kan hnathawh kan hlenchhuah hian Pathian rawng kan bawl a ni tih i hre theuh ang u,” a ti bawk. He hunah hian ‘Consumer Awareness on Telecommunication’ tih leh ‘Awareness on Consumer Protection Act and Liquefied Petroleum Gas (LPG)’ tih te chu zirho a ni bawk.

Mizoram Information Service (MIS) Officer 2025 Batch te chuan Information & Public Relations (I&PR) Department hnuaia District-a hnathawh dan leh kalhmang zir turin niminpiah khan Champhai an tlawh a, DC Office, SP Office leh DIPRO Office te an tlawh a ni. MIS Officer 2025 Batch te hi mi 3 - Teresa Vanmalsawmi, R. Vanneihtluanga leh Lalchungnungi Lakher te niin I&PR Directorate-ah IPRO in an awm mek a, DIPRO Office-ah hian DIPRO Lalzara chuan District-a I&PR hnathawh dan hrang hrang - Press Release buaipui dan te, Office dang nena thawhho dan te, inthlan laia DIPRO mawhphurhna te, Media Relations leh Publicity tha neih dan te leh Office-a file hrang hrang kal dan te hrilhin an inkawm a ni.

Serchhip-a Excise & Narcotics Department te chuan nizan dar 6:00 vel khan Keitum leh Tuichang lui inkarah Heroin No. 4 nia hriat Hawng 17 an man a, a neitu nia hriat Joseph Lalrindika (48), Tlangsam Dinthar Veng, Champhai nia insawi pawh man a ni. Heng damdawi te hi Sahbawn bawm 17-a dah niin gram 200.16 a rit a ni.

Serchhip District Amateur Taekwondo Association (SDATA) buatsaihin nimin khan New Serchhip YMA Hall-ah 'Colour Belt Awarding Ceremony' neih a ni a, he hun hi 14th Assam Rifles Commandant Col. Archit Goswamu chuan khuallian nia hmanpuiin, Martial Arts chuan taksa chakna mai ni lovin rilru taksa peng hrang hrangte inbuktawk takin min siam thei a, naupang rual ten hetiang infiamna an tuipui chu lawmawm a tih thu a sawi a ni. Mizoram pumah 3rd Session Color Belt exam-ah hian mi sang chuang telin Serchhip atangin naupang 42 an Exam a, Blue Belt 2, Green Belt 2 leh Yellow Belt 38 ten tha takin Exam an paltlang a ni.

Serchhip District-a Ruihhlo ngai te puala Gospel Camping neih tura ruahman chu nakum Feb. 9 atanga neih tura ruahman a ni.

Jal Jeevan Mission (JJM) hnuaia Tlungvel Multi Village (Tlungvel & Darlawng) WSS, Tuirini Grid pumping thawh zawh tak chu nimin khan PHE Minister Prof. Lalnilawma chuan a hawng.

Lai Autonomous District Council (LADC) Inthlanpui neih zawh takah Party mal-a sawrkar siam thei an awm loh hnuah ZPM leh MNF Party te chuan sawrkar an siam theih thu nimin khan Larsap hnenah thlen an tum.

Mizoram Rajya Sabha MP K. Vanlalvena chuan Union Railway Minister Ashwini Vaishnaw hmuin IndiGo flight cancel a tam avangin Delhi leh India ram khawpui danga Mizo zirlaite leh hna-thawka awm ten Mizoram-a Krismas hmang tura hawna kawngah harsatna an tawh thu thlenin, Rel ngaihtuah belh sak turin a ngen bawk.

Mizoram Fire and Emergency Services chhinchhiah danin kumin chhungin Mizoram-ah In kang 27 a awm. Fire and Emergency Services hotute sawi danin, kumin chhunga In kang 27-a kangmeiin bungrua a tihchhiat zat hlutna chu, Rs. 459,98,530/- ang a chhut a ni a, kumin chhunga ramkang F&ES hnena report zat chu 162 a tling bawk. Mizoram Fire and Emergency Services chuan kumin chhungin chhanchhuah hna tum 39 an thawk bawk a, hei bakah hian kumin chhunga kangmei avanga nunna chan mi pakhat a awm thu an sawi bawk a. Mitin te kangmei laka fimkhur tur leh Electric Connection bakah Gas Connection putru a awm leh awm loh chhung tinte enchiang thin tura an duh thu an sawi a, kangmei chhuak pumpelh tura tan la tura an duh thu an sawi bawk.

