Latest News

Bialtu MLA in SAROA Silver Jubilee lawmna a hmanpui

Serchhip bialtu MLA Lalduhoma chuan Serchhip Auto Rickshaw Owners’ Association in an kum 25 tlinna, Silver Jubilee an lawmna chu nimin khan Serchhip Auditorium-ah a hmanpui.
SAROA Silver Jubilee lawmna hunah hian bialtu MLA Lalduhoma chuan he huna kalkhawmte chu an Jubilee lawmpuina chibai bukin, Jubilee chu mitin tan ni lawmawm, hlimna ni, Pathian malsamna leh a hruaina an dawn nasat zia an hriatchhuahna ni a nih thu a sawi a, Serchhip Auto Rickshaw Owners Association in an Jubilee puala mipuite tana a thlawna tlan ni an buatsaih leh thisen an pe te chu fakin, an eizawnna piah lamah midang te tanpui a hun an hmang chu lawmawm a tih thu a sawi bawk. Serchhip bialtu MLA chuan Driver te chu Mizo mipuite zingah tlawmngaihna chawi nungtu pawimawh tak an ni tih sawiin, mihring nunna khawih thil eizawnna a nih avangin a zahawm a, fimkhurna nen lirthei khalh a pawimawh thu leh rinawmna vawng nung tlata an nun theuh uluk turte in a chah bawk a ni.

Mipui in kan mamawh tawk aia tam lirthei Permit pekchhuah a nih thin avangin eizawn nana hmang duh tak tak ten harsatna an tawh thin thu pawh bialtu MLA chuan a sawi bawk.

Serchhip Auto Rickshaw Owners’ Association Silver Jubilee lawmna hun hi an pawl Fin. Secretary Lalbiakmawia chuan kaihruaiin SAROA Silver Jubilee puala Souvenir an siam chu khuallian hian a tlangzarh a, Award semna nei bawkin, an Member kum upa ber H. Zoliana hnenah chawimawina hlan a ni a. Driver Polite ber ah Ramdinpuia thlan a ni a. Motor enkawl uluk leh fai ber ah C. Lalthansanga thlan niin Stand tifai peih thlanchhuah mi pali hnenah lawmman hlan a ni bawk.

Serchhip-ah hian kum 1998 khan Auto Rickshaw hi awm tanin August 28, 1998 khan Serchhip Auto Rickshaw Owners’ Association (SAROA) hi a ding tan a, tun dinhmunah Member 205 an awm mek a ni.

Comments

Popular News (Last 30 Days)