Rajya Sabha MP hovin Youth 20 Meet nei

Sports & Youth Services Department leh Mizo Zirlai Pawl (MZP) tangkawp buatsaih ‘Youth 20 Mizoram, Meet on Nationalism, Patriotism & Development’ chu nimin khan Lunglei Saikuti Hall-ah neih a ni a, Rajya Sabha MP K. Vanlalvena chuan khuallian niin a hmanpui a ni.

Nimin-a he hun hmanna ah hian Rajya Sabha MP chuan ‘Lehkha zir a sawt tawh lo, hna a vang tawh lutuk’ tia sawi an awm chuan dawt an sawi tih pawm tura zirlaite chu chahin, Zirlaite chu nakina ram hruaitu tur, ram nghahfak an ni tih a sawi a. “Thiamna a sang zela, mobile phone hmangin in zirna pui thei, in duh zawng zawng in hmu thei tawh a, zirna hi a awlsam tawh a ni tih hria ula, in future hi pianhmang that leh that lohah te, in hausak leh sak lohah te a innghat lo a ni tih in hriat a ngai,” a ti bawk. Mizoram Rajya Sabha MP chuan Rajya Sabha-ah Chairman phalna in vawi 14 thu a sawi tawh thu leh a phal lo chung chung vawi 2 a sawi tawh thu a sawi bawk.