Farkawn Chhim Veng-a cheng C. Lalramenga thihna kaihhnawih ah Farkawn VDP Member mi 6 te chu nimin khan Champhai District Jail-ah dahluh an ni. Kum 49-a upa Farkawn Chhim Veng (Theirekawn)-a cheng C. Lalramenga hi Inrinni (Dec. 13, 2025) khan Myanmar-ah a kal a, hei hi Farkawn VDP ten ringhlelin a lo haw lam chu an lo chang a, zan rei tawhah Zu fun engemaw zat a kut atangin an man a, Village Defence Party (VDP) ten thu an zawhfiah hnuah an chenna In ah motor-in an dah leh a, Pathianni zing dar 5:00 vel khan a boral zui ta nia sawi a ni a. Hetianga a thih hnu hian a taksa ah hian kutthlakna hnuhma tam tak a awm avangin a nupui, Lalremruati chuan a pasal thih danah hian thilfel tawk lo a awm nia hriaiin Dungtlang Police Station-ah FIR a thehlut a. Dungtlang Police-te chuan he thihna thleng chungchangah hian Farkawn VDP member mi 10-te chuan thu zawhfiah turin an la nghal a. Thu an zawhfiah hnuah an zinga mi 6-te chu nimin khan Champhai District Court-ah khung an ni.

Directorate of Women & Child Development chuan nimin khan Aizawl-ah ‘A day with our Minister’ tih hun hmangin an Department hmalakna thlirletna leh infuihtharna an nei a, he hunah hian Minister Lalrinpuii chuan Saksham Anganwadi and Poshan 2.0-te, Mission Shakti leh Mission Vatsalya-te kaltlanga Women&Child Development hmalaknate chu ropui a tih thu a sawi a. FRS drive kaltlanga Department hmalaknate phei chu chhuanawm a tih thu sawiin, India rampum huap pawha titha zinga lang tura thawktute inpekna chu fakawm a tih thu a sawi a. APAAR kalpui danah pawh thawktu ten theihtawp an chhuah dante chu lawmawm a tih thu tarlangin, ram leh hnam kut leh ke, hmeichhia leh naupangte enkawltu an nih anga an dinhmun pawimawh tak chu hrereng chunga an hnathawhah chuan theihtawp chhuah zel turin a fuih nghal bawk a ni.

Chief Minister Lalduhoma chuan, “Kan ram mipui zaa sawmriat deuhthaw te hi Lonei a eizawng an la nih avangin heng mite chawikan hi kan ram chawikanna a ni,” tiin NABARD sum hmanga din Megawatt 10 pechhuak thei Thenzawl Solar Power Plant chu an hawng dawn hnai niin a sawi bawk.

UD&PA Minister K. Sapdanga chuan nimin zing khan Civil Hospital Aizawl-a hman tur cheng nuai 35.70 man Anesthesia Workstation leh cheng nuai 22 man Upper Gastrointestinal Video Endoscope Unit te a hlan.

Mizoram Sports hmelhmang thlak danglam tura hmalakna kal mekah Mizoram-a Sports Coach-te intuaitharna tur, 'Transforming Sport for the Next Generation: Developing Decision Makers' tih chu nimin khan Aizawl Republic Veng-a Hawla Indoor Stadium-ah Sports Minister Lalnghinglova Hmar chuan a hawng a. Mizoram State Sports Council, Nippon Sports Science University leh JICA tangkawpin an buatsaih Coach-te inzirnaah hian Zirtirtu turin Prof. Masamitsu Ito chu Nippon Sports Science University, Tokyo atangin a lo kal a, mi pawimawh hrang hrang ten rawn tawiawmin Dec. 18 thleng kalpui a ni ang.

Economics & Statistic Department buatsaih ‘Mizoram Statistical Handbook 2024’ chu tlangzarh a ni leh ta a, Vawiin atang hian Economics & Statistic Directorate, GE Branch-ah Rs. 100 in a lei theih ang.

Mizoram State Library-ah member 9970 an awm mek a, kum hmasa lam aiin State Library tlawhtu an pung nia tarlan a ni bawk.

Tun thla ni 13 zan-a ruang chhar, Marina Lalchhanchhuahi thih dan chu ngawrh taka chhui zel mek niin MHIP General Hqrs. chuan a chunga kutthlaktu chu a phu tawk hremna pek ngei an phut thu an sawi.

