Latest News

Assembly inthlanpui neih tur atana Serchhip District-a inbuatsaihna hrang hrang thlirho a ni

Kumin kumtawp lama Mizoram in Assembly inthlanpui a hmachhawn tur atana Serchhip District-a inbuatsaihna tur hrang hrang thlirin nimin khan Serchhip-a sawrkar Department hrang hrang botute chu District Bawrhsap hovin an thukhawm.
Serchhip DC Meeting Hall-a thutkhawm hi District Bawrhsap leh District Election Officer David Lalthantluanga chuan kaihruaiin inthlanpui nei turin inbuatsaihna kalpui mek a nih thu leh Election Commission of India-a hotute pawhin karleh khian Mizoram rawn tlawh an tum thu sawiin, Electoral Roll 2nd Special Summary Revision pawh neih mek a nih thu a sawi a. He Revision neih mek hi October 2 khian Final Electoral Roll tarchhuah a nih dawn thu leh hei hi Assembly inthlanpui neih tura hman tur a nih thu sawiin, Electoral Roll thar peihfel a nih hi chuan inthlan hun pawh puan mai a nih a rinawm thu sawi a. Inthlanpui neih tur atan hian inkaihhruaina hrang hrang tihchhuah reng a nih thu sawiin, hei vang hian an inzir tlan reng a tul thu sawiin, Sawrkar hnathawk te, khawtlang hruaitute, NGO, MPF leh Political Party te nen tangrualin tha taka inthlanna buatsaih theih a beisei thu a sawi bawk.

He hunah hian Serchhip Election Officer Lalrinsanga Hnamte chuan inthlanpui neih tur atana an inbuatsaihna hrang hrangte tarlangin, Serchhip District-ah Assembly Bial pathum a awm thu leh Polling Station 88 awmin Serchhip Assembly Constituency-ah 29, Tuikum Assembly Constitutency-ah 32 leh Hrangturzo Assembly Constitutency-ah 27 an nih thu leh heng zinga 80 te chu zirna In-a awm an nih thu a sawi a. Heng Polling Station te hi pawmpui vek a nih tawh thu leh ECI in a phut ang, Voter ten tha taka vote an thlak theihna tura mamawh hrang hrang- Eng, Tui, inthiarna, Ramps leh bungraw dang mamawh la awm te chu a kaihhnawih Department ten lo enfiahin harsatna awm lo tura hmalak dan tur sawiho a ni a. Khaw thenkhat tana inkalpawhna harsa awm thei te pawh zirchianga hmalak dan tur ruahman nise tih a ni bawk.

Heng bakah hian inthlanpui-a Duty tur Central Armed Police Forces (CAPF) mi 200 chuang leh State Armed Police Forces (SAPF) mi 150 chuang rawn kal turte inkulhna tur pawh he hunah hian sawiho niin hemi atana Tui leh Eng mamawh pek dan tur chu karleh Thawhtanni ah en ho nise an ti a. Polling Station 88 zinga 45 velah Web Casting tih tur a nih avangin hemi atana Internet Connection-a harsatna a awm lohna tura hmalak dan turte pawh sawiho a ni a. Election-a Duty tur mihring mamawh tam a nih avangin harsatna bik nei tih loh pha an awm loh nana hmalak dan turte pawh sawiho a ni bawk.

Comments

Popular News (Last 30 Days)