Lenkawl

Serchhip-a Excise & Narcotics Department te chuan nizan dar 6:00 vel khan Keitum leh Tuichang lui inkarah Heroin No. 4 nia hriat Hawng 17 an man a, a neitu nia hriat Joseph Lalrindika (48), Tlangsam Dinthar Veng, Champhai nia insawi pawh man a ni. Heng damdawi te hi Sahbawn bawm 17-a dah niin gram 200.16 a rit a ni.

Serchhip District Amateur Taekwondo Association (SDATA) buatsaihin nimin khan New Serchhip YMA Hall-ah 'Colour Belt Awarding Ceremony' neih a ni a, he hun hi 14th Assam Rifles Commandant Col. Archit Goswamu chuan khuallian nia hmanpuiin, Martial Arts chuan taksa chakna mai ni lovin rilru taksa peng hrang hrangte inbuktawk takin min siam thei a, naupang rual ten hetiang infiamna an tuipui chu lawmawm a tih thu a sawi a ni. Mizoram pumah 3rd Session Color Belt exam-ah hian mi sang chuang telin Serchhip atangin naupang 42 an Exam a, Blue Belt 2, Green Belt 2 leh Yellow Belt 38 ten tha takin Exam an paltlang a ni.

Serchhip District-a Ruihhlo ngai te puala Gospel Camping neih tura ruahman chu nakum Feb. 9 atanga neih tura ruahman a ni.

Jal Jeevan Mission (JJM) hnuaia Tlungvel Multi Village (Tlungvel & Darlawng) WSS, Tuirini Grid pumping thawh zawh tak chu nimin khan PHE Minister Prof. Lalnilawma chuan a hawng.

Lai Autonomous District Council (LADC) Inthlanpui neih zawh takah Party mal-a sawrkar siam thei an awm loh hnuah ZPM leh MNF Party te chuan sawrkar an siam theih thu nimin khan Larsap hnenah thlen an tum.

Mizoram Rajya Sabha MP K. Vanlalvena chuan Union Railway Minister Ashwini Vaishnaw hmuin IndiGo flight cancel a tam avangin Delhi leh India ram khawpui danga Mizo zirlaite leh hna-thawka awm ten Mizoram-a Krismas hmang tura hawna kawngah harsatna an tawh thu thlenin, Rel ngaihtuah belh sak turin a ngen bawk.

Mizoram Fire and Emergency Services chhinchhiah danin kumin chhungin Mizoram-ah In kang 27 a awm. Fire and Emergency Services hotute sawi danin, kumin chhunga In kang 27-a kangmeiin bungrua a tihchhiat zat hlutna chu, Rs. 459,98,530/- ang a chhut a ni a, kumin chhunga ramkang F&ES hnena report zat chu 162 a tling bawk. Mizoram Fire and Emergency Services chuan kumin chhungin chhanchhuah hna tum 39 an thawk bawk a, hei bakah hian kumin chhunga kangmei avanga nunna chan mi pakhat a awm thu an sawi bawk a. Mitin te kangmei laka fimkhur tur leh Electric Connection bakah Gas Connection putru a awm leh awm loh chhung tinte enchiang thin tura an duh thu an sawi a, kangmei chhuak pumpelh tura tan la tura an duh thu an sawi bawk.

Farkawn Chhim Veng-a cheng C. Lalramenga thihna kaihhnawih ah Farkawn VDP Member mi 6 te chu nimin khan Champhai District Jail-ah dahluh an ni. Kum 49-a upa Farkawn Chhim Veng (Theirekawn)-a cheng C. Lalramenga hi Inrinni (Dec. 13, 2025) khan Myanmar-ah a kal a, hei hi Farkawn VDP ten ringhlelin a lo haw lam chu an lo chang a, zan rei tawhah Zu fun engemaw zat a kut atangin an man a, Village Defence Party (VDP) ten thu an zawhfiah hnuah an chenna In ah motor-in an dah leh a, Pathianni zing dar 5:00 vel khan a boral zui ta nia sawi a ni a. Hetianga a thih hnu hian a taksa ah hian kutthlakna hnuhma tam tak a awm avangin a nupui, Lalremruati chuan a pasal thih danah hian thilfel tawk lo a awm nia hriaiin Dungtlang Police Station-ah FIR a thehlut a. Dungtlang Police-te chuan he thihna thleng chungchangah hian Farkawn VDP member mi 10-te chuan thu zawhfiah turin an la nghal a. Thu an zawhfiah hnuah an zinga mi 6-te chu nimin khan Champhai District Court-ah khung an ni.

Directorate of Women & Child Development chuan nimin khan Aizawl-ah ‘A day with our Minister’ tih hun hmangin an Department hmalakna thlirletna leh infuihtharna an nei a, he hunah hian Minister Lalrinpuii chuan Saksham Anganwadi and Poshan 2.0-te, Mission Shakti leh Mission Vatsalya-te kaltlanga Women&Child Development hmalaknate chu ropui a tih thu a sawi a. FRS drive kaltlanga Department hmalaknate phei chu chhuanawm a tih thu sawiin, India rampum huap pawha titha zinga lang tura thawktute inpekna chu fakawm a tih thu a sawi a. APAAR kalpui danah pawh thawktu ten theihtawp an chhuah dante chu lawmawm a tih thu tarlangin, ram leh hnam kut leh ke, hmeichhia leh naupangte enkawltu an nih anga an dinhmun pawimawh tak chu hrereng chunga an hnathawhah chuan theihtawp chhuah zel turin a fuih nghal bawk a ni.

Chief Minister Lalduhoma chuan, “Kan ram mipui zaa sawmriat deuhthaw te hi Lonei a eizawng an la nih avangin heng mite chawikan hi kan ram chawikanna a ni,” tiin NABARD sum hmanga din Megawatt 10 pechhuak thei Thenzawl Solar Power Plant chu an hawng dawn hnai niin a sawi bawk.

UD&PA Minister K. Sapdanga chuan nimin zing khan Civil Hospital Aizawl-a hman tur cheng nuai 35.70 man Anesthesia Workstation leh cheng nuai 22 man Upper Gastrointestinal Video Endoscope Unit te a hlan.

Mizoram Sports hmelhmang thlak danglam tura hmalakna kal mekah Mizoram-a Sports Coach-te intuaitharna tur, 'Transforming Sport for the Next Generation: Developing Decision Makers' tih chu nimin khan Aizawl Republic Veng-a Hawla Indoor Stadium-ah Sports Minister Lalnghinglova Hmar chuan a hawng a. Mizoram State Sports Council, Nippon Sports Science University leh JICA tangkawpin an buatsaih Coach-te inzirnaah hian Zirtirtu turin Prof. Masamitsu Ito chu Nippon Sports Science University, Tokyo atangin a lo kal a, mi pawimawh hrang hrang ten rawn tawiawmin Dec. 18 thleng kalpui a ni ang.

Economics & Statistic Department buatsaih ‘Mizoram Statistical Handbook 2024’ chu tlangzarh a ni leh ta a, Vawiin atang hian Economics & Statistic Directorate, GE Branch-ah Rs. 100 in a lei theih ang.

Mizoram State Library-ah member 9970 an awm mek a, kum hmasa lam aiin State Library tlawhtu an pung nia tarlan a ni bawk.

