Zonun zemawi leh Ruihhlo chungchang inzirtirna nei

Nimin khan DIET Serchhip-ah Zonun zemawi leh Ruihhlo that loh zia inzirtirna chu neih leh a ni.
Serchhip Sub-Hqrs. YMA hnuaia Training & Youth Affairs Committee leh Govt. Serchhip College NSS Unit tangkawp ten Zonun zemawi leh Ruihhlo that loh zia inzirtirna an kalpui meka nimin-a DIET Serchhip-a hun an hman hi T&YA Committee Secretary K .Lalrinchhana chuan kaihruaiin Govt. Serchhip College NSS Unit-a Programme Officer C. Lalramliana chuan Resource Person atan hman niin Ruihhlo that loh zia leh ruihhlo in thalaite a luhchilh nasat tawh dan te, chhungkua leh khaw-tlangah nghawng a neih nasat zia te a sawi a. Heng Drugs ngawlvei te enkawl leh kaihhruai harsat dan leh ruihhlo laka chhanchhuah dan kawng te a sawi bawk a ni.

He hunah hian Resource Person atan T. Romama hman ni bawkin ani hian Zonun Zemawi chungchang a zirtir thung a, Mizote kan nuna bet tel tlat chu Zonun zemawi a ni tih sawiin,chutah chuan tlawmngaihna chu a pawimawh em em tih a sawi a. He tlawmngaihna hi zirlai leh Training mek ten an chhawmnun zel a pawimawh thu a sawi a, “Tlawmngaihna nun hi he kan hnam leh ramah hian a bo kan hlauh tlat chuan kan la chhawmnung thei dawn a ni. Mahse hei aia kan nun a chhiat chuan kan banphak-a a awm loh hunah kan hnam chu a ral anga, kan ram hi a boral thei dawn a ni,” a ti bawk.