New Bike Outreach kaltlangin District tinah Bike leh Mini Laboratory Services bungrua pechhuak

Mizoram State AIDS Control Society (MSACS) hnuaia New Bike Outreach kaltlanga District hrang hranga bungraw semchhuah turte chu nimin zing khan Health & Family Welfare Minister Dr. R.Lalthangliana chuan Aizawl atangin a vailiam.

MSACS hnuaia New Bike Outreach kaltlang hian District zawng zawng tuam chhuak tur Bike 11 leh AYUSH Health & Wellness Centre 38-a hman tur Mini Laboratory Services bungrua, Truck 16 hmanga sem chhuah turte chu Health Minister hian MINECO atangin a vailiam a, MSACS hnuaia Bike Outreach Service leh Ayush Health & Wellness Centre tihchangtlunna tur laboratory bungrua vailiamte chu hriselna kawnga hmasawnna, damreina leh nunna chhan nana hmalakna a ni tih sawiin, hriselna kawnga bung thar leh thil chhinchhiah tlak tak Mizoramin a chuangkai chu lawmawm a tih thu a sawi.

Health Minister chuan MSACS Bike Outreach kalpui nan NACO in Bike a tum sak bakah PATH in thawktute rawihna tur a tum sak avangin lawmthu a sawi a. Thingtlang kilkhawr thlenga service thleng thei tur chuan awmze thui tak a neih ngei a beisei thu sawiin, Department hnuaia thawktute chu inpekna nena thawk turin a chah a, an thahnemngaihna chuan rah tha a chhuah ngei dawn a ni, a ti a. Ayush kaltlanga hmalaknate chhuanawm a tih thu pawh sawiin, AYUSH Health & Wellness Centre-te hnena Laboratory hmanrua pekchhuahte chuan hmasawnna a thlen ngei a beisei thu a sawi bawk a. Kumin March ni 31 ralhmain Health Sub-Centre 375 te Health & Wellness Centre-ah hlankai an nih thu leh heng zinga 38 te Ayush Doctor thutchilh an nih thu sawiin, Health Sub-Centre neih lohnaah SEDP kaltlangin Health Clinic 235 din a nih thu leh thawktu leh hmanruate pek an nih thu a sawi bawk.

MSACS New Bike Outreach kaltlang hian hmun kilkhawr ber thlengpha HIV Test, Councelling, damdawi pekchhuah, HIV hri danna sem leh tul dangte thawh a ni dawn a, heng hnate hi Laboratory Technician te'n an thawk dawn a ni. Heng bakah hian mamawhna hmun leh High Risk Group miharsate an pan chilh thei bawk ang. Ayush Doctor thutchilh Health & Wellness Centre 38, hmun kilkhawr a awmte hman tangkai theih tur Laboratory bungrua, thisen test leh adangte tih theihna tur hmanrua te hi Truck 16 hmanga sem chhuah a ni.

HIV kaisam tura ngaih High Risk Group (HRG) zingah thisen test tha duh lo, chhuanlam siam avanga ICTC a hruai thlen theih lohte bakah awmna hmun hlat avanga ICTC thlen harsate tan he Bike Outreach hi buatsaih a ni a. High Risk Group ni lem lo, thisen test duh, a test-na hmun pan harsate tan pawh hman tangkai theih tur a ni ang.