ODF Plus khuaa inpuang te enfiah hna thawh mek a ni

Serchhip RD Block huamchhunga khaw 26 te chu ODF Plus khuaa an inpuan hnuah 3rd Party Verification Team ten tun thla ni 29 atang khan an khua ah kalchilhin an enfiah mek.
Serchhip District chhunga thingtlang khaw hrang hrangte hi Swachh Bharat Mission (Grameen) hnuaia ODF-a puan vek ni tawhin tunah hian SBM (G) hnuaiah hian ODF Plus ni turin hmalakna kalpui mek a ni a, Serchhip District-ah hian RD Block pahnih (E.Lungdar RD Block leh Serchhip RD Block) awmin E.Lungdar RD Block chu ODF Plus verification neih zawh tawh niin tunah hian Serchhip RD Block huamchhunga khaw 26 te endikna neih ve leh mek a ni a. ODF Plus Model khua ni tur hian tehfung hrang hrang awm te hmangin Verification Team te hian an khua ah kalchilhin an endik mek a ni.

ODF Plus 3rd Party Verification Team ah hian Serchhip SDO (Sadar) Rebecca Laldinmawii Hrahsel; Er. Samuel LR Ralte, Sr. SDO PHED; MC Zirsangliana APO (RD Department) leh Dr.Ruthi Lalmuanpuii, Medical Officer, District Hospital Serchhip te telin Samuel Lallawmzuala, District Coordinator PHED in ODF Plus awmzia leh endikna kalpui dan tur hrilhfiahin a tawiawm a, Khaw tina WATSAN Committee Member ten an lo dawngsawng a ni.