Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Serchhip dai-ah Rakzu man

Serchhip-a Excise and Narcotics Department chuan nizan hmasa khan Serchhip leh Thenzawl inkarah Rakzu litre 500 zet manin hemi kaihhnawih ah hian mi pathum leh Zu phurhna atana hman lirthei pakhat an man bawk.

Serchhip-a Excise and Narcotics Department te hian nizan hmasa dar 11:10 vel khan Serchhip leh Thenzawl inkar, Serchhip dai-a Mualvawm lui kawr bulah heng Rakzu te hi an man a, heng Zu rawn kengtute hian Phunchawng atanga rawn keng an ni tih sawiin, Hnahthial a pek tur niin an sawi a, heng Rakzu te hi Polythene-ah litre 10 zela dahin heng te hi Satha Ip-ah khung leh a ni a, a vai hian litre 500 niin Polythene 50-ah dah a ni.

Heng zu kaihhnawih ah hian Lalchhanhima (29), Lallawmkima (18) leh C. Lalbiakthanga (56) te man niin an vai hian Phunchawng Melriat-a cheng niin an insawi a, Zu phurhna atana hman Eeco Van pawh man niin MLP Act 2019 hnuaiah thubuai siam sakin nimin khan Serchhip District Court-a hruai nghal tura buaipui a ni. Heng Rakzu rawn kengtute hian litre 10 fun pakhat hi Rs. 1500/- man vel a nih thu an sawi a ni.

Comments

Popular News (Last 30 Days)