ECI in venhimna uluk dawn

Election Commission of India-a Chief Election Commissioner (CEC) Rajiv Kumar chuan Mizoram Assembly inthlanpui neih turah International leh Inter-State ramriah khauh taka duty a ni dawn tih nimin-a thuthar thehdarhtute a kawmna ah sawiin, “Zu, drugs leh pawisa ramri kaltlanga a luh lohna atan kan strict dawn hle,” tiin ruihhlo tawlhruka a hnarkaitu lam pawh man chhuah tuma theihtawp chhuah a nih dawn thu a sawi a. Campaign chungchang ah Social Media pawh uluk taka vil a ni dawn tih sawiin, “Media Ccell din a ni anga, anni hian Social Media thu post-te uluk takin an vil dawn. Dan bawhchhiate chungah chuan dan anga an chunga action lak a nih theihna atan hmalak zel a ni ang,” a ti bawk.

He huna tarlan a nih danin Mizoram-ah Polling Station 1,276 awmin mi 657 in Polling Station pakhat intawm ang zel a ni a. Polling Station 95 chu hmeichhe hlangin an enkawl tur niin 40 chu kum lama naupang zawk hlangin an enkawl tur a ni thung. Polling station awmna khua 22 chu lirthei hmanga kal theih loh a ni.