Tun thla ni 13 zan-a ruang chhar, Marina Lalchhanchhuahi thih dan chu ngawrh taka chhui zel mek niin MHIP General Hqrs. chuan a chunga kutthlaktu chu a phu tawk hremna pek ngei an phut thu an sawi.

Tripura atanga Mizoram-a Gas Pipeline phum hna thawk mektu, Indradhanush Gas Grid Limited (IGGL) Chief Executive Officer Subrata Das leh a thawhpuite chu nimin khan Chief Minister Lalduhoma chuan a Pisa-ah kawmin an hnathawh chinte a sawipui bakah an harsatna tawh mekte a ngaihthlaksak a. IGGL-a thawktute chuan he Pipeline hi Tripura State Panisagar Receiving Terminal atanga rawn kal tanin Kanhmun-ah, Zawlnuam-ah, Kawrthah-ah, Tuidam leh Darlak paltlangin Mamit bulah a chhuak dawn tih an sawi a. Chuta tangin Lengte-ah kal zelin Sihhmui-ah Receiving Terminal dah tur a nih thu an sawi a. Sihhmui Receiving Terminal atanga Aizawl khawpui chhung Household Connection hi Tripura Natural Gas Corporation Limited ten an thawk thung dawn tih an sawi a ni.

BJP Parliamentary Board chuan an Party President atan Nitin Nabin chu an ruat a, Nitin Pabin hi kum 45-a upa niin BJP President ni tawh zinga a naupang ber leh Bihar atanga BJP Prsident ni thei hmasa ber a ni a, Bihar MLA atan tum nga thlantlin ni tawhin tunah hian Minister hna a chelh mek a ni.

Indiatourism, North East Regional Office, Guwahati leh Mizoram sawrkar-a Tourism Department tangkawp chuan a vawikhatna atan Mizoram-ah ‘Familiarization Tour’ an huaihawt a, Assam atangin Tour Operator 29 te chuan niminpiah khan Aizawl an rawn thleng a, hemi rual hian Assam Regional News leh Kolkata Film Tourism mithiam te pawh an tel a ni. Heng mite hian tun thla ni 18 khian Mizoram an chhuahsan leh dawn a, Mizoram-a an cham chhung hian hmun hrang hrang tlawhin Thenzawl khua an tlawh dawn bawk a, Mizoram-a Tourism hmunhma kan neih that te zirchiangin, an let hunah Mizoram-a Tourism Service Providers te nen tangkawpin mikhual an rawn tir lut dawn a ni.

Food Corporation of India (FCI) chuan Mizoram chhunga an Kudam hrang hrangah Buhfai hralhchhuah tur Metric Tonn 21,269 an kawl mek thu an sawi. Mizoram-a FCI hotuten Akashvani News Aizawl an hrilh danin, Mizoram chhung hmun hrang hranga an Kudam-ah buhfai chhekkhawl dinhmun a tha a, Aizawl Kudam-ah buhfai Metric Ton 3125. Kolasib Kudam-ah Metric Ton 3933, Bualpui Kudam-ah Metric Ton 3213, Lunglei Kudam-ah Metric Ton 2444, Bairabi Kudam-ah Metric Ton 4769 bakah Lawngtlai Kudam-ah Metric Tonn 2725 a awm mek thu an sawi a. Food Corporation of India Mizoram Divisional Manager, Bankim Phonglo chuan kumin sawrkar kum chhunga nimin, December ni 15 thlenga FCI in Mizoram a buhfai a lakuh zat chu Metric Ton 77034.43 a tlin tawh thu leh hemi phurhluhna atan hian Rel bungraw phurhna Rake 39 lai hman a nih thu a sawi bawk.

Serchhip District Cricket Association (SEDCA) chuan Zirtawpni zan khan Serchhip Press Club-ah kum 2025-2028 chhunga an hruaitu tur thlanna an nei a, President-ah R. Lalrinawma (Chanmari Veng); Vice President-ah Andrew Lalrinmawia (Thenzawl); Secretary-ah Malsawmkima (Tuikhuah Veng); Asst. Secretary-ah Saingurpuia Sailo (Chhim Veng) leh Treasurer-ah V. Lallawmzuali (Hmar Veng) te thlan an ni.

Inrinni khan Serchhip-ah Lok Adalat thut-khawm neih leh niin thubuai chhawpchhuah 33 zinga 13 te chu chinfel a ni. District Legal Services Authority (DLSA) ruahman anga Lok Adalat thutkhawm hi Serchhip District Court-a hmun hnih ah neih niin tun tumah hian Bank Loan ba kaihhnawih ah thubuai pakhat chawpchhuah awmin chinfel a ni a, Settlement Amout Rs. 5,85,018/- a ni a. Civil Case dang chhawpchhuah 32 awmin 12 chinfel a ni bawk a, Settlement amount chu Rs. 16,09,981/- niin heti hian tun tum thutkhawm ah hian thubuai chhawpchhuah 33 awmin heng zinga 13 te chu chinfel a ni a, Settlement Amount chu Rs. 21,94,999/- a ni.

Serchhip District Cricket Association buatsaih ‘HD. Lalhmachhuana & V. Lalnuntluanga Memorial Cricket Tournament’ khelh zawh takah AO3C chu an Champion.

Keitum leh Khawlailung inkar Tuichang lui-a ni hnih (2) chhung awh ‘Nghakuai Chiah runpui’ neih chu Inrinni khan a kharna hun hmangin he hun hi Fisheries Minister Lalthansanga chuan khuallian niin a hmanpui a ni.

Zirtawpni khan Serchhip-ah Depositor Education and Awareness Fund (DEAF) chungchang inzirtirna neih niin DEAF Account pawisa lut tawh mi 2 te chu an sum chinfelna lehkha hlan nghal an ni.

Mizoram chhunga Seventhday Adventist Kohhran 'Laymen' pawl lian ber 'Zoram Danial Pawl Chhantu' Inkhawmpui vawi 48-na neih zawh tak chuan kum 2031-a ZDPCH Inkhawmpui lo awm leh tur chu Serchhip Bial-a nghah turin an rel a, Zoram Danial Pawl Chhantu Inkhawmpui hi kum thum dan ah neih thin niin kum 2028-a Inkhawmpui neih tur chu Saitual Bial-ah neih tur a ni ang. Zoram Danial Pawl Chhantu Inkhawmpui vawi 48-na hi Aizawl-a 7th day Tlang Biak In-ah neih niin thupui atan ‘Tho la, kal rawh’ tih chu hman a ni a, Rorel Inkhawmah Bial hrang hrang 16 ten report pein kum 2022-2025 chhunga Danial Pawl rawngbawlna atanga Baptisma chang zat belhkhawm chu mi 1061 a ni tih tarlan a ni.

Mizoram Presbyterian Kohhran Rorelna sang, Synod Inkhawmpui vawi 102-na chuan Sethawn-a awm Jordan Center chu lak tha tiin an pawm.

Mizoram UPC Kohhran inkhawmpui lian ber, General Assembly chu Zirtawpni kalta atanga nimin Pathianni hmang khan Aizawl Mualpui Salem Veng-a R. Dengthuama Hall-ah neih a ni a, nimin  chawhma inkhawmah General Superintendent Rev. P. Lalrinawma’n Pastor pali (4) a nemnghet a, tun tumah hian mi 15 hnenah Ministerial Licence hlan a ni bawk. Mizoram UPC General Assembly report bu-a a lan danin, Kohhran member mi 79249 an ni a, Pastor Bial 78 neiin Pastor 97 an awm mek a, kum 2025 chhungin hmun 20-ah Kohhran thar din a ni a, member 2617-in an pung bawk.