Tripura atanga Mizoram-a Gas Pipeline phum hna thawk mektu, Indradhanush Gas Grid Limited (IGGL) Chief Executive Officer Subrata Das leh a thawhpuite chu nimin khan Chief Minister Lalduhoma chuan a Pisa-ah kawmin an hnathawh chinte a sawipui bakah an harsatna tawh mekte a ngaihthlaksak a. IGGL-a thawktute chuan he Pipeline hi Tripura State Panisagar Receiving Terminal atanga rawn kal tanin Kanhmun-ah, Zawlnuam-ah, Kawrthah-ah, Tuidam leh Darlak paltlangin Mamit bulah a chhuak dawn tih an sawi a. Chuta tangin Lengte-ah kal zelin Sihhmui-ah Receiving Terminal dah tur a nih thu an sawi a. Sihhmui Receiving Terminal atanga Aizawl khawpui chhung Household Connection hi Tripura Natural Gas Corporation Limited ten an thawk thung dawn tih an sawi a ni.

BJP Parliamentary Board chuan an Party President atan Nitin Nabin chu an ruat a, Nitin Pabin hi kum 45-a upa niin BJP President ni tawh zinga a naupang ber leh Bihar atanga BJP Prsident ni thei hmasa ber a ni a, Bihar MLA atan tum nga thlantlin ni tawhin tunah hian Minister hna a chelh mek a ni.

Indiatourism, North East Regional Office, Guwahati leh Mizoram sawrkar-a Tourism Department tangkawp chuan a vawikhatna atan Mizoram-ah ‘Familiarization Tour’ an huaihawt a, Assam atangin Tour Operator 29 te chuan niminpiah khan Aizawl an rawn thleng a, hemi rual hian Assam Regional News leh Kolkata Film Tourism mithiam te pawh an tel a ni. Heng mite hian tun thla ni 18 khian Mizoram an chhuahsan leh dawn a, Mizoram-a an cham chhung hian hmun hrang hrang tlawhin Thenzawl khua an tlawh dawn bawk a, Mizoram-a Tourism hmunhma kan neih that te zirchiangin, an let hunah Mizoram-a Tourism Service Providers te nen tangkawpin mikhual an rawn tir lut dawn a ni.

Food Corporation of India (FCI) chuan Mizoram chhunga an Kudam hrang hrangah Buhfai hralhchhuah tur Metric Tonn 21,269 an kawl mek thu an sawi. Mizoram-a FCI hotuten Akashvani News Aizawl an hrilh danin, Mizoram chhung hmun hrang hranga an Kudam-ah buhfai chhekkhawl dinhmun a tha a, Aizawl Kudam-ah buhfai Metric Ton 3125. Kolasib Kudam-ah Metric Ton 3933, Bualpui Kudam-ah Metric Ton 3213, Lunglei Kudam-ah Metric Ton 2444, Bairabi Kudam-ah Metric Ton 4769 bakah Lawngtlai Kudam-ah Metric Tonn 2725 a awm mek thu an sawi a. Food Corporation of India Mizoram Divisional Manager, Bankim Phonglo chuan kumin sawrkar kum chhunga nimin, December ni 15 thlenga FCI in Mizoram a buhfai a lakuh zat chu Metric Ton 77034.43 a tlin tawh thu leh hemi phurhluhna atan hian Rel bungraw phurhna Rake 39 lai hman a nih thu a sawi bawk.

Serchhip District Cricket Association (SEDCA) chuan Zirtawpni zan khan Serchhip Press Club-ah kum 2025-2028 chhunga an hruaitu tur thlanna an nei a, President-ah R. Lalrinawma (Chanmari Veng); Vice President-ah Andrew Lalrinmawia (Thenzawl); Secretary-ah Malsawmkima (Tuikhuah Veng); Asst. Secretary-ah Saingurpuia Sailo (Chhim Veng) leh Treasurer-ah V. Lallawmzuali (Hmar Veng) te thlan an ni.

Inrinni khan Serchhip-ah Lok Adalat thut-khawm neih leh niin thubuai chhawpchhuah 33 zinga 13 te chu chinfel a ni. District Legal Services Authority (DLSA) ruahman anga Lok Adalat thutkhawm hi Serchhip District Court-a hmun hnih ah neih niin tun tumah hian Bank Loan ba kaihhnawih ah thubuai pakhat chawpchhuah awmin chinfel a ni a, Settlement Amout Rs. 5,85,018/- a ni a. Civil Case dang chhawpchhuah 32 awmin 12 chinfel a ni bawk a, Settlement amount chu Rs. 16,09,981/- niin heti hian tun tum thutkhawm ah hian thubuai chhawpchhuah 33 awmin heng zinga 13 te chu chinfel a ni a, Settlement Amount chu Rs. 21,94,999/- a ni.

Serchhip District Cricket Association buatsaih ‘HD. Lalhmachhuana & V. Lalnuntluanga Memorial Cricket Tournament’ khelh zawh takah AO3C chu an Champion.

