MIGLAHSSA ten School kharin sawrkar nawr mek

Mizoram Govt. Lumpsum Aided Higher Secondary School Association (MIGLAHSSA) te chuan 'No Teaching Day' an hman hnuah sawrkar atanga thu lawmawm an dawn loh avangin nimin, August ni 29, 2023 atang khan tiamchin awm lovin an thawhna School te an khar.

Mizoram-a Lumpsum Aided Higher Secondary School 9 te hian kum 2018 MLA inthlan dawn khan Adhoc-a hlankai phutin nawrhna chi hrang hrang ni 41 chhung huaihawtin School khar, Kawng dan leh khaw chhunga sawrkar Pisa khar a nawrh an lo huaihawt tawh a. Hemi hnuah Aizawl-a kawngzawh tura an inruahman laiin tuna Sawrkarna chelhtute hian an tlin phawt chuan an tih ngei tur thu an hrilh vangin kawng an zawh ta lo niin an sawi.

Sawrkar thar pian hnuah Chief Minister leh Education Minister te dawrin Adhoc a hlankai an inrin laiin Sawrkar sum harsat vanga hlankai a harsat thu an hre ta chu hriatthiam har an tih thu an sawi a. Kum 20 zet School an lo hahpui tawhna leh thingtlang khaw mipuite retheihna chu sawrkar chuan hriatpui se an duh thu an sawi a. Khawtlang in an mamawhna a san em avang leh sawrkarin a lo tiam tawh angin Adhoc Grant-in-Aid tura kawng zawnpui turin an ngen a ni.