Forest Conservation (Amendment) Act, 2023 dodalna Official Resolution Assembly House-ah pawm a ni

Nimin-a Mizoram Legislative Assembly thukhawm chuan Forest Conservation (Amendment) Act, 2023 dodalna Resolution an pawm a, he Resolution puluttu EF&CC Minister TJ. Lalnuntluanga chuan he Dan siamthat dodal tura Mizoram sawrkar hmalakna hrang hrangte a tarlang a ni.

Nimin-a Assembly thutkhawm ah Environment, Forest & Climate Change Minister TJ. Lalnuntluanga chuan Forest Conservation (Amendment) Act, 2023 dodalna Official Resolution hi a pulut a, Forest Minister chuan ramngaw leh nungcha te hi keini, mihring te tel lo hian an dam khawchhuak thei tih sawiin, keini, a mihring zawka te hi an tel lo hian kan damkhawchhuak thei lo niin a sawi a. Kan lei (earth) mihring te chenna tlaka vawnghimtu chu ramngaw leh a chhunga cheng nungchate an nih thu pawh sawiin, “Kan ramngaw leh nungcha te kan tih chereu nasat tawh em avangin ramngaw la awmchhun te hi khauh deuh taka kan humhalh loh chuan he khawvel hi thangthar lo awm zel turte tan chenna tlak loh ah kan chhuah mai dawn tih hriain ramngaw humhalhna dan tha tak mai, Forest Conservation Act 1980 chu India rampuma hman turin kum 1980 khan siam a lo ni ta,” a ti a. He Dan hnuaiah hian Section pahnih pawimawh tak a awm thu pawh sawiin, ramngaw thiah emaw, thildang atana ramngaw hman chungchang ah State in eng Dan pawh lo nei tawh mah se Central sawrkar a phalna lak a tul thu leh khuahkhirhna te siam a nih thu a sawi a ni.

EF&CC Minister chuan he Dan hi siam danglam duhna a lo awm tak thu sawiin, hemi chungchangah Ministry of Environment, Forest & Climate Change, Govt. India chuan Oct. 2, 2021 khan Mizoram sawrkar-a EF&CC hnenah Forest Conservation Act, 1980 Amendment chungchanga Consulatation Paper an siam chu Oct. 21, 2021 hmaa State sawrkar atanga ngaihdan thehlut tura a tih thu leh ni 15 chhung hun pek a nih thu a sawi a. Hemi chungchangah hian Mizoram sawrkar chuan Oct. 14, 2021-ah Senior Officers Meeting neiin Consultation Paper chu uluk taka zirho a nih hnuah Comment chipchiar taka siamin Oct. 21-ah lehkha hmangin Ministry-ah thehluh a nih thu a sawi a. Hetah hian Forest Conservation Act, 1980 tih dal leh tih chakloh tumna lam hawi reng reng rawtna chu an pawm loh thu hrilh a nih thu leh an hmalakna dang te a tarlang bawk.

Minister TJ. Lalnuntluanga chuan he Dan siamthatna hi Lok Sabha leh Rajya Sabha-ah pass a nih tawh thu sawiin, Gazette-ah August 4, 2023 khan tihchhuah a nih thu a sawi a. “Mizoram a kan ram humhlahna tur leh thing leh Mau chereu mai tur humhalhna tur atan hian, lehkha leh thil dang tam takin a tir atanga hma kan laknain awmzia a neih tak loh avangin Mizoram a rorelna sang ber House ah a dodalna kan pulut a ni,” tiin he Resolution hi sawiho a nih hnuah Vote la in Assembly House chuan a pawm a ni.

Comments

Popular News (Last 30 Days)

LPG man bithliah thar