Keitum leh Khawlailung inkar Tuichang lui-a ni hnih (2) chhung awh ‘Nghakuai Chiah runpui’ neih chu Inrinni khan a kharna hun hmangin he hun hi Fisheries Minister Lalthansanga chuan khuallian niin a hmanpui a ni.

Zirtawpni khan Serchhip-ah Depositor Education and Awareness Fund (DEAF) chungchang inzirtirna neih niin DEAF Account pawisa lut tawh mi 2 te chu an sum chinfelna lehkha hlan nghal an ni.

Mizoram chhunga Seventhday Adventist Kohhran 'Laymen' pawl lian ber 'Zoram Danial Pawl Chhantu' Inkhawmpui vawi 48-na neih zawh tak chuan kum 2031-a ZDPCH Inkhawmpui lo awm leh tur chu Serchhip Bial-a nghah turin an rel a, Zoram Danial Pawl Chhantu Inkhawmpui hi kum thum dan ah neih thin niin kum 2028-a Inkhawmpui neih tur chu Saitual Bial-ah neih tur a ni ang. Zoram Danial Pawl Chhantu Inkhawmpui vawi 48-na hi Aizawl-a 7th day Tlang Biak In-ah neih niin thupui atan ‘Tho la, kal rawh’ tih chu hman a ni a, Rorel Inkhawmah Bial hrang hrang 16 ten report pein kum 2022-2025 chhunga Danial Pawl rawngbawlna atanga Baptisma chang zat belhkhawm chu mi 1061 a ni tih tarlan a ni.

Mizoram Presbyterian Kohhran Rorelna sang, Synod Inkhawmpui vawi 102-na chuan Sethawn-a awm Jordan Center chu lak tha tiin an pawm.

Mizoram UPC Kohhran inkhawmpui lian ber, General Assembly chu Zirtawpni kalta atanga nimin Pathianni hmang khan Aizawl Mualpui Salem Veng-a R. Dengthuama Hall-ah neih a ni a, nimin  chawhma inkhawmah General Superintendent Rev. P. Lalrinawma’n Pastor pali (4) a nemnghet a, tun tumah hian mi 15 hnenah Ministerial Licence hlan a ni bawk. Mizoram UPC General Assembly report bu-a a lan danin, Kohhran member mi 79249 an ni a, Pastor Bial 78 neiin Pastor 97 an awm mek a, kum 2025 chhungin hmun 20-ah Kohhran thar din a ni a, member 2617-in an pung bawk.

Mizoram pum huap Catholic Thalai Pawl Inkhawmpui vawi 21-na chu nimin Pathianni hmang khan Lawngtlai-a St Francis Xavier Parish-ah neih a ni a, Aizawl Bishop Most Rev. Stephen Rotluanga chuan a hmanpui a ni. He Inkhawmpui ah hian Ningani khan Rorel Inkhawm neih tan niin Inrinni khan Cultural Day hman a ni a, Central Young Lai Association ah Oxygen Concentrator leh YLA Branch sawm (10) te tan Gas Stove an pe a, Inkhawmpui thlengtu Vengpui leh New Vengpui Branch YLA te tan plastic thutthleng an hlan a. Lawngtlai khawpuia miharsate thlanbik chhungkaw panga (5) te tan Krismas chibai bukna thil pek a ni bawk.

Mizoram leh Assam State-a Tourism Minister te chu Inrinni khan Guwahati-ah inkawmin Tourism hmasawnna tura thawho an rem ti a, hun remchang hmasaah thawhona thuthlung ziah tumin Assam Tourism Development Corporation (ATDC) pawhin Mizoram chu puih a tulna ah an inhawn reng thu an sawi bawk.

Union Minister of Ports, Shipping and Waterways Sarbananda Sonowal chuan Mizoram-ah luidunga inkalpawhna tha a awm theih nan Mizoram lui lian pathum (3)-ah hmalak a ni dawn tih a sawi.

Mizoram Power and Electricity Department in Tender a chhuah Earnest Money Deposit (EMD) chungchangah India Danpui bawhchhiatna a awm nia petition lut chu Gauhati High Court, Aizawl Bench chuan ngaihtuahin 'Strengthening of Transmission for Sustainable Power Supply in Mizoram under NESIDS (OTRI)' thawk tura Work Order tihchhuah tawh chu chawl lailawk turin tun thla ni 9 khan thupek a chhuah.

Mizoram Rural Bank (MRB) chuan ‘10000 Crore Total Business’ an tlin lawmna hun Zirtawpni khan an buatsaih a, he hunah hian CSR kaltlanga luanchhuahna hun an hmang nghal bawk.

