Rel kawng-a lei dawhlai chim ah mi ruang 18 hmu tawh

Bairabi leh Sairang inkar Rel kawng siam hna thawh meka Lei dawhlai pakhat, Sairang Zero Point bul a mi chu nimin khan chimin helai hmuna hnathawktu mi 20 chuangin nunna an chan nia hriat niin ruang 18 lakchhuah a ni tawh.

Nimin zing dar 9:30 bawr vel khan Bairabi - Sairang Rel kawng siam hna thawh meka Bridge No. 196, Sairang Zero Point bul-a ban Number 102 leh 103 inkara Lei dawh lai hi a chim a, he lei chim lai hian helai hmuna hnathawktu mi 26 vel an awm nia hriat niin an zinga mi 25 te chu Lei chim hian a chimpui a ni. Helai hmuna hnathawktu awm te hi an vaiin hnamdang an ni a, an zinga a tam zawk chu West Bengal lam mi ni-a hriat an ni a, an zinga 18 te chu an thi tih finfiah a ni tawh a, he thu buatsaih lai hian ruang 16 lakchhuah tawh niin, ruang dang 2 chu leichim hian a delh avangin lakchhuh tuma beih mek a ni a, midang 5 chin hriat lohvin an la awm a ni. He Lei chim-ah hian Engineer pakhat chu lei dona Ban-ah tangin chhanchhuah a ni a, midang pahnih in hliam an tuar bawk.

Helai hmunah hian Chhiatna a thleng tih hriat a nih veleh Sairang khawtlangin chhanchhuah hna an thawk nghal a, National Disaster Response Force leh Aizawl DC hnuaia Quick Response Team-in a hmun hi an pan nghal bawk a, Medical Team te pawh tirh nghal niin Aizawl DC, SP leh sawrkar hotuten chhanchhuah hnathawh hi an vil zui nghal bawk a. Ruang te hi Sairang YMA Hall-ah lak niin Sairang khawchhunga YMA Branch hrang hrangin Kuang an siam sak a, Sairang PHC-ah an ruang te hi Postmortem in thil tul dang te tihzawh a nih hnuah Railway lam hotuten a tul angin an buaipui zui dawn a ni.

Mizoram Governor Dr. Hari Babu Kambhampati pawhin Kurung lui chunga relkawng siam meka Lei dawh chim avanga hnathawktu zinga nunna hlu tak chan an awm chu pawi a tih thu leh he thil thleng hian a thawng takzet tih a sawi a, vanduaina tawktu chhungte chu a tawrhpui thu a sawi bawk. Chief Minister Zoramthanga pawhin Sairang Rel kawng Lei dawh lai chima nunna chanta chhungte chu thinlung taka a tuarpui thu a sawi a. Chhanchhuah hna thawk tura kalkhawmte chungah lawmthu a sawi bawk.

He vanduaina thlenna hmun hi nimin vek khan Mizoram Lok Sabha MP C. Lalrosanga leh Transport Minister TJ. Lalnuntluanga bakah MLA K. Laldawngliana leh Zothantluanga, Chief Secretary Dr. Renu Sharma, Home Commissioner Lalengmawia leh DGP bakah sawrkar mi pawimawh ten a hmunah an tlawh nghal bawk a. Chhanchhuah hna thawktute hmalakna hrang hrang an enpui a ni.

Bairabi leh Sairang inkara Rel kawng siam hna hi Northeast Frontier Railways (NFR) te thawh niin, Rel kawng thui zawng hi km 51.35 a ni a, kumin 2023 December thla hian zawh fel hman tura tih a ni.