Mizoram pum huap Catholic Thalai Pawl Inkhawmpui vawi 21-na chu nimin Pathianni hmang khan Lawngtlai-a St Francis Xavier Parish-ah neih a ni a, Aizawl Bishop Most Rev. Stephen Rotluanga chuan a hmanpui a ni. He Inkhawmpui ah hian Ningani khan Rorel Inkhawm neih tan niin Inrinni khan Cultural Day hman a ni a, Central Young Lai Association ah Oxygen Concentrator leh YLA Branch sawm (10) te tan Gas Stove an pe a, Inkhawmpui thlengtu Vengpui leh New Vengpui Branch YLA te tan plastic thutthleng an hlan a. Lawngtlai khawpuia miharsate thlanbik chhungkaw panga (5) te tan Krismas chibai bukna thil pek a ni bawk.

Mizoram leh Assam State-a Tourism Minister te chu Inrinni khan Guwahati-ah inkawmin Tourism hmasawnna tura thawho an rem ti a, hun remchang hmasaah thawhona thuthlung ziah tumin Assam Tourism Development Corporation (ATDC) pawhin Mizoram chu puih a tulna ah an inhawn reng thu an sawi bawk.

Union Minister of Ports, Shipping and Waterways Sarbananda Sonowal chuan Mizoram-ah luidunga inkalpawhna tha a awm theih nan Mizoram lui lian pathum (3)-ah hmalak a ni dawn tih a sawi.

Mizoram Power and Electricity Department in Tender a chhuah Earnest Money Deposit (EMD) chungchangah India Danpui bawhchhiatna a awm nia petition lut chu Gauhati High Court, Aizawl Bench chuan ngaihtuahin 'Strengthening of Transmission for Sustainable Power Supply in Mizoram under NESIDS (OTRI)' thawk tura Work Order tihchhuah tawh chu chawl lailawk turin tun thla ni 9 khan thupek a chhuah.

Mizoram Rural Bank (MRB) chuan ‘10000 Crore Total Business’ an tlin lawmna hun Zirtawpni khan an buatsaih a, he hunah hian CSR kaltlanga luanchhuahna hun an hmang nghal bawk.

State Institute of Rural Development & Panchayati Raj (SIRD& PR) in kum 25 a tlinna, Silver Jubilee lawmna chu Ningani khan Aijal Club-ah neih a ni a, he hun hi Rural Development & Administration Department (RD&AD) Minister Prof. Lalnilawma chuan hmanpuiin Silver Jubilee Souvenir a tlangzarh nghal bawk.

Kum 2023 December ni 18 atanga kumin thlengin Chief Minister's Relief Fund (CMRF)-ah mimal leh pawl hrang hrangin cheng nuai 279 chuang an chhunglut tawh a; CM Refief Fund atang hian pawl leh mimal engemaw zat hnenah tanpuina cheng nuai 220.88 pekchhuah a ni tawh.

Mizoram Lok Sabha MP Richard Vanlalhmangaiha chu Zirtawpni khan Union Minister for Culture & Tourism Gajendra Singh Shekhawat-a Pisa-ah lengin Mizoram-a Tagore Cultural Complexes (TCCs) din a nih theih nana hmalak dan tur an sawidun a. Tagore Cultural Complexes hi State dangah din alo ni nual tawh a, an tangkaipui viau zel niin Union Minister hian a sawi a, Mizoram-ah pawh din a nih theih ngei na turin hmalakpui a lo tiam a ni. Lok Sabha MP Richard Vanlal-hmangaiha chuan Mizoram-a Culture and Tourism Department hnuaia hmasawnna rulrel hrang hrang kalpui mekte tihhlawhtlin a nih vat theih nan chak leh zual zawka hma la turin a ngen nghal bawk a, Union Minister pawhin Project hrang hrang awmsa te pawh a rang lama lo bawhzui a nih tur thu a lo hrilh bawk a ni.

Mizoram hmarchhak lam N. Khawlek ram Thingkhuang ngaw Puk chhung a ruhro awm te chu zirchian turin Zirtawpni khan sample lak a ni a, heng ruhro te hi kumin January ni 11 khan hmuh-chhuah niin May thla khan INTACH Mizoram Chapter leh Art & Culture Department tangkawpin, ruhro-te upat dan hriat a nih theih nan Carbon dating an lo ti tawh bawk a ni. Ruhro chanchin zirchiang a sample la tur hian Prof. Mahesh G. Thakkar, Director leh Dr. Niraj Rai, Senior Scientist- Birbal Salni Institute of Paleoscience, Lucknow-te rawn kalin Art & Culture Department-a Archealogist Vanlalhuma Singson in a lo tawiawm a ni.

Nimin khan Serchhip-ah District Cooperative Development Committee(DCDC) thutkhawm vawi 6-na neih niin Cooperation Department changtu Commissioner & Secretary Udit Prakash Rai leh Registrar of Cooperative Societies John LT. Sanga te chuan an rawn telpui a ni.

Mizoram Secondary School Games vawi 42-na chu nimin khan zawhfel niin Serchhip District pawhin infiamna hrang hrangah Medal an la.

Keitum leh Khawlailung inkar Tuichang lui-a ‘Nghakuai Chiah Runpui’ chu nimin khan neih tan niin Vawiin hian chhunzawma zawhfel a ni ang.

Nimin chawhma dar 10:00 vel khan Lalruatfela (12), Khawlailung Bunghmun chu Khawlailung leh Hmunzawl inkar-a Tuichang lui-ah chesualin tui-ah a tlahlum a, Vawiin hian vuiliam a ni ang. Khawlailung atanga LENKAWL in thu a dawn danin Lalruatfela hi MGNREGS hnuaia a pa te inhlawh tur zuiin Tuichang lui lamah hian a kal a, an hnathawk lai thla la tur (Mates) an nghah laiin Tuichang lui-ah hian kala chesualin a tla a, a bulhnai lo awm ten chhan tum mah se an chhan mai thei lo a, tuithiam te punin an lakchhuah chuan a lo boral hman tawh a ni. Lalruatfela ruang hi nimin khan an chenna In-ah lain lumen a nih hnuah Vawiin hian vuiliam a ni ang.

Serchhip Officers’ Club (SOC) te chuan niminpiah tlai khan Serchhip DIET-ah Advance Krismas hmangin kum 2026 chhunga an pawl hruaitu tur an thlang nghal a, President-ah Isaac Lalchhuanmawia (Sr. EE, PHE); Vice President-ah Dr. Malsawmtluanga Fanchun (PD DRDO); Secretary-ah Dr. Lalawmpuia (Lecturer, DIET); Secretsry i/c Sports-ah John Zoram-mawia (Lecturer, DIET); Secretary i/c Information-ah Stephen Auhmun (APO, DRDO); Treasurer-ah Lalnunmawii (DIPRO) leh Fin. Secretary-ah Dr. H. Vanlalrawna (DVO) te thlan an ni.