State Institute of Rural Development & Panchayati Raj (SIRD& PR) in kum 25 a tlinna, Silver Jubilee lawmna chu Ningani khan Aijal Club-ah neih a ni a, he hun hi Rural Development & Administration Department (RD&AD) Minister Prof. Lalnilawma chuan hmanpuiin Silver Jubilee Souvenir a tlangzarh nghal bawk.

Kum 2023 December ni 18 atanga kumin thlengin Chief Minister's Relief Fund (CMRF)-ah mimal leh pawl hrang hrangin cheng nuai 279 chuang an chhunglut tawh a; CM Refief Fund atang hian pawl leh mimal engemaw zat hnenah tanpuina cheng nuai 220.88 pekchhuah a ni tawh.

Mizoram Lok Sabha MP Richard Vanlalhmangaiha chu Zirtawpni khan Union Minister for Culture & Tourism Gajendra Singh Shekhawat-a Pisa-ah lengin Mizoram-a Tagore Cultural Complexes (TCCs) din a nih theih nana hmalak dan tur an sawidun a. Tagore Cultural Complexes hi State dangah din alo ni nual tawh a, an tangkaipui viau zel niin Union Minister hian a sawi a, Mizoram-ah pawh din a nih theih ngei na turin hmalakpui a lo tiam a ni. Lok Sabha MP Richard Vanlal-hmangaiha chuan Mizoram-a Culture and Tourism Department hnuaia hmasawnna rulrel hrang hrang kalpui mekte tihhlawhtlin a nih vat theih nan chak leh zual zawka hma la turin a ngen nghal bawk a, Union Minister pawhin Project hrang hrang awmsa te pawh a rang lama lo bawhzui a nih tur thu a lo hrilh bawk a ni.

Mizoram hmarchhak lam N. Khawlek ram Thingkhuang ngaw Puk chhung a ruhro awm te chu zirchian turin Zirtawpni khan sample lak a ni a, heng ruhro te hi kumin January ni 11 khan hmuh-chhuah niin May thla khan INTACH Mizoram Chapter leh Art & Culture Department tangkawpin, ruhro-te upat dan hriat a nih theih nan Carbon dating an lo ti tawh bawk a ni. Ruhro chanchin zirchiang a sample la tur hian Prof. Mahesh G. Thakkar, Director leh Dr. Niraj Rai, Senior Scientist- Birbal Salni Institute of Paleoscience, Lucknow-te rawn kalin Art & Culture Department-a Archealogist Vanlalhuma Singson in a lo tawiawm a ni.

Nimin khan Serchhip-ah District Cooperative Development Committee(DCDC) thutkhawm vawi 6-na neih niin Cooperation Department changtu Commissioner & Secretary Udit Prakash Rai leh Registrar of Cooperative Societies John LT. Sanga te chuan an rawn telpui a ni.

Mizoram Secondary School Games vawi 42-na chu nimin khan zawhfel niin Serchhip District pawhin infiamna hrang hrangah Medal an la.

Keitum leh Khawlailung inkar Tuichang lui-a ‘Nghakuai Chiah Runpui’ chu nimin khan neih tan niin Vawiin hian chhunzawma zawhfel a ni ang.

Nimin chawhma dar 10:00 vel khan Lalruatfela (12), Khawlailung Bunghmun chu Khawlailung leh Hmunzawl inkar-a Tuichang lui-ah chesualin tui-ah a tlahlum a, Vawiin hian vuiliam a ni ang. Khawlailung atanga LENKAWL in thu a dawn danin Lalruatfela hi MGNREGS hnuaia a pa te inhlawh tur zuiin Tuichang lui lamah hian a kal a, an hnathawk lai thla la tur (Mates) an nghah laiin Tuichang lui-ah hian kala chesualin a tla a, a bulhnai lo awm ten chhan tum mah se an chhan mai thei lo a, tuithiam te punin an lakchhuah chuan a lo boral hman tawh a ni. Lalruatfela ruang hi nimin khan an chenna In-ah lain lumen a nih hnuah Vawiin hian vuiliam a ni ang.

Serchhip Officers’ Club (SOC) te chuan niminpiah tlai khan Serchhip DIET-ah Advance Krismas hmangin kum 2026 chhunga an pawl hruaitu tur an thlang nghal a, President-ah Isaac Lalchhuanmawia (Sr. EE, PHE); Vice President-ah Dr. Malsawmtluanga Fanchun (PD DRDO); Secretary-ah Dr. Lalawmpuia (Lecturer, DIET); Secretsry i/c Sports-ah John Zoram-mawia (Lecturer, DIET); Secretary i/c Information-ah Stephen Auhmun (APO, DRDO); Treasurer-ah Lalnunmawii (DIPRO) leh Fin. Secretary-ah Dr. H. Vanlalrawna (DVO) te thlan an ni.

