Mizoram-a Bamboo Value Chain Development kalpui dan tur Mau sawngbawlna Industry neitute nen sawiho

Nimin khan Chief Minister Zoramthang hovin Mizoram-a Bamboo Value Chain Development in Northeast kalpui dan tur inrawnkhawmna neih a ni.

National Bamboo Missions leh Asian Development Bank te tangkawpin Northeast India State pangaa Mau sawngbawlna tihhma-sawnna tur hmalakna a kalpui tur; Bamboo Value Chain Development in Northeast kalpui dan tur inrawnkhawmna CM Conference Hall-a neih ah hian Chief Minister chuan, tun hma deuh atangin kan rama Mau behchhan Industry ten Furniture lam an hawi deuh vek tih sawiin, mahse kan mau neih sa te hi an lo tet deuh avangin chutiang atan chuan a lo hman tlak vek chiah si lova, harsatna an tawk ta tih a sawi a. Heng kan Industry ten an hman theih tur Mau lian leh chhah chinpun lamah hian sawrkar chuan hma a la mek zel tih sawiin, “Vawiina kan sawi tur National Bamboo Missions leh Asian Development Bank tangkawpten hma an rawn lakna tur bikah hi chuan Pathian in kan ram-a a dah sa kan maute hman tangkai dan sawiho turin Industry neitute kan in kokhawm a ni,” a ti a. Anmahni ngeiin kan Mau neih sa te hmang tangkaia, a hralhna awm si an hria emaw India ram chhung leh ram pawna Company lian zawkte nena thawhhona mumal tak an kalpui thei dawn a nih chuan sawrkar chuan a theihtawpin a thawhpuiin a tanpui dawn tih he huna tel Mizoram-a Mau sawngbawlna Industry neitute chu a hrilh bawk.

He hunah hian Horticulture Department changtu Commissioner & Secretary K. Lalthawmmawia chuan National Bamboo Missions leh Asian Development Bank ten NE State pangaa hmalakna neih an tum dan tlangpui sawifiahin, ‘Chain development’ tih a nih angin Industry inringtawn leh eibangnawi nei lo (circular economy, zero waste) awmna tur Integrated Bamboo Development Park din chu a tum ber a nih thu a tarlang a ni.

Meeting chuan Mizoram-a Mau sawngbawlna Industry kalpui mektute chu Mizoram-a Mau awmsa hmang tangkai tura ruahmanna an neih te a rang lama thehlut turin a ti a. Finish Product emaw Semi- finish Product ang emaw pawh leng vekin Company lian zawkte kohluh leh thawhpuina lam hawi pawh; a hralhna lama harsatna awm lo tur Mau hman tangkaina eng chi pawh rawt turin a ti a ni.