Transport Department-a thawktu indaihlohna reilote ah sutkian beisei a ni - Transport Minister

Mizoram sawrkar-a Transport Department-ah Post ruak 303 awm mekin Transport Minister TJ. Lalnuntluanga chuan Staff indaihlohna nasa em em hi tun atanga reilote ah sutkian a nih a beisei tih a sawi.

Nimin-a Aizawl Press Club-a thuthar thehdarhtute a kawmnaah Transport Department chungchang leh a hmalakna te puangzarin Minister TJ. Lalnuntluanga chuan tun dinhmunah Transport Department hnuaia Regular sanction Post 684 zinga 303 a ruak mek tih a sawi a, tunah hian sawrkar-ah post ruak hnawhkhah dil mek niin tun atanga reilote ah hian rah tha a chhuah ngei beisei a ni tih a sawi a ni. Minister chuan an hmalakna hrang hrang zingah lui a inkalpawhna siam a tel thu sawiin, Mizoram chhunga National Waterway awmchhun Tlawng Lui chu National Waterway-102 tih niin Khamrang khua atangin Gharmura (Assam) thleng huamin inkalpawhna siam tura an rawt thu leh hemi chungchangah hian Central sawrkar thuthlukna ngaihchan mek a nih thu a sawi bawk.

Myanmar nena insumdawntawnna tih hmasawnna atan Chhimtuipui Lui-ah IWT Project kalpui turin Tuipui ‘D’ khua atangin Lomasu khua thleng Project siam a nih thu pawh Minister chuan a sawi a, hei bakah hian Bangladesh nena insumdawntawnna tihhmasawnna atan Khawthlangtuipui lui-ah IWT Project kalpui turin Forest Clearance nghah mek a ni, a ti bawk.

Minister TJ. Lalnuntluanga chuan Mizoram Sawrkarin Ropeway subject chu January 19, 2019 atang khan Transport Department kutah a pe tih sawiin, Ropeway siam tur hian kawng hrang hrangin ngaihtuahna sen mek a nih thu a sawi a. Chief Minister hoa sawiho a nih hnuah, 'Pilot project atan Aizawl leh a chhehvelah hmalak hmasak phawt nise,' tih a nih thu leh hemi bawhzui hian hma hrang hrang lak chhoh a nih thu a sawi bawk. Mizoram Sawrkar hnuaia UD&PA hmalakna in Aizawl Sustainable Urban Transport Project kalpui mek a nih thu pawh sawiin, he project hian Ropeway lamte pawh a kaihhnawih avangin, he Project khawihtu Mott McDonald-te Feasibility Report ngaihchan mek a nih thu pawh a sawi bawk.