Govt. Higher Secondary School Serchhip a NSS Unit te chuan ‘Krismas Pual Thisen pek runpui’ kalpui mek denchhenin nimin khan District Hospital Serchhip Blood Bank-a dah turin thisen Unit 17 an pe a, thisen petute hi mipa 14 leh hmeichhia 3 niin Serchhip Blood Bank-ah kalin thisen hi an pe a ni.

Nimin khan Serchhip DC Meeting Hall-ah ‘Land Committee, Serchhip District Headquarters’ chu Vice Chairman leh Addl. DC Lalrinzuala kaihhruaiin an thukhawm a, kumin atana Serchhip Town Land Committee thutkhawm vawi thumna ah hian dilna lut chi hrang hrang 21 te ngaihtuah niin House Site dilna 16, Land Lease dilna 4 leh Periodic Patta dilna pakhat te chu ngaihtuah a nih hnuah Recommend vek a ni. He hunah hian Settlement Officer Gaston Vanlalhriatpuia bakah Line Department aiawh te leh Member dangte an tel a ni.

Chief Minister Lalduhoma chuan nimin khan Mizoram State Commission for Protection of Child Rights (MSCPCR) hotute kawmin, Mizoram-ah hursualna laka naupangte venhimna Dan, POCSO Act kaihhnawih thubuai a pung zel chu pawi a tih thu a sawi.

Chief Minister Lalduhoma chuan hmeichhia te chu an hamthatna leh humhalhna Dan hrang hrang hrechianga hmang tangkai turin a chah.

Mizoram Youth Commission (MYC) Chairman Malsawmzuala Ralte chuan ZPM sawrkar hnuaiah MYC kaltlangin thalai 400-in hna an hmuh tawh thu a sawi.

Champhai North Bialtu MLA Er H. Ginzalala chuan niminpiah khan Khawzawl District-a Neihdawn khawtlang mamawh, an Tomato chinna hmun atana hman tur Tui chhoh Luan Project (Solar Pump) a hawng. He Tuichhoh luan Project hi Neihdawn khawtlang, Tomato chingtuten an mamawh niin tui harsatna nasa tak an neih avanga harsatna an tawh thin chu Bialtu MLA hian hriain, an harsatna sutkian sak dan ngaihtuah ngaihtuah a nih hnuah he Project hi ruahman a ni. Neihdawn-ah hian In 80 velin Tomato an ching mek a, tuna hmalakna thar avang hian nakum atang chuan In 120 velin Tomato an chin theih beisei a ni a, Neihdawn-a Tomato chingtute te hian kum khat-ah cheng nuai 70 atanga nuai 100 lai an hmu thei tih sawiin, he hmalakna hi lawmawm an tih thu an sawi bawk.

BJP Mizoram chuan nimin khan Aizawl-a an Party Office-ah Advance Christmas leh kum 2025 atana Office kharna hun an hmang a, he hunah hian State Vice President Vanupa Zathang IPS (Retd) chuan thu sawiin, T. Lalhmachhuani (Mimi-i) chuan thuchah a sawi bawk a, kumthar January 12-ah Office hi an hawng leh ang.

Mizoram sawrkar Flagship Programme Bana Kaih (Handholding) Scheme Phase-II ah Progress Partner ni tura dilna 40,928 a lut tawh.

Directorate of Sports & Youth Services buatsaih ‘Annual Reports 2024-2025’ chu nimin khan Sports & Youth Services changtu Minister Lalnghinglova Hmar chuan Aizawl-a SYS Conference Hall-ah a tlangzarh a, Sports & Youth Services Department hmalakna hrang hrang tlangzarh theiha a awm chu a hlut thu sawiin, thalaite hmakhua ti eng tura hmalakna hrang hrangah theihtawp chhuaha tan la zel turin thawkte chu a fuih bawk. Annual Reports 2024-2025 tlangzarhna hi SYS Director H. Lalhmingthanga chuan kaihruaiin Deputy Director C. Lalmalsawma chuan Annual Reports hi a sawifiah bawk.

December 8 atanga 12, 2025 chhunga neih ‘State-Level Skill Competition 2025’ kharna chu nimin khan Aizawl-a LESDE Auditorium-ah neih niin LESDE Minister Lalnghinglova Hmar chuan a hmanpui a, he huna thalai kalkhawmte chu eizawnna tling thiamna neih tum tura chahin, thiamna engpawh, tunlai khawvel mila digitise theih zel a nih a pawimawh thu a sawi bawk. State-Level Competition-a telte hi November 18 atanga 20, 2025 chhunga District Level Skill Competition-a titha zual thlanchhuah te niin Bakery, Beauty Therapy, Cabinet-making, Carpentry leh Car-painting-a titha zual te hnenah lawmman semin Guwahati-a Regional Level intihsiakna ah an tel dawn a, an tithat chuan khawvel huap intihsiakna ah an tel thei dawn a ni.