Govt. Higher Secondary School Serchhip a NSS Unit te chuan ‘Krismas Pual Thisen pek runpui’ kalpui mek denchhenin nimin khan District Hospital Serchhip Blood Bank-a dah turin thisen Unit 17 an pe a, thisen petute hi mipa 14 leh hmeichhia 3 niin Serchhip Blood Bank-ah kalin thisen hi an pe a ni.

Nimin khan Serchhip DC Meeting Hall-ah ‘Land Committee, Serchhip District Headquarters’ chu Vice Chairman leh Addl. DC Lalrinzuala kaihhruaiin an thukhawm a, kumin atana Serchhip Town Land Committee thutkhawm vawi thumna ah hian dilna lut chi hrang hrang 21 te ngaihtuah niin House Site dilna 16, Land Lease dilna 4 leh Periodic Patta dilna pakhat te chu ngaihtuah a nih hnuah Recommend vek a ni. He hunah hian Settlement Officer Gaston Vanlalhriatpuia bakah Line Department aiawh te leh Member dangte an tel a ni.

Chief Minister Lalduhoma chuan nimin khan Mizoram State Commission for Protection of Child Rights (MSCPCR) hotute kawmin, Mizoram-ah hursualna laka naupangte venhimna Dan, POCSO Act kaihhnawih thubuai a pung zel chu pawi a tih thu a sawi.

Chief Minister Lalduhoma chuan hmeichhia te chu an hamthatna leh humhalhna Dan hrang hrang hrechianga hmang tangkai turin a chah.

Mizoram Youth Commission (MYC) Chairman Malsawmzuala Ralte chuan ZPM sawrkar hnuaiah MYC kaltlangin thalai 400-in hna an hmuh tawh thu a sawi.

Champhai North Bialtu MLA Er H. Ginzalala chuan niminpiah khan Khawzawl District-a Neihdawn khawtlang mamawh, an Tomato chinna hmun atana hman tur Tui chhoh Luan Project (Solar Pump) a hawng. He Tuichhoh luan Project hi Neihdawn khawtlang, Tomato chingtuten an mamawh niin tui harsatna nasa tak an neih avanga harsatna an tawh thin chu Bialtu MLA hian hriain, an harsatna sutkian sak dan ngaihtuah ngaihtuah a nih hnuah he Project hi ruahman a ni. Neihdawn-ah hian In 80 velin Tomato an ching mek a, tuna hmalakna thar avang hian nakum atang chuan In 120 velin Tomato an chin theih beisei a ni a, Neihdawn-a Tomato chingtute te hian kum khat-ah cheng nuai 70 atanga nuai 100 lai an hmu thei tih sawiin, he hmalakna hi lawmawm an tih thu an sawi bawk.

BJP Mizoram chuan nimin khan Aizawl-a an Party Office-ah Advance Christmas leh kum 2025 atana Office kharna hun an hmang a, he hunah hian State Vice President Vanupa Zathang IPS (Retd) chuan thu sawiin, T. Lalhmachhuani (Mimi-i) chuan thuchah a sawi bawk a, kumthar January 12-ah Office hi an hawng leh ang.

Mizoram sawrkar Flagship Programme Bana Kaih (Handholding) Scheme Phase-II ah Progress Partner ni tura dilna 40,928 a lut tawh.

Directorate of Sports & Youth Services buatsaih ‘Annual Reports 2024-2025’ chu nimin khan Sports & Youth Services changtu Minister Lalnghinglova Hmar chuan Aizawl-a SYS Conference Hall-ah a tlangzarh a, Sports & Youth Services Department hmalakna hrang hrang tlangzarh theiha a awm chu a hlut thu sawiin, thalaite hmakhua ti eng tura hmalakna hrang hrangah theihtawp chhuaha tan la zel turin thawkte chu a fuih bawk. Annual Reports 2024-2025 tlangzarhna hi SYS Director H. Lalhmingthanga chuan kaihruaiin Deputy Director C. Lalmalsawma chuan Annual Reports hi a sawifiah bawk.

December 8 atanga 12, 2025 chhunga neih ‘State-Level Skill Competition 2025’ kharna chu nimin khan Aizawl-a LESDE Auditorium-ah neih niin LESDE Minister Lalnghinglova Hmar chuan a hmanpui a, he huna thalai kalkhawmte chu eizawnna tling thiamna neih tum tura chahin, thiamna engpawh, tunlai khawvel mila digitise theih zel a nih a pawimawh thu a sawi bawk. State-Level Competition-a telte hi November 18 atanga 20, 2025 chhunga District Level Skill Competition-a titha zual thlanchhuah te niin Bakery, Beauty Therapy, Cabinet-making, Carpentry leh Car-painting-a titha zual te hnenah lawmman semin Guwahati-a Regional Level intihsiakna ah an tel dawn a, an tithat chuan khawvel huap intihsiakna ah an tel thei dawn a ni.

Mizoram Legislative Assembly-a Committee on Petitions leh Kerala Legislative Assembly-a Committee on Petitions te chuan hnathawh dan leh kalphung hrang hrangte zirchiangin nimin khan inkawmhona an nei a, Mizoram Legislative Assembly Committee on Petitions atangin Chairman T. Lalhlimpuia bakah Member pahnih H. Lalzirliana leh Prova Chakma te an tel a, Kerala lam atangin Chairman Antony Raju bakah Member te telin Official te an tel bawk a ni. He hunah hian Committee on Petitions case hrang hrang te sawiho in, Procedure leh Proceedings inzir tawn sak bakah siam danglam an duhte sawiho a, Committee on Petitions chu mipui leh sawrkar inkara palai pawimawh tak a nih thute tarlangin, mipuite'n tangkai zawka an chhawr theih nana hmalak dan turte an sawiho bawk a ni.

Serchhip District chhunga Bawktlang leh North Vanlaiphai khua ah ‘Border Area Meet & Bharat ko Janno - a Chain Yatra Programme’ hman a ni.

Vawiin December 12, 2025 hi kumin (2025) a zirna In te an inhawn ni hnuhnung ber tur a ni ta a, karleh Thawhtanni atang chuan zirna In hrang hrangte hian ‘Winter Vacation’ an hmang tawh dawn a, ni 23 chhung chawlh hi hmangin kumthar January 7, 2026-ah zirna In te hi hawn tan leh tur a ni ang. Serchhip-a zirna In tam tak te chuan Vawiin hian ‘Advance Krismas’ hmangin intihhlimna hun an nei ang.

Chief Minister Lalduhoma chuan kumtin ramngaw vata Loneih (Jhum) chu Mizo hnam nunah thuk takin bet tlat mah se, leilung chereu zel leh sik leh sa inthlak danglam (climate change) avangin leh kan hmakhua a ngelngheh zawk nan technology changkang zawk hman a tul tawh thu a sawi.

Mizoram-a Halpuah leh halmawi khuahkhirhna Dan hman tura duan chu nakum lamah Assembly Session-ah putluh tum a ni.

Mizoram Governor General (Dr) Vijay Kumar Singh chuan Digital Creator te chu Mizoram State mawi tak leh hnam ziarangte khawvel hmuh theiha pholanga auchhuahpuitu 'Cultural Ambassador' an nih thu a sawi.

Kum 2025-2027 chhunga YMA Kumpuan ‘Ruihhlo Do’ hawnna chu nizan hmasa khan neih niin Central YMA President R. Lalngheta chuan ruihhlo zuartute chu eizawnna dang lo ngaihtuah turin a chah.

