Leivung paih avanga Zawlpui Phai-a harsatna Assembly House-ah sawichhuah a ni

Serchhip bialtu MLA Lalduhoma chuan nimin-a Mizoram Legislative Assembly thutkhawm ah NHIDCL in National Highway 54 an laihna leivung-in Serchhip Zawlpui Phai-a harsatna a thlen sawichhuakin, Chief Minister Zoramthanga chuan he harsatna hi sawrkar in enzuiin hma a la dawn tih a sawi.

Nimin-a Mizoram Legislative Assembly thutkhawm-a zawhna leh chhanna hun hman zawh a nih hnuah Serchhip bialtu MLA hian Calling Attention Motion hun hmang-in NHIDCL in National Highway 54 an laihna leivung-in Serchhip Zawlpui Phai-a leilet neitute tana harsatna a thlen chungchang hi a sawichhuak a, Serchhip bialtu MLA chuan National Highway laih zauh hna thawh mek a hnathawk tuten leivung an paihna, Spoil Bank siam ve bawk mah se, a dawlna an siam uluk lo a, Fur a lo thlenga Sabereka Khuangkaih siamtu a ni ta zawk tih a sawi a. Ruahsur in leivung a rawn len thlak chuan tui lakna kawng te, leilet leh Sangha Dil te pawh a hnawh a, buh phun theih loha ram a tihchhiah bakah buhphun sa tihchhiat engemawzat nei bawk tih a sawi. Serchhip bialtu MLA chuan, heng chirh inchhek khawlte hi JCB in hai fai bawk thin mah se, ruah a surin a hnawh leh zel avangin leilet neituten harsatna an tawk nasa hle tih sawiin, amah ngei pawhin a hmunah a tlawh tawh thu leh Agriculture Minister pawhin a hmunah tlawhin, sawrkar atangin thlamuanna awka dawn an in beisei thu leh Chief Minister Chairman-na hnuaia din, Road & Infustructure Board in a hmunah ngei enpui se a duh thu a sawi a. He harsatna hi kuminah mai ni lo, kum lo kal zel turah pawh harsatna a thleng zel dawn ni-a a lan avangin Mizoram hmun hrang hranga kawng laihnaah leivung paihna, Spoil Bank tha tawk siam tir tura hmalak a tul thu leh a tuartuten chhawmdawlna an hmuh theih nan leh harsatna thleng lehzel tur ven a nih theih nan Mizoram Sawrkar chu chak taka hmala turin a ngen bawk a ni.

Hemi chungchang hi Agriculture changtu Minister C. Lalrinsanga chuan Member te hmaa sawi zuiin National Highway 54 laihzauh hna thawh mekah Serchhip leh Keitum inkar kawng laih meka leivung paih in harsatna a thlenna hmun hi kumin July 5 khan a hmun ngeiah a lo tlawh tawh thu leh Lumtui hnar-a leivung in chhek enfiahin hmalak dan tur pawh Leilet neitute nen an sawiho thu leh Zawlpui te pawh enfiah a nih thu a sawi a. He harsatna sukiang tur hian Department in theihtawp a chhuah dan sawiin, leivung in a hnawh tuikawng te thenfaina turin Department in cheng nuai khat chu heng Zau hruaitute hnenah hian pein Department atanga Scheme hrang hrang atangin chhawmdawlna awm thei ang ang dap mek a nih thu a sawi bawk.

Agriculture Minister chuan tun dinhmuna report an dawn danin Lumtui Zau-ah chhungkaw 13 bakah Zawlpui Zau-ah chhungkaw 16 ten harsatna tawkin, Chirhdiak avanga Leilet siam theilo chhung-kaw 6 an awm thu a sawi a, Fur ruahtui tlak lai anih avangin report te hi a la danglam theih tih pawh sawiin, “Hmasawnna hna thawh avanga Serchhip-a leilet neituten harsatna an tawk hi Sawrkar in a hriatpui a, en liam mai a tumlo,” tiin Company lam atanga zangnadawmna hmuh ngei theihna turin hma lak sak an tum thu a sawi bawk.

Chief Minister Zoramthanga pawhin Leilet neitute harsatna chungchang hi House-ah sawiin, hmasawnna hnathawh chuan a man pek ngai mahse hetiang a leilet tichhe vek khawp leh leilet tui kawng tichhe khawp a awm chu a pawi zual tih sawiin, kan economy a su chhe zual tih a sawi a. Sawrkar in enzui in kawngpui laih zauh hna thawh meka leivung paih avanga harsatna tawk ten zangnadawmna an hmuh theih nan Central Sawrkar a thlen tha a tih thu leh sawrkar in hma an lak tur thu sawiin, uluk taka ngaihtuahin a thlalak te nen lakhawm in zangnadawmna an hmuh theih nan leh tihtawp a nih theih nan sawrkar in hma a lak tur thu he hunah hian a sawi bawk a ni.