ZPM leh HPC Party ten thawhhona tur an ziak

Zoram People's Movement (ZPM) General Headquartes, Aizawl leh Hmar People's Convention (HPC) General Headquarters Sakawrdai te chuan nimin khan thawhhona thuthlung ziakin kumin a Assembly inthlanpui lo awm turah HPC Party chuan Candidate siam lovin ZPM an thlawp dawn a ni.

ZPM leh HPC te hian nimin khan Sakawrdai Community Hall-ah Thawhhona Thuthlung hi ziakin he thuthlung an ziah ang hian 2023 Inthlanpui, General Election lo awm turah Hmar People's Convention (HPC) Party chuan Candidate siam lovin ZPM Party Official Candidate-te tlin theihna turin theihtawp chhuahin a pui anga, Sinlung Hills Council (SHC) Inthlanpui neih hunah ZPM leh HPC an thawkho ang. Inthlanpui ah ZPM a lo sawrkar chuan HPC/HPC (D) nena sawrkar inremna (MoS) awm tawh te tihlawhtling turin hmalak a ni anga, Sinlung Hills Council Headquarters Sakawrdai-ah a taka function turin hmalak a ni anga, HPC Movement avanga Martar chhungkua leh Ex-Volunteer-te sawrkar hnuaiah a theih anga chhawmdawina leh duhsakna a siamsak ang. Heng bakah hian SHC chu thuneihna (subjects) hrang hrang mumal taka siamsak a ni anga, SHC Service Rules felfai taka siam a ni ang tih te tarlan a ni.

He thawhhona thuthlung-ah hian ZPM aiawhin Vice President Dr. Kenneth Chawngliana leh HPC aiawhin President, Rohringa ten an hming an ziak a, Lalremruata Varte, General Secretary HPC Gen. Hqrs leh MDC SHC chuan thawhhona chungchang a sawiifiah bawk a ni.