ECI-a CEC leh a hoten Mizoram inbuatsaihna enfiah

Election Commission of India (ECI)-a Chief Election Commissioner Rajiv Kumar leh Election Commissioner pahnih bakah Official pawimawh te chuan Assembly inthlanpui neih tur atana Mizoram inbuatsaihna te enpui turin nimin khan Mizoram an rawn thleng a, ni thum chhung an cham dawn a ni.

India Danpui Constitution Article 324 -in a tarlan angin State General Election a thuneihna pumhlum neitu chu Election Commission of India (ECI) a ni a, kumin December ni 17 khian 8th Mizoram Legislative Assembly term hi a tawp dawn avangin inthlan hmachhawn dan tur inbuatsaihna kalpui mekte ECI Team te hian an endik dawn a ni.

Chief Election Commissioner Rajiv Kumar, Election Commissioner pahnih Anup Chandra Panday leh Pu Arun Goel, Sr. Dy. Election Comissioner Nitesh Vyas leh Dy. Election Commissioner pahnih Hirdesh Kumar leh R.K. Gupta bakah ECI Officials 12 te hian nimin khan Mizoram hi rawn thlengin sawrkar Official ten an lo dawngsawng a. Nimin khan Aijal Club-ah National leh State Recognised Political party aiawh, dan leh thupek kengkawhtu (enforcement agencies), Mizoram Chief Electoral Officer (CEO), State Police Nodal Officer (SPNO) leh Central Armed Police Force (CAPF) te hmalakna leh ruahmanna an siam te, boruak muanawm tak hnuaia inthlanna felfai leh thianghlim a awm theih nan an endik nghal a ni.