Lunglei - Tlabung kawng House-ah sawichhuak

Mizoram Legislative Assembly thutkhawm nimin-a neih ah West Tuipui bialtu MLA Nihar Kanti Chakma chuan Calling Attention hmangin Lunglei leh Tlabung inkar kawng chhia chungchang a sawichhuak a, PWD changtu Chief Minister Zoramthanga chuan Lunglei to Tlabung kawng chu NHIDLC kawng a nih thu sawiin, mipui harsatna sukiang turin an hotute leh thawktute a nawr reng thu a sawi bawk.

Nimin-a Assembly thutkhawm a thil pawimawh bika thu sawi dilna, Calling Attention hunah West Tuipui bialtu MLA Nihar Kanti Chakma chuan Lunglei leh Tlabung inkar kawng chhiat thu sawi langin, Tlabung leh a chhehvel khuate'n tuilian vanga harsatna nasa tak an tawk chungin NH. 302 chhiat vangin mamawh a thleng thei lo tih leh Tlabung Kudam-ah buhfai pawh a awm tawh loh thu a sawi a. Lunglei to Tlabung kawng chu chhimlam mipuite nunna hnar a nih thu sawiin, “Kan nunna hnar heti tak maia chhia hian mipui rilru a ti na a, keipawh ka rilru a na hle. Bialtu MLA ka nihna ang pawhin hrehawm ka ti hle,” tiin NH. 302 chu Defence purpose atan pawh pawimawh tak a nih laiin a chhe hle tih a sawi a, a chhiat chhan mipuiin hriat an duh tih a sawi bawk a ni.

Chief Minister Zoramthanga chuan Lunglei leh Tlabung inkar kawng NH. 302 chu NHIDCL kawng a nih vangin PWD in tih theih a nei vak lo chungin kawng tinrengin an hotute leh thawktute an nawr tih he hunah hian a sawi a, he kawng hi siam lai a nih thu leh Fur nen a in nang a, chu chuan harsatna a thlen niin a sawi. He kawng hi km 96-a thui a nih thu leh BRO in kum 1970 velah lai tlangin kum 2009 thlengin an enkawl a, PWD ten kum 2021 February thla thlenga enkawl lehin hemi hnu hian NHIDCL in tun thlengin an enkawl zui ta tih a sawi a. He kawng hi laih leh a nih dawn khan km 75-ah tihtawi a nih thu te, Hrangchalkawn atanga Chhumkhum km 37-a thui chu package khat-ah awmin Chhumkhum atanga Tlabung thleng km 37 bawk chu package hran ah a awm thu te, Package A-ah cheng vbc. 698.45 leh Package B--ah cheng vbc. 740.58, a vaiin vbc. 1439 sanction a nih thu te a sawi a. Package A chu December 30, 2022 leh Package B chu January 9, 2023 a zawh tur ni mah se tunah chuan December 31, 2023-ah a Package pahnih hian zawh beisei a ni ta chauh tih a sawi bawk.

House Leader Zoramthanga chuan hna tlai chhan bul ber chu Compensation leh Forest Clearance buaipui chhung a rei vang a ni tih he hunah hian a sawi a, Furpui vangin Project a chak thei lo tih sawi bawkin, Furpui a ziaawm chhoh chuan kawng tha tak sial chhuah thuai theih a nih a beisei thu a sawi a, tun dinhmunah Physical achievement chu 48% niin a chhe zualpui chu km 6 vel a nih thu a sawi bawk a ni.