Chief Election Commissioner hovin Inthlanpui atana Mizoram inbuatsaihna hrang hrang enfiah mek a ni

Mizoram tlawh mektu Chief Election Commissioner (CEC) Rajiv Kumar kaihhruai Election Commission of India Team chuan nimin khan Mizoram District hrang hrang 11-a District Election Officer leh Superintendent of Police te kawmin Assembly inthlanpui neih tur atana an inbuatsaihna te an enfiah.

Nimin-a District Election Officer leh Superintencent of Police te an kawmna ah hian District Election Officer te chuan an hmalakna te tarlangin, Election Comission Team chuan District Official-te chu tun aia vote thlak an tam zawk theih nana tan la tur te, a hmei a pa, thalai leh khawpuia chengte'n vote an thlak uar lehzual nana SVEEP Campaign leh District mila hmalak ngaih bikna laiah tan la turin a chah a. Electoral Roll dik leh felfai zawk neih a nih theih nan tuna kalpui mek 2nd Special Summary Revision chu uluk lehzuala nei turin a chah bawk. Heng bakah hian State Sawrkara thuneitu Chief Secretary leh Director General of Police-te bakah Secretaries Govt. of Mizoram hmuin inthlanna atana inpuahchahnate an sawipui a, hemi hnu hian Aijal Club, Aizawl-ah thuthar thehdarhtute an kawm bawk a ni. 

Thuthar thehdarhtute an kawmna ah hian CEC Rajiv Kumar chuan inthlanna muanawm leh felfai tak buatsaih a nih theih nana Election Commission of India hmalakna tlangpui a tarlang a. Chanchinbumite chu mipui thlan Sawrkar din kawng ah phak ang tawka tha thawh turin a sawm a, mipuite chu inthlanna kaihhnawiha tel ve ngei tura zirtir uar tur leh thuthang dik lo leh inbumna laka fihlim tum tura zirtir thin turin a chah bawk.

Chief Election Commissioner chuan Mizo-ram inthlanpui neih hun tur chu la tihchian a ni lo tih sawiin, political party te ngenna angin Inrinni leh Pathianni chu a nih a rinawm loh tih a sawi a. Mizoram inthlanpui lo awm turah a tam thei ang berin vote thlak se an duh tih sawiin, “Inthlanna thianghlim, fel fai, muanawm leh langtlang a awm ngei ka beisei a ni,” a ti a. Inthlanpui-a senso zat chungchang zawhna chhangin, kum 2018 inthlanpui ah cheng nuai 20 a nih thu leh tuna Candidate pakhat senso theih zat chu nuai 28 a nih thu pawh CEC chuan a sawi bawk.