Latest News

Manipur atanga raltlan te tanpuina atan sawrkar hnathawk ten cheng nuai 81 chuang an thawhkhawm

Manipur tualchhung buaina avanga Mizoram-a sahimna zawnga rawn raltlan te tanpuina atana Mizoram-a sawrkar hnathawk te atanga vehbur khawn a atangin Rs. 81,37,271/- hmuh a ni a, Mizoram sawrkar Finance Department chuan cheng vbc. 5 a pechhuak tawh bawk.

Manipur tualchhung buaina avanga Mizoram-a rawn tlanchhia (IDPs) te tanpuina sum hman dan tur chungchang sawiho-a Executive Committee on IDPs of Manipur in Mizoram thutkhawm nimin-a Forensic Science Laboratory Conference Hall, Aizawl-a neih ah Commissioner & Secretary Home Department leh Committee Chairman ni bawk H. Lalengmawia chuan Manipur tualchhung buaina avanga Mizoram-a rawn tlanchhiate chu Mizoram sawrkar leh mipuiten an ensan thei lo tih sawiin, “Anmahni lo tuamhlawma, a tul anga lo chhawmdawl turin sawrkar leh pawl hrang hrangte, mimal te pawhin theihtawp an chhuah a ni,” a ti a. Heng IDPs te enkawl nan hian sum leh pai harsatna karah Mizoram sawrkar Finance Department chuan cheng vbc. 5 a pechhuak tawh tih sawiin, hei bakah hian sawrkar hnathawkte atangin Vehbur khawn a ni tih tarlangin, heta tang hian Rs. 81,37,271/- hmuh a ni bawk tih a sawi a ni.

Manipur IDPs te enkawl nana Food, Civil Supplies & Consumer Affairs Department leh District hrang hrang DC ten sum an sen tawh zat, tuna report theih chin belhkhawm chu Rs. 1,10,40,737/- a ni a. Sum hmanna tlangpui chu Relief Camp buatsaih nan te, ei leh in tur bakah damdawi-a inenkawlna senso a ni a. District hrang hranga DC te leh FCS&CA te sum hmanna report ngun taka thlirho in sawifiah ngaite an sawifiah hnuah DC te chu buhfai leina atana an sum hman tiam lovin thil danga IDPs enkawlna atana an sum lo hman tawh ang angte chu Executive Committee chuan pek tlak thuai nise an ti a, Buhfai leina erawh chu FCS&CA hnenah a vaia pek tura tih a ni a. Hemi baka sum sen belhna awm apiangte chu rang taka Home Department-ah thehlut thin turin DC te chu hriattir an ni bawk.

Heng bakah hian Falkland Relief Camp-a awmte tui harsatna phuhruk nan Plastic tuizem litre 3000 dawng pahnih lei remtih a ni a, Kolasib District Bilkhawthlir-a IDP chhungkaw 50 vel awmna, thla tin man chawia mimal Godown luah hawh mek thlakna tur hmun remchang dang ngaihtuah turin Kolasib DC chu tih a ni a, a tul dan angin BSUP building Aizawl-ah lakchhoh turin Executive Committee chuan a rel a ni.

Executive Committee chuan YMA te leh Pawl hrang hrangte, Zoram mipuiten Manipur atanga Mizorama rawn tlanchhiate an lo dawnsawn leh enkawl dan chu chhuanawm a tiin lawmthu a sawi a. Mizoram sawrkar in sum harsatna karah vbc. 5 a tum bakah sawrkar hnathawk ten phal taka sum an thawh khawm chu lawmawm tiin, Mizoram sawrkar leh sawrkar hnathawkte chungah pawh lawmthu a sawi bawk a ni.

Comments

Popular News (Last 30 Days)