Meidum leh Hortoki inkar kawngpui laihna sum chhuichiang turin Lok Ayukta-ah FIR thehluh a ni

MPCC Vigilance Cell chuan Meidum leh Hortoki inkar kawngpui laihna ah tul lo takin Sawrkar in cheng nuai 17,811 a seng nia sawiin, hei hi chhui chianga a tul anga hmala turin nimin khan LokAyukta Chairman C. Lalsawta hnenah FIR an thehlut. 

Lok Ayukta-a FIR an thehluh hnua thuthar thehdarhtute an kawmna ah MPCC Vigilance Cell Chairman, Lalrindika Ralte chuan Meidum to Hortoki kawng laihna atan Mizoram sawrkar in sum tam tak a hman avangin ngun taka zirchiangin an enzui tih sawiin, sawrkarin he Project a kalpui nachhan nia a sawi, Hortoki khaw chhehvel ah ONGC te’n lei hnuai zirchianna neiin chumi atan chuan khawl leh Motor lian tak tak lakluh a ngaih avangin he kawng laih hna hi thawh a ni tih an sawi a. A thawhkhatna ah cheng nuai 4445 sanction niin Contractor pakhat a awm thu leh a thawhhnihna ah cheng nuai 13,366 sanction niin Restricted Tender hmanga Contractor paruk thlan an nih thu an sawi a. “Hetianga Mizoram Sawrkarin Meidum to Hortoki kawng laih a tulna chhan a sawi lai hian ONGC lam atanga thu kan dawn dan leh document kan neih atanga a lan dan chuan ONGC hian Meidum-Hortoki vela Oil/Gas zawn hna an thawh chu Dt. 07.10.2015 khan an lo chhuahsan daih tawhin an bungrua te pawh ONGC Forward base, Srikona, Silchar-ah an dah vek tawh a ni,” an ti.

MPCC Vigilance Cell chuan Directorate of Geology & Mining, Annual Report 2022-23 Chapter D-(2)-a alan danin ONGC hian Mizoram Sawrkarah Petroleum Exploration License Fee a pe tawhlo tih a chian thu leh Oil/Gas zawn hna chhunzawm leh tur chuan Directorate General of Hydrocarbons (DGH), Noida atanga phalna an neih a ngai nia sawiin, Vawiin thlengin phalna an la nei lo niin an sawi a. “Kan ram sum leh pai dinhmun a chhiat em em lai leh Sawrkar hnathawkte pawhin hlawh an lak mumal theihloh lai leh mirethei damlo inenkawlna bill takngial pawh Sawrkarin a bat sak laia mahni hmasial na’n leh mimal induhsak nana mipui pawisa heti zat hmanral a ni hian thinlung a ti na takzet a ni,” an ti a. “He thila a mawhphurtu hi man chhuah an nih a, dan hmanga hrem an nih ngei theih nan a tawp thlengin MPCC Vigilance Cell chuan hma a la dawn a ni,” an ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man