Mizoram Legislative Assembly-a Committee on Petitions leh Kerala Legislative Assembly-a Committee on Petitions te chuan hnathawh dan leh kalphung hrang hrangte zirchiangin nimin khan inkawmhona an nei a, Mizoram Legislative Assembly Committee on Petitions atangin Chairman T. Lalhlimpuia bakah Member pahnih H. Lalzirliana leh Prova Chakma te an tel a, Kerala lam atangin Chairman Antony Raju bakah Member te telin Official te an tel bawk a ni. He hunah hian Committee on Petitions case hrang hrang te sawiho in, Procedure leh Proceedings inzir tawn sak bakah siam danglam an duhte sawiho a, Committee on Petitions chu mipui leh sawrkar inkara palai pawimawh tak a nih thute tarlangin, mipuite'n tangkai zawka an chhawr theih nana hmalak dan turte an sawiho bawk a ni.

Serchhip District chhunga Bawktlang leh North Vanlaiphai khua ah ‘Border Area Meet & Bharat ko Janno - a Chain Yatra Programme’ hman a ni.

Vawiin December 12, 2025 hi kumin (2025) a zirna In te an inhawn ni hnuhnung ber tur a ni ta a, karleh Thawhtanni atang chuan zirna In hrang hrangte hian ‘Winter Vacation’ an hmang tawh dawn a, ni 23 chhung chawlh hi hmangin kumthar January 7, 2026-ah zirna In te hi hawn tan leh tur a ni ang. Serchhip-a zirna In tam tak te chuan Vawiin hian ‘Advance Krismas’ hmangin intihhlimna hun an nei ang.

Chief Minister Lalduhoma chuan kumtin ramngaw vata Loneih (Jhum) chu Mizo hnam nunah thuk takin bet tlat mah se, leilung chereu zel leh sik leh sa inthlak danglam (climate change) avangin leh kan hmakhua a ngelngheh zawk nan technology changkang zawk hman a tul tawh thu a sawi.

Mizoram-a Halpuah leh halmawi khuahkhirhna Dan hman tura duan chu nakum lamah Assembly Session-ah putluh tum a ni.

Mizoram Governor General (Dr) Vijay Kumar Singh chuan Digital Creator te chu Mizoram State mawi tak leh hnam ziarangte khawvel hmuh theiha pholanga auchhuahpuitu 'Cultural Ambassador' an nih thu a sawi.

Kum 2025-2027 chhunga YMA Kumpuan ‘Ruihhlo Do’ hawnna chu nizan hmasa khan neih niin Central YMA President R. Lalngheta chuan ruihhlo zuartute chu eizawnna dang lo ngaihtuah turin a chah.

West Phaileng khua chuan nimin khan an kum 100 tlinna, Centenary lawmna chu West Phaileng-a GSA Playground-ah hmangin he hun hi Bialtu MLA, Dr. R. Lalthangliana chuan khuallian niin a hmanpui a, Centenary lungphun hawngin Souvenir a tlangzarh nghal bawk. West Phaileng Centenary lawmna hunah hian Dr. R. Lalthangliana chuan an Bial chhungah khaw upa leh hlun tak tak a awm nual tih sawiin, “Kan pipute leh hranghlui te sulhnu hlu leh ropui tak takte kan chhuichhuah a, kan vawnthat a tul a. Kan seilenna hmun hian kan nun leh kan hunah nghawng a nei thin a. Chuvangin, kan seilenna ngaihlu ila, hmasawn zel turin mawhphurhna kan nei tih i hrethar ang u,” tiin kalkhawmte a fuih bawk.

AH&Vety Minister C. Lalsawivunga chuan Kalphung thar sawrkar chu mi taima tan dinchhuahna tur sawrkar a ni dawn tih a sawi.

Tourism Minister Lalnghinglova Hmar chuan nimin khan thuthar thehdarhtute kawmin tunhnaia an hmachhawp hrang hrang leh nakum lama hmalakna tura an ruahman te a tarlang.

Aizawl Chawnpui Veng-a ‘Chawnpui Sports Centre’ sak thar chu nimin khan UD&PA Minister K. Sapdanga chuan a hawng.

Mizoram Larsap, General (Dr) Vijay Kumar Singh chuan Aizawl Lok Bhavan-a nimin khan Assam leh Nagaland State-te dinchamphaphak 'Foundation Day' lawmna hun a buatsaih.

