Ramri hnaih District pahnih hotu te an inkawm

Cachar (Assam) leh Kolasib (Mizoram) District-a sawrkar thuneitute chu ramri a ralmuanna a awm chhunzawm theih nana thawhho dan tur relin nimin khan Dholai Police Station Conference Hall-ah an thukhawm.

He thutkhawm ah hian District pahnih-a DC leh SP bakah DFO, DIPRO leh sawrkar mi pawimawh dangte an tel a. Kolasib DC John LT. Sanga chuan Kolasib leh Cachar District chu ramri thui tak intawm an nih angin a tul apianga inpuitawn tur leh boruak muanawm siam tur a thawhhona tha a awm a pawimawh thu a sawi a, thutkhawmna hmasa a thil lo rel tawh bawhzuina hrang hrang a tarlang bawk.

Thutkhawm ah hian ramri ah zin mi ten harsatna an tawh loh nan ramri a sipai leh Police duty-te chu a tul anga tihtlem hret hret a pawimawh thu te, ramri kan-a ruihhlo leh dan lova ramsa tawlh awm thin veng tura thawhho dan tur te, ramri a State pahnih Forest Department mi leh sa ten hmalak an tum apiangin harsatna a thlen loh nan inhrilhhriat hmasak thin a pawimawh thu te sawi a ni a. Mizoram MLA inthlanpui nei tur a inbuatsaihna kal mek ah Cachar District thuneitute chuan a tul apiang a puih an inpeih reng thu sawiin, tunhnai a Assam registration number nei Alto motor thahnem tak Kolasib paltlang a Mizoram lo lut thin chungchang pawh sawi a ni.