West Phaileng khua chuan nimin khan an kum 100 tlinna, Centenary lawmna chu West Phaileng-a GSA Playground-ah hmangin he hun hi Bialtu MLA, Dr. R. Lalthangliana chuan khuallian niin a hmanpui a, Centenary lungphun hawngin Souvenir a tlangzarh nghal bawk. West Phaileng Centenary lawmna hunah hian Dr. R. Lalthangliana chuan an Bial chhungah khaw upa leh hlun tak tak a awm nual tih sawiin, “Kan pipute leh hranghlui te sulhnu hlu leh ropui tak takte kan chhuichhuah a, kan vawnthat a tul a. Kan seilenna hmun hian kan nun leh kan hunah nghawng a nei thin a. Chuvangin, kan seilenna ngaihlu ila, hmasawn zel turin mawhphurhna kan nei tih i hrethar ang u,” tiin kalkhawmte a fuih bawk.

AH&Vety Minister C. Lalsawivunga chuan Kalphung thar sawrkar chu mi taima tan dinchhuahna tur sawrkar a ni dawn tih a sawi.

Tourism Minister Lalnghinglova Hmar chuan nimin khan thuthar thehdarhtute kawmin tunhnaia an hmachhawp hrang hrang leh nakum lama hmalakna tura an ruahman te a tarlang.

Aizawl Chawnpui Veng-a ‘Chawnpui Sports Centre’ sak thar chu nimin khan UD&PA Minister K. Sapdanga chuan a hawng.

Mizoram Larsap, General (Dr) Vijay Kumar Singh chuan Aizawl Lok Bhavan-a nimin khan Assam leh Nagaland State-te dinchamphaphak 'Foundation Day' lawmna hun a buatsaih.

Lai Autonomous District Council (LADC) Inthlanpui neih zawh a nih hnuah Indian National Congress (INC) leh Zoram Peoples Movement (ZPM) ten Sawrkar intawm siam tumin hma an la mek.

State Council of Educational Research and Training (SCERT) Mizoram buatsaihin nimin khan Aizawl-a SCERT Auditorium-ah ‘Poetry Festival’ hman a ni a, he Festival hi kum 2011 atang khan kumtin hman niin kumin hi a vawi 14-na a ni a, School 11 atangin zirlai 60-ten poetry inziah-siakna an nei a ni. He intihsiakna ah hian a pumpui ah William Lalchhanchhuaha, Class XII (Arts), Helen Lowry HSS chu pakhatna niin Linzy Malsawmkimi, Class XI (Science), Mount Carmel HSS chu pahnihna a ni a, Lalmawizuali, Class XI (Science), St. Paul’s HSS chu pathumna a ni bawk.

Nimin khan Champhai-ah District Level Narco Coordination Centre (NCORD) Committee chuAddl. DC James Lalnithanga hova thukhawmin an hmalakna an thlirlet bakah an hmalak zel dan turte an sawiho a. He huna tarlan a nih danin November 2025 chhung khan Cham-phai District-ah Police ten Heroin gram 0.933 manin thubuai 9 ziahluh a ni a, Excise & Narcotics Department ten Heroin gram 11.5 manin Methamphetamine kg. 25.209 an man bawk a, thubuai 5 an ziaklut bawk a. Heng thubuai kaih-hnawih ah hian mi 21 man an awm bawk.

IndiGo Airline chuan tun thla ni 3 leh ni 5 inkara thlawhna thlawh dan mumal loh avanga tuartute hnenah zangnadawmna Rs. 10,000/- theuh a pe dawn a, zangnadawmna hi Travel voucher anga siamin, thla 12 chhungin IndiGo thlawhna an chuan leh hunah an hmang thei ang.

Aizawl District Legal Services Authority (ADLSA) chuan niminpiah khan Aizawl District Court-a District Judge Meeting Room-ah pawikhawihna tuartu mi 12 hnenah zangnadawmna an hlan a. Crime Victim Compensation semna inkhawm tawi hi Gauhati High Court Judge leh High Court Legal Services Committee Chairman Justice Marli Vankung chuan hmanpuiin mi pawikhawihna avanga zangnadawmna inhlanna hun hman a ngai thin chu pawi a tih thu a sawi a. Zangnadawmna chu a dawngtute’n nunphung pangngai an zawh leh theih nan leh intun nun nana dik taka hmang turin a chah a ni. He hunah hian mi kut tawrh avanga thi leh kumtling lo pawngsual tawk mi 12 hnenah zangnadawmna Rs. 52,80,000/- semchhuah a ni.

Nimin khan 2nd India Reserve Battalion (2nd IR Bn.) in kum 25 an tlinna, Silver Jubilee lawmna chu Khawzawl-a an Battalion Hqrs. ah neih a ni a, he hun hi Director General of Police Sharad Agarwal IPS chuan khuallian nia hmanpuiin 2nd IR Bn. in kum 25 an tling chu a lawmpui thu a sawi a, an inpekna leh an taimakna avangin Khaw-zawl, Champhai leh Saitual District mipui te chu him takin an nungin an khawsa thei tih sawiin, a hmaa hna an lo thawh that angin Commandant leh a hnuaia awm zawng zawngte chu taima tak leh inpe takin hna thawk chhunzawm zel turin a fuih bawk. He hunah hian 2nd IR Bn. Commandant KL. Vulmawia chuan inlawmna thu a sawi bakah 2nd RO C. Lalremruata'n 2nd IR Bn. chungchang leh din a nih atanga an hnathawh dan te a sawi bawk a ni.

Serchhip Bazar atanga Serchhip Hmar Veng kaltlanga Kikawn thleng pawh tur kawng thar siam tur chu nimin khan laih tlang niin kawng thar erawh siamthat ngai neuh neuh ala awm thung.

Serchhip District Cricket Association (SEDCA) ten an hruaitu boral, HD. Lalhmachhuana leh V. Lalnuntluanga te hriatrengna atana Cricket Tournament an buatsaih chu Serchhip Sports Complex-ah khelh mek a ni a, he Tournamwnt-ah hian Team 6 telin Vawiin hian Semi Final khelh tum a ni a, zing dar 9:30-ah AO3C leh Bawngchawm CC inhmachhawnin chawhnu dar 1:00 ah Tuikhuah CC leh Thenzawl CC te an inhma-chhawn ve leh bawk ang.

Govt. Zemabawk Higher Secondary School chuan nimin khan an kum 25 tlinna, Silver Jubilee lawmin Bialtu MLA leh Minister Lalthansanga chuan a hmanpui a, \halaiten kan taksa leh rilru kan vawn uluk a pawimawh thu sawiin, ruihhlo mai bakah zuk leh hmuama fihlim turin a chah bawk. He hunah hian School Principal Lalrinpuii chuan thu a sawi bakah Report ngaihthlak niin thawktu boral tawh te sunna hun hman a ni bawk.

FCS&CA Minister B. Lalchhanzova chuan Mizoram-a LPG Home Delivery kalpui mekah Aizawl Municipal Area bakah District Hqrs. zingah Serchhip, Hnahthial, Khawzawl leh Mamit Town-a te zaa za kalpui a nih tawh thu a sawi a, PMUY hnuaiah a thlawna LPG Connection dilna kalpui leh mek a nih thu a sawi bawk.

