MZU Southern Campus-ah thawktu lak rem la ti lo

Higher & Technical Education Minister Dr. R Lalthangliana'n Lunglei-a MZU Southern Campus din turah Union Finance Ministry-in thawktu lak remtihna a la pek theih loh avangin tihfel theih a la ni rih lo tih a sawi.

Nimin-a Assembly thutkhawma Zawhna leh zawh belhna dangte a chhanaah H&TE Minister hian, Lunglei-a MZU Southern Campus din turin hun engemaw chen atanga hmalak a nih thu a sawi a, thuneihna an chan hnu kum 2020 khan sorkar laipui Union Human Resource Development Ministry-in din phalna a rawn pe a, a hmun tur pawh ram pek fel vek tawh a ni a, hei hi MZU lamin sawrkar laipui ah an thlen tawh a. Mamawh hrang hrang tihhlawhtlinna tur DPR siam niin, MZU Southern Campus-ah hian Deptt. 13 awm tura ruahman a nih thu leh thawktu Teaching leh Non-Teaching Staff bakah building sakna tur sawrkar laipuiah dil a ni a, a thlawhtlinna erawh ala awm thei rih lo tih a sawi. Dr. R. Lalthangliana chuan kumin kumtir lama an thu hriat hnunung berah chuan HRD Ministry in hnathawktu lak phalsak tura an dilna chu Finance Ministy lamin an la remtih lo tih sawiin, HRD Minstry chuan Campus ruhrel dinna turah erawh boruak tha zawnga thu an lo sawi hmuh thu a sawi bawk.