Latest News

Observer in Serchhip tlawh

Electoral Roll 2nd Special Summary Revision neih meka Serchhip District tana Observer Dr. Lalzirmawia Chhangte IAS chuan nimin khan Serchhip rawn tlawhin Serchhip District-a Electoral Roll buaipuitu Officer te leh Political Party hrang hrang hruaitute a kawm.
Serchhip DC Meeting Hall-a thutkhawm neih ah Dr. Lalzirmawia Chhangte chuan Democracy tha taka a kal zel theihna atana pawimawh ber chu mipui ten an aiawhtu tur roreltu an thlanchhuah hi a nih thu sawiin, chu inthlan chu a thianghlim a ngai a, khua leh tui kum tling chin zawng zawngin vote an thlak theih nan Eelectoral Roll dik tak buatsaih chu ECI duhdan a ni thu leh khua leh tui ten an chanvo dik tak an chan theih nan voter tute mah hmaih loh tur tih chu ECI thupui a nih thu a sawi bawk.


Electoral Roll Observer chuan khawtlang hruaitute, Political party te, MPF te leh NGO hrang hrang hruaitute chu khua leh tui, kum tling chin ten vote an neih ngei theih nan an pawimawh thu pawh sawiin, Mizoram chhungah hian Polling Station hmunhma leh Election hmachhawn tura kan inbuatsaih dan a tha thin tih a sawi a, Serchhip ah pawh inbuatsaihna tha tak an nei nia a hriat thu a sawi baawk a ni.

He thutkhawm ah hian Sawrkar Official te bakah Serchhip Sub-Headquarters YMA, MHIP, MPF, Political party hrang hrang aiawh te leh MJA hruaitute an tel a. Electoral roll chung-changa hriatbelh duh an neih te leh hriatthiam loh lai awm te inhrilhfiah a ni bawk.

Kumin-a a vawi hnihna atana Electoral Roll Special Summary Revision neih mekah hian August 2, 2023-ah khan Draft Electoral Roll tarchhuah a lo ni tawh a, October ni 1, 2023-a kum 18 tling chin India khua leh tui (citizen) dik takte tan August 31, 2023 thlengin Electoral Roll-a inthun thar, paih leh siamthat ngaite tan dilna thehluh theih a ni a, heng dilna te hi enfiah a nih hnuah October 4, 2023 khian Final Electoral Roll chu tarchhuah a ni ang.

Comments

Popular News (Last 30 Days)