Mizoram State Commission for Protection of Child Rights (MSCPCR) chuan Aizawl Municipal Corporation (AMC) huamchhunga MBSE Recognized High School te Ranking puanchhuahna hun nimin khan an buatsaih.

Nimin khan Aizawl-a Mizoram Assembly House Conference Hall-ah ‘Transformed Mizoram Vision 2047 Roadmap Workshop’ neih a ni a, he hunah hian Chief Minister Lalduhoma leh sawrkar mi pawimawh dangte an tel a ni.

Mizoram State Rural Livelihood Mission (MzSRLM) leh SELCO Foundation te thawhhona hnuaia hmalakna peng pakhat atan nimin khan Rural Development & Administration Minister Prof. Lalnilawma chuan Solar Sprayer a sem.

AH&Vety Minister C. Lalsawivunga chuan nimin khan Champhai District chhung Khuangleng khuaa Ar vulhtu hlawhtling chho mek John Lalrinchhana chu a hnathawhna, Khuangleng-ah tlawhin, Mizoram sawrkar Flagship Programme - Bana Kaih tihhlawhtlin tum leh intodelh tuma theihtawp a chhuahna chu lawmawm a tih thu sawiin, a department chan atanga tanpuina awm thei ang angte pek a tiam a, sawrkarin dawmkan a tum thu a sawi bawk. AH&Vety Minister chuan Intodelh chu an thupui leh innghahna a ni tih sawiin, “Chumi tihlawhtling tur chuan Handholding Policy leh kawng hrang hrangin sawrkar department tinin hma a la mek reng a ni. AH & Vety Department pawhin theihtawp kan chhuah a, Pu John Lalrinchhana'n intodelh mai ni lo, tam tak thawnchhuak thei hial tur khawpa a beihna hi a ropui ka ti. Helai hmun hi sawrkar chuan kan ngai pawimawh em em a, Ar vulh mai ni lovin a bul maiah hian Sawhthing sawngbawlna (Ginger Processing Plant) siam tura kalpui mek zel a ni a, kum 2026 January-ah chuan ...

Mizoram Rajya Sabha MP K. Vanlalvena chuan Mizo mipuite zinga Income Tax Certificate phutna thuchhuah awm thin chu dan lova Mizo mipuite tihbuaina a nih thu a sawi.

PC Party chuan kumin atan Aizawl-a an party Office chu nimin khan kharin nakum January 15-ah an hawng leh ang.

Lawngtlai District Election Officer (DEO) Donny Lalruatsanga chuan nimin khan a Pisa-ah thuthar thehdarhtute kawmin Lai Autonomous District Council (LADC)-a MDC thlanna tluang taka neih a nih chungchangah thawktute zawng zawng chungah lawmthu a sawi a, Model Code of Conduct (MCC) tha tak a kalpui a nih thu sawiin, Political Party ten thu an awih thu a sawi a. Thuthar thehdarhtuten theihtawp an chhuahna fakawm a tih thu tarlangin, chanchin thar thehdarh kawnga an inpekna ah lawmthu a sawi a. LADC mipuiten inthlanna ngaipawimawh a tha taka vote an thlakna ah lawmthu a sawi bawk.

Krismas leh Kumthar vuakvet lo thleng turah kum danga lo tih thin tawh angin Lirthei tlan phal lohna hun leh hmun, 'No Vehicle Zone' siam a ni leh dawn.

Lunglei District Police Cyber Cell te hmalaknaa CEIR Portal hmanga Mobile Phone bo/ruk an hmuhlet Mobile Phone 24 te chu niminpiah khan a neitute hnenah hlan let niin Rs. 3,53,174/- man zet a ni. Heng Mobile Phone hlanletna ah hian Lunglei Addl. SP K. Beihmotaosa chuan Mizoram chhung leh pawnah Mobile Phone bo leh ruk bo a tam tih sawiin, Lunglei Cyber Cell chuan Report an dawn tawh phawt chu CEIR Portal kaltlangin a tam thei ang ber chhuichhuah sak zel an tum tih a sawi a. Phone bo zawn chu thil hautak leh awlai lo tak a nih thu sawiin, a hlawhtlinna pawh CEIR Portal tangkai leh awmze nei taka hman thin vang leh Cyber Cell staff-te thawhrimna vang a nih thu a sawi a. Mobile phone hlui (secondhand) leitute pawh fimkhur a ngaih thu a sawi bawk. Lunglei Police Cyber Cell hian July ni 11, 2024-a din a nih atanga tun thlengin CEIR Portal kaltlangin mobile phone bo leh ruk bo 194 an hmuh letsak tawh a ni.

India rama sawrkar damdawi In tha bik tehna, National Quality Assurance Standards (NQAS)-ah Mizoram-a HWC-Primary Health Centre pathum – South Lungpher PHC, Bungtlang South PHC leh Tipa PHC te chu an tling thar a, South Lungpher PHC hian 86.10% hmuin Bungtlang South PHC hian 87.86% leh Tipa PHC in 90.90% an hmu a ni. Heti hian Mizoram chhunga HWC-PHC 57 target awm zinga 43-in National-Level NQAS Certificate an nei tawh a. Tun dinhmun ah Sawrkar damdawi In 57 te’n NQAS National-Level Certificate nei mekin sawrkar damdawi In 16 leh HWC Sub-Centre 31 ten National-Level Assessment an dil leh mek a ni.

Administrative Training Institute (ATI), Aizawl leh Mizoram State Legal Services Authority (MSLSA) tangkawp buatsaihin nimin khan Lunglei Convention Centre-ah awrkar hnathawkte tan dan hriatna lama intuai tharna, ‘Special Awareness Campaign on Legal Provisions & Matters for Government Officials of Mizoram’ buatsaih a ni a, sawrkar hnathawkte tana Dan hriatna lama intuaihriamna hun hi Mizoram District hrang hrangah buatsaih tum niin Sawrkar hnathawkte tan dan hriat leh dan zawm a tulzia inzirtir nan te, dan hriat loh leh zawm loh avanga harsatna thleng thin pumpelh nan te, dan hriat loh avanga sawrkar sum leh tha luangral thin ven nan leh sawrkar hnathawkte thinlung leh nungchanga dan zawm duhna a beh tlat theih nan he hun hi buatsaih a ni.

Lawngtlai District-a Chamdurtlang-I khua Village Council chuan kumin a Buh thar tam te chawimawina hun nimin khan buatsaihin Lawngtlai DAO Lalremmawia Colney chuan khuallian niin a hmanpui a, Buh thar tam chawi-mawi chu inelna thianghlim a nih bakah Intodelh tura midang zirtirna tha tak a nih thu a sawi bawk. He hunah hian buh Tin 600 thartu Liansailova, Tin 450 thartu Zorammawia leh Tin 350 thartu Lalvohbika te hnenah chawimawina hlan a ni.

Durtlang Leitan Branch YMA chuan nizan hmasa khan an kum 39 tlin lawmna hun hmangin he hun hi Aizawl North-I Bialtu MLA leh Minister Vanlalhlana chuan a hmanpui a, Durtlang Leitan Branch YMA in an din champhaphak vawi 39-na an thleng thei chu a lawmpui thu sawiin, YMA chu pawl ropui tak a nih thu a sawi a, Hlawhtlinna thuruk chu taimakna, beih hram hramna, hun vawn dik leh mahni fel taka invawn te a nih thu sawiin, kalkhawmte chu a fuih bawk a ni.

