Naupang kut inthlakna thleng ah rorelna dik an hmuh theih nan hmalak zel an tum

Tunhnaia Social Media hrang hranga Mizo Hmeichhe naupang kum tling lo kut inthlakna darha kut tuartu hmeichhe naupang chhungte chuan he thil thleng ah hian dikna in ro rel se an duh thu sawiin, hetiang thil hi Mizoram-ah thleng nawn tawh lo se an duh thu an sawi bawk.
Nimin khan Serchhip Press Club-ah he thil thlenga kut tuartu hmeichhe naupang chhungte chuan thuthar thehdarhtute kawmin naupang kut inthlakna Video a darh chu pawi an tih thu leh an chhungkua pawhin hrehawm an tih thu sawiin, kut tuartu an fanu khawngaiha lainattu Mizo mipuite chungah an lawm thu leh an thla a ti muang tih an sawi a, “Kan fanu tana min tawngtaisak tute zawng zawng chungah lawmthu kan sawi,” an ti. He thil thleng hi naupang engmah hre lo thil tih satliah mai mai angin lang mahse, sualna thuk takah an ngai tih sawiin, “Dan in hremna pe ngei se tih hi kan duhdan a ni. Hemi chungchangah CWC leh Serchhip Police lam ten theihtawp chhuaha thilsual titu manchhuah kawnga hma an lak vatna hi kan lawm em em a, lawmthu kan sawi a. MHIP Sub-Hqrs. Serchhip pawhin he thil thleng an demna te hian kan thla a timuang hle,” an ti bawk.

Thuthar thehdarhtute an kawmna ah hian kut tuartu chhungte chuan, an chenna Veng atanga hmun fianrial, KM khat dawn laia hlaa hruai fal a, nikhaw hre lova siam a ni leh darkar 3 lai diriam taka an sawisa chu na an tih thu sawiin, “A rulhlet nan engmah man kan ti lo,” an ti a. “Kan fanu hi a fel lo tih kan hria, mahse heti taka sawisak a nikhaw hre lo em em a insiam nan chuan thu tling kan hmu lo a, kan na takzet a ni,” an ti. He thil thleng hian Mizo mipui rilru a ti na nia an hriat thu leh a titu hi kum tling lo a ni tih pawh an hriat thu sawiin, “Dan anga hremna pek ngei hi kan duh a, kan phut tlat a ni,” an ti a. “Hetiang em em a nunrawnna thil tih hi, tun hnuah tu chungah mah a thlen tawh loh nan leh a sim ngei theih nan kutthlaktu chungah hian rorelna dik tak hlen chhuah ngei ni rawh se,” an ti bawk.

He thil thleng ah hian sawrkar lama thawktute, Child Welfare Committee (CWC) leh Juvenile Justice Board (JJB) ten an tih tur ang te rang taka an ti mek pawh lawmawm an tih thu he hunah hian sawiin, “Rorelna dik kan hmuh theih nan hmalak zel kan tum a. Hemi kawngah hian Mizoram mipui leh NGO hrang hrangte min tawiawmna kan ngen a, rilru lam thlenga harsatna pawh a awm theih avangin khawngaih taka Mizoram mipuiten min tawngtaipui zui zel turin keini chhungkua chuan kan ngen in kan sawm tak meuh meuh che u a ni,” tiin hetiang thil hi mi hriat loh a thleng thei a nih avangin hetiang thil a thlen tawh lohna turin inzirtir a tul thu leh Mizoram mipui, Khawtlang, NGO leh Kohhran te pawh kan tanrual a tul thu an sawi a. “He thil thleng hi a tawpna nise kan duh tak meuh a ni,” an ti bawk.