Bairabi Civil Sub-Division thar CM in a hawng

Kolasib District chhunga Bairabi Civil Sub-Division thar chu nimin khan Chief Minister Zoramthanga chuan a hawng.

Bairabi SDO (Civil) Office Building thar leh Civil-Sub Division thar lungphun chu Chief Minister hian hawngin hemi hnua a lawmna inkhawm NF Railway Platform a neih ah Chief Minister chuan hun rei tak an lo beisei tawh Civil SDO an neih tak avangin Bairabi mipuite a lawmpui thu sawiin, “Kan sawrkar hian hmasawnna hnaah pawh inrelbawlna lamah pawh kan ramin a mamawhte tihhlawhtlin zel a duh a ni,” a ti a. Tunah a thar mai a la nih avangin tih hmasawn zelna tur tam tak a la nei tih sawiin, Office building lian tawk tak, a tul ang zela Department hrang hrang inbun ve theihna tur te, Quarters tha zawkte a mamawh dawn tih a sawi a, “Pathian zarah hun thate kan nei zel a nih chuan chung hmabak te pawh chu kan thawk chho zel dawn a ni,” a ti.

Bairabi chu a pawimawh em avangin hripuiin min tuam lai pawhin a tihhmasawnna tur sum an dawng tha thawkhat hle tih Chief Minister chuan sawiin, “Mamit lam panna kawngte, Zamuang lam kawngte, Kolasib lam kawngte, Hailakandi lam kawngpuite leh Tlawng lui lian laka invenna te pawh hmalakna tam tak kan nei a ni,” a ti a, heti tak maia Bairabi in hma a sawn chhan pakhat chu a bialtu MLA in a thawh that vang leh a inpekna vang a nih thu a tarlang bawk. Tunlaia kan chhehvela buaina hrang hrang leh raltlan tam tak lo luh chanchinpawh Chief Minister chuan sawiin, Pathian in Mizoram a kaihhruaizia a thiltawn te atangin a tarlang bawk.

He hunah hian khual zahawm leh bialtu MLA K. Lalrinliana pawhin hun rei tak an lo nghah leh beisei tawh Civil Sub Division Office Bairabi in an nei thar ta chu a lawm thu sawiin, “Kan sawrkarin Kolasib District leh Bairabi min hmangaihzia a langchhuak nasa em em a ni,” a ti a. SDO Civil Administration in a ken tel sawrkar hmunhma dangte pawh theihtawpin an umzui zel dawn tih sawiin, Bairabi pawimawhna tlangpui leh Bairabi leh a chhehvel bialte inkalpawhna kawngpui sawrkarin a siam hrang hrangte pawh a sawilang bawk.

Bairabi Civil Sub-Division hawnna hun hi Kolasib DC John LT. Sanga chuan kaihruaiin Bairabi Joint VC Chairman R. Lalfakawma chuan khawtlang aiawhin lawmthu a sawi a. Bairabi Civil SDO hi kum 2001 atanga an lo dil tawh thin thu a sawi bawk. Civil Sub-Division lawmna inkhawmah hian Bairabi khawtlang hruaitute leh tlawmngai pawl aiawh hrang hrang ten thu an sawi bawk a ni.

Bairabi-ah hian SDO (Civil) tur hi hun reiloteah sawrkarin a tihchhuah beisei a nih thu sawrkar thuchhuah chuan tarlangin, a thar lo awm hma atan tuna SDC Bairabi ni mek Dr. Lalramdintluanga MCS chu SDO (Civil) mawhphurhna lo chelh lailawk tura ruat a nih thu a tarlang bawk.