Kumthar January thla khian Serchhip District-ah chhiatrupna lo thlen thulha chhanchhuah leh chhawmdawlna hna thawh dan a tak anga zirhona neih leh a ni dawn a, tun tumah hian leimin avanga chhiatna thlenga chhanchhuahna hna thawh dan pawh zir tum a ni bawk.

Serchhip District Magistrate chuan Serchhip District chhung khawlai a Ui chhuah zalen khapna thupek a tihchhuak thar leh.

Serchhip District Pik-Up Owners’ Association te chuan nimin khan CMS Pincic Spot-ah General Assembly vawi 25-na an hmang a, an pawl inrelbawlna hrang hrang relin kum 2026-a an pawl President atan F. Laldawta (Dinthar Veng); Vice President-ah J. Lalthuamliana (Dinthar Veng); Secretary-ah K. Lalpekhlua (Dinthar Veng); Asst. Secretary-ah C. Lalneihkima (Field Road), Treasurer-ah K. Rodinga (New Serchhip) leh Fin. Secretary-ah Laltlanmawia (Bazar Veng) te thlan an ni.

Mizoram sawrkarin damlote chhawmdawlna atana Healthcare Scheme a duan, Mizoram Universal Healthcare Scheme (MUHCS) hmangin damlo 55,483 enkawlna senso pek a ni tawh a; MUHCS kalpuitu damdawi On hrang hrangte hnenah sawrkarin damlo an enkawlna bill atan cheng vbc. 86.65 a pe tawh a ni.

Mizoram sawrkarin khualkhuaa thite ruang phurh man a tum sakna, 'Assistance for Transportation of Bodies of Deceased Persons within Mizoram' kaltlangin ruang 1,613 phurhna man cheng nuai 167.81 pek a ni tawh.

Mizoram sawrkar Rural Development & Administration (RD&A) Department hnuaia Mizoram State Rural Livelihoods Mission (MzSRLM) huaihawtin nimin khan Lunglei Saikuti Hall-ah Regional SARAS (Sale of Articles of Rural Artisans Society) Fair vawi 12-na neih tan a ni a, RD&A Minister Prof. Lalnilawma chuan hawngin tualchhung thil tharchhuah leh siamchhuah te inhlutsak a pawimawh thu a sawi a, eizawnna insiamsakna leh inchawikan tawnna a nih avangin an mamawh zawng a nih chuan an thil zawrhte leisak zel turin mipuite chu a chah bawk a ni.

Public Health Engineering Department (PHED) Minister Prof. Lalnilawma chuan nimin khan Lunglei khawpui tuilakna, Greater Lunglei Water Supply Scheme (GLWSS) hmun Pialthleng leh Tlawng lui tlawhin Lunglei khawpuiin tui hnianghnar zawk a hmuh theih nana AMRUT 2.0 leh SASCI hnuaia GLWSS tihchangtlun hna thawh mek a enfiah a, PHE Minister chuan hna tha tak leh chak taka kalpui a nih theih nan Department lam pawhin theihtawp an chhuah thu leh Contractor-te pawh a tul anga an nawr reng thu a sawi bawk. Greater Lunglei Water Supply Scheme hi November ni 22, 1995-ah hman tan niin tunah hian kum 30-a upa a ni tawh a, SASCI hnuaiah hian cheng vbc. 55.7 sengin hmalakna kalpui mek a nih bakah AMRUT 2.0 hnuaiah cheng vbc. 9.9778 sengin hmalak mek a ni bawk.

Lai Autonomous District Council (LADC) Inthlanpui vawi 12-na a Vote tla te chu nimin khan tluang taka chhiar niin MDC Seat 25 awm-ah Party mal-a sawrkar siam thei khawpa chak an awm lo a, MNF Party chu Party mal-a Seat la tam ber an ni bawk.

Mizoram State Project Monitoring Committee (MSPMC) chuan nimin khan General Body Meeting vawi 7-na neiin kumin chhunga Project an endik 40 te report an thlirho a, Project thar thawh tur DPR-ah ‘Life Cycle Costing’ chipchiar tak telh thin rawtna chu Pilot Project anga kalpui chhin an rel bawk.

Aizawl Smart City Ltd. (ASCL) hmalaknaa MINECO hmuna ‘Aizawl Sumtual’ siam chu Urban Development & Poverty Alleviation (UD&PA) Department changtu Minister K. Sapdanga chuan niminpiah khan a hawng a, nimin khan Aizawl Zonuam Veng-a ‘Multi-purpose Community Centre’ leh Zodin Square-a ‘Aizawl Dawh-Rem’ chu a hawng bawk.

Art & Culture Minister C. Lalsawivunga chuan Mizote ngeiin Mizo history an zirchian-a an ziah ve tul an tih thu sawiin, Mizo tobul chhui tura hmalak mek a nih thu a sawi bawk.

Mizoram Presbyterian Kohhran-a Rorelna sang ber, Synod Inkhawmpui chu nimin khan neih tan niin Pathianni thleng khi a awh ang.

School Education Department buatsaih Mizoram Secondary School Games vawi 42-na chu nimin khan Aizawl khawpui chhung hmun hrang hrangah neih tan a ni a, tun tum Secondary School Games-ah hian Sports Discipline hrang hrang 6- Athletics, Football, Volleyball, Taekwondo, Inkawibah, Kalchhet leh Inhruipawh-ah te zirlaite an inel dawn a, discipline hrang hrang hi hmun  hrang hrangah nghah a ni a, District hrang hrang 11 atangin zirlai leh zirtirtu 1900 vel an tel a, ruahman lawk ang chuan tunkar Zirtawpni ah zawhfel tur a ni ang.

Mamit-a District Sericulture Office chuan nimin khan Samagra-2 hnuaia Augmentation of Muga Culture in Mizoram, Mamit Circle-a Pangang khawitu mi 13 te hnenah Portable Lighting System an semchhuak a, he hun hi District Sericulture Officer Lalbiakhlua Ralte chuan a kaihruai a, he hunah hian bungraw sem hmandan inzirtirna neih nghal a ni bawk.

Mizoram State Policy Coordination Committee chu nimin khan Planning & Programme Implementation Department Committee Room-ah Adviser to CM (Implementation of Handholding Policy) Dr. K.C. Lalmalsawmzauva kaihhruaiin an thukhawm a, Bana kaih hnuaia progress partner-te hmalaknate leh an hlawhtlinna success story phochhuahna tur siam leh thehdarh dan tur te, rang zawka progress partner-ten loan an hmuh theih nana Bank tam zawk nena thawhho dan tur te, Progress partner loan la hmu lo ten loan an hmuh loh chhan leh an hmuh vat theih dan turte, thil tharchhuah lei leh hralh chungchang te leh thil pawimawh dangte ngaihtuah ho a ni.

Chief Minister Lalduhoma chuan nimin khan a Pisa-ah Ministry of Finance hnuaia Department of Expenditure-a Secretary Vumlunmang Vualnam IAS chu kawmin thingpui a inpui a, Chief Minister hian tunhnaia Mizoram sawrkar in Central sawrkar-a SASCI Project thar a thehluh chungchang te, sawrkar sum leh pai enkawl chungchang te, Public Financial Management System (PFMS) chungchang te leh sawrkar sum leh pai chungchang thil pawi-mawh tak takte a sawipui a. Commissioner & Secretary to CM Vanlaldina Fanai chuan a tawiawm a ni.

