Kum 20 tang turin rel sak

Kum 2019-a Champhai-a Hmeichhe naupang kumtling lo khuaikhemtu a puh Vanlalhreluaia (30) chu Champhai District Special Court chuan thiam loh chantirin kum 20 chhung lung In tang tura hrem a ni.

Vanlalhreluaia hian kum 2019 June thla khan Champhai Veng pakhata a lenna te fanu kum 5 mi chu zu rui chungin pawn lamah a hruai chhuak a, mipat hmeichhiatna hmanpui tuma khawihin hetia a khawsa lai hi naupang dangin hmuin kal sawn tura an tih pawhin a kalsawn duh lo a, naupangte hian puitling zawkte punin Police hriattir an ni a, Police te hian man in POCSO Act hnuaia thubuai siam sak a ni.

He thubuai ngaihtuahtu District Special Judge (POCSO Act) Sylvie Zomuanpuii Ralte chuan, thuhretu hrang hrang leh mit-a hmutute thusawi atangin hmeichhe naupang hi pawngsual tumin a khawih ngei tih sawiin, Vanlalhreluaia chu puh a nihnaah hian thiam loh a chantir a. Hrehawm taka kum 20 chhung lung In tang tur leh Rs. 10,000 chawi turin a hrem a; a sum chawi tur hi a pe tla thei lo a nih chuan thla 2 dang a tan belh leh ang.