Lai Autonomous District Council (LADC) Inthlanpui neih zawh a nih hnuah Indian National Congress (INC) leh Zoram Peoples Movement (ZPM) ten Sawrkar intawm siam tumin hma an la mek.

State Council of Educational Research and Training (SCERT) Mizoram buatsaihin nimin khan Aizawl-a SCERT Auditorium-ah ‘Poetry Festival’ hman a ni a, he Festival hi kum 2011 atang khan kumtin hman niin kumin hi a vawi 14-na a ni a, School 11 atangin zirlai 60-ten poetry inziah-siakna an nei a ni. He intihsiakna ah hian a pumpui ah William Lalchhanchhuaha, Class XII (Arts), Helen Lowry HSS chu pakhatna niin Linzy Malsawmkimi, Class XI (Science), Mount Carmel HSS chu pahnihna a ni a, Lalmawizuali, Class XI (Science), St. Paul’s HSS chu pathumna a ni bawk.

Nimin khan Champhai-ah District Level Narco Coordination Centre (NCORD) Committee chuAddl. DC James Lalnithanga hova thukhawmin an hmalakna an thlirlet bakah an hmalak zel dan turte an sawiho a. He huna tarlan a nih danin November 2025 chhung khan Cham-phai District-ah Police ten Heroin gram 0.933 manin thubuai 9 ziahluh a ni a, Excise & Narcotics Department ten Heroin gram 11.5 manin Methamphetamine kg. 25.209 an man bawk a, thubuai 5 an ziaklut bawk a. Heng thubuai kaih-hnawih ah hian mi 21 man an awm bawk.

IndiGo Airline chuan tun thla ni 3 leh ni 5 inkara thlawhna thlawh dan mumal loh avanga tuartute hnenah zangnadawmna Rs. 10,000/- theuh a pe dawn a, zangnadawmna hi Travel voucher anga siamin, thla 12 chhungin IndiGo thlawhna an chuan leh hunah an hmang thei ang.

Aizawl District Legal Services Authority (ADLSA) chuan niminpiah khan Aizawl District Court-a District Judge Meeting Room-ah pawikhawihna tuartu mi 12 hnenah zangnadawmna an hlan a. Crime Victim Compensation semna inkhawm tawi hi Gauhati High Court Judge leh High Court Legal Services Committee Chairman Justice Marli Vankung chuan hmanpuiin mi pawikhawihna avanga zangnadawmna inhlanna hun hman a ngai thin chu pawi a tih thu a sawi a. Zangnadawmna chu a dawngtute’n nunphung pangngai an zawh leh theih nan leh intun nun nana dik taka hmang turin a chah a ni. He hunah hian mi kut tawrh avanga thi leh kumtling lo pawngsual tawk mi 12 hnenah zangnadawmna Rs. 52,80,000/- semchhuah a ni.

Nimin khan 2nd India Reserve Battalion (2nd IR Bn.) in kum 25 an tlinna, Silver Jubilee lawmna chu Khawzawl-a an Battalion Hqrs. ah neih a ni a, he hun hi Director General of Police Sharad Agarwal IPS chuan khuallian nia hmanpuiin 2nd IR Bn. in kum 25 an tling chu a lawmpui thu a sawi a, an inpekna leh an taimakna avangin Khaw-zawl, Champhai leh Saitual District mipui te chu him takin an nungin an khawsa thei tih sawiin, a hmaa hna an lo thawh that angin Commandant leh a hnuaia awm zawng zawngte chu taima tak leh inpe takin hna thawk chhunzawm zel turin a fuih bawk. He hunah hian 2nd IR Bn. Commandant KL. Vulmawia chuan inlawmna thu a sawi bakah 2nd RO C. Lalremruata'n 2nd IR Bn. chungchang leh din a nih atanga an hnathawh dan te a sawi bawk a ni.

Serchhip Bazar atanga Serchhip Hmar Veng kaltlanga Kikawn thleng pawh tur kawng thar siam tur chu nimin khan laih tlang niin kawng thar erawh siamthat ngai neuh neuh ala awm thung.

Serchhip District Cricket Association (SEDCA) ten an hruaitu boral, HD. Lalhmachhuana leh V. Lalnuntluanga te hriatrengna atana Cricket Tournament an buatsaih chu Serchhip Sports Complex-ah khelh mek a ni a, he Tournamwnt-ah hian Team 6 telin Vawiin hian Semi Final khelh tum a ni a, zing dar 9:30-ah AO3C leh Bawngchawm CC inhmachhawnin chawhnu dar 1:00 ah Tuikhuah CC leh Thenzawl CC te an inhma-chhawn ve leh bawk ang.