Mizoram Legislative Assembly-a Committee on Petitions chuan New Delhi-a Lok Sabha Secretariat-ah nimin atang khan Committee hna thawh dan leh kalphung hrang hrangte zirchianna hun an hmang a, Vawiin hian chhunzawm leh a ni ang. He zirchianna hun hi Parliamentary Research and Training Institute for Democracies, Lok Sabha Secretariat buatsaih niin Committee on Petitions aiawhin Chairman T. Lalhlimpuia bakah Member pahnih H. Lalzirliana leh Prova Chakma-te an kal a, Mizoram Legislative Assembly Secretariat Officer leh staff ten an tawiawm bawk a ni.

Kum 2025 Krismas leh kumthar 2026 vuakvet-ah Serchhip District-ah halpuah leh halmawi khapna thupek chu tihchhuah a ni.

Sipai bang pawl, Ex-Servicemen League, Serchhip te chuan Inrinni, Sept. 6, 2025 khan Hmar Veng YMA Hall-ah General Assembly neiin hruaitu thlanna an nei a, President-ah Hony Capt. R Lalhmingthanga; Vice President-ah Nk. Lal-nunnema; Secretary-ah Nk. Chawnthanga; Asst. Secretary-ah Sepoy Anthony Lalnghilhlova; Treasurer-ah Hav. Lalhmuakliana leh Fin. Secretary-ah Hav. Lalhnuna te thlan an ni a. Rorelna hun an hman ah an pawl inkaihhruaina Dan te an ennawn bawk.

Kumin chhungin Mizoram-ah COVID-19 hri kai mi 40 hmuhchhuah ni tawhin hri kai hmuh te hi an vaiin enkawl dam an ni tawh a, kumin a COVID-19 hri kai hmuhchhuah hnuhnung ber chu September 16 khan hmuhchhuah niin September 22-ah enkawl dam a ni bawk. Kumin-a Mizoram-a COVID-19 hri kai hmuhchhuah te hi hri kai langchhuak lo vek an ni a, na taka damloh pui pawh an awm lem lo nia thudawn a ni.

Zoram Medical College & Hospital (ZMC& H)-a Post-Graduate (Specialist) zirna Seat 10 chu State quota leh All India quota in seat awm zatve ve ve-a insem a ni.

ZPM kaihhruai Mizoram sawrkar chuan nimin, December 8, 2025 khan kum hnih tlingin hemi denchhen hian I&PR Minister B. Lalchhanzova leh ZPM Media-a General Secretary KJ. Lalbiakngheta te chuan thuthar thehdarhtute kawmin an hmalakna hrang hrang an tarlang.

Chief Minister Lalduhoma chuan an sawrkar tirh phat atanga an hmalakna langsar zinga mi chu ruihhlo leh Kuhva tawlhruk titawp tura hmalak a ni tih sawiin, Mizoram sawrkar chuan Kuhva huan tihzauh zel a thlawp thu a sawi bawk.

Union Defence Minister Rajnath Singh chuan Pathianni khan Border Roads Organisation (BRO) hnuaia infrastructure Project 125 hawngin heng zingah hian Project Pushpak, Aizawl hnuaia hnathawh pathum a tel a ni.

Kumin April thla atanga hman, Mizoram Universal Health Care Scheme (MUHCS)-ah Mizoram-a mimal damdawi In tam zawkte chu tun thlengin an la tel lo a, an dinna ngaiah an la ding tih Non-Government Hospital Association, Mizoram (NGHAM) hruaitute chuan sawiin, tun dinhmunah chuan zawm leh zawm loh chung-changah thuthar an nei lo tih an sawi a, “MUHCS chungchanga rawtna kan neihte leh kan zawm theihna tur sawrkara kan thehluh chu tun thlengin sawrkar atangin a chhanna kan la dawng lo,” an ti.

Home Minister K. Sapdanga chuan leibaa innghah nasat lutukna atanga kan talchhuah theih dan tur te ngaihtuah a, sum hnâr tha zawk hmuchhuak thei tura ngaihtuahna seng turin MFAS Officer rual te a chah.

Chief Minister Lalduhoma chuan nimin khan Chuhvel Rubber chingtute Zau panna kawng hawngin, Land Resources, Soil & Water Conservation Department changtu Minister Lalthansanga leh sawrkar mi pawimawh dangte pawhin an hmanpui a ni.

Mizoram-a Bawng lakluhna lian ber, Cham-phai District-a Bawng vang chuan ziaawm lam a pan nia hriat a ni a, Hunpui laiin Bawng mamawh ang hmuh loh a hlauhthawnawm loh niin Bawng zuartute chuan an sawi.

MNF Party chuan nimin khan Aizawl Mizo Hnam Run chhung Inkhawm neiin he hunah hian MNF NCC Tawnluia chuan MNF leh India sawrkar ten Remna thuthlung bung leh chang duanna ah Lalduhoma a tel ve lo nia sawiin, “A tel zawk chu Mizoram Governor-a kum 3 lo awm tawh Pu Swaraj Kaushal (L) zawk a ni,” a ti a. “Mizoram Governor hlui Pu Swaraj Kaushal kha Pu Laldenga ngaisangtu tak niin, India sawrkar nen kan inbiaknaah dan (legal) anga nasa tak a min puitu leh Legal Adviser niin kum 1984 November thlaah inbiakna kan tan,” a ti bawk.

MPCC Spokesperson leh General Secretary Dr. Lallianchhunga kum 2028-a ZPM sawrkar thlak turin mipuiten MNF aiin Congress an duh zawk niin a sawi.

Mizoram State Cooperative Marketing & Consumers’ Federation Limited (MIZOFED) leh National Co-operative Exports Limited (NCEL) te chuan nimin khan Cooperation Minister PC. Vanlalruata Pisa-ah thawhdunna thuthlung an ziak a, he thawhdunna thuthlung ah hian MIZOFED aiawhin Managing Director Lalhruaitluanga leh NCEL aiawhin Managing Director Unupom Kausik te chuan an hming an ziak a ni. He thawhdunna hian thlai tharchhuah thawhchhuah kawnga hma-sawnna a thlen beisei a ni a, tualchhunga kutthemthiamte thil siamchhuah pawh a hralhna tur tha zawk siam sak an nih theih nan hmalak a ni ang. He thawhdunna kaltlang hian MIZOFED chuan tualchhunga kuthnathawktute tharchhuah leh siamchhuah chu an endik anga, NCEL hian ramchhung hmundanga thawnchhuah dan tur a ruahman thung dawn a ni.

Lunglei Police ten kumin chhunga Heroin No. 4 an man thenkhat chu Lunglei Judicial Magistrate First Class-I in phalna a pek angin nimin khan Lunglei AP Tlang-a Incinerator Centre-ah Lunglei District Disposal Committee (DCC) chuan an halral a, heng Heroin an halral tak te hi a vaiin gram 176.15 niin Rs. 5,28,810/- man a ni a, heng te hi Police ten tum thum-a an man leh thubuai an ziahluh te a ni.