BSNL in an hmalakna leh ruahmanna te tipuitling thuai se a duh thu Lok Sabha MP in a sawi

Mizoram Lok Sabha MP C. Lalrosanga chuan BSNL in Mizoram puma inbiakpawhna titha tura hma an lak mekte leh ruahmanna an neihte chu tipuitling thuai se a duh thu a sawi.

Kumin atana Telecom Advisory Committee (TAC) thutkhawm hmasa ber chu nimin khan Aizawl-ah neih niin he hun hi Mizoram Lok Sabha MP C. Lalrosanga chuan telpuiin BSNL in hotu thar Principal General Manager Arumaya Dakua an nei chu lawmawm a tih thu leh BSNL in Mizoram puma inbiakpawhna titha tura hma an lak mekte leh ruahmanna an neihte chu tipuitling thuai se a duh thu a sawi a. Mizoram-a 4G Service pekna tur hmalak mekte chu tun sawrkar kum ngeia tipuitling tura fuihin, nakin zel atana 5G hmanga inbiakpawhna neih tuma hma la turin a fuih a, sawrkar laipui lamah a tul dan anga hmalakpui a inhuam thu a sawi bawk.

BSNL hotute chuan Mizoram-ah Telephone Exchange 37 leh Landline Connection 5747 an la neih thu sawiin, Broadband connection hmanlai 2094 an neih bakah Mobile Connection 2,60,814 an pek mek thu an sawi bawk a. BSNL hian motor kawngpui, National Highway zaa 81 leh State Highway zaa 54 mobile in an huampha a. 4G hmanna tur atan District 11-ah Tower 60 bun an tum mek bawk tih sawiin, BSNL hian Fibre hmangin District pali-ah FTTH Connection 6036 an pechhuak mek a, khawl leh hmanraw thar hmanga pekbelh zel an tum bawk a ni.