Kan sawrkar chuan mipuite beisei leh nghahhlelh angin Mizoram kan her danglam dawn - Lalsawta

MPCC President Lalsawta chuan, “Pathian leh mipuite zarah kan sawrkar a nih chuan Mizoram hi mipuite beisei leh nghahhlelh angin kan her danglam dawn,” a ti.

Lal Thanhawla Auditorium, Aizawl-a mithar lawmluhna hun nimin-a an buatsaih ah MPCC President Lalsawta chuan sawrkar leh mipui hi kalphung pangngai ringawtin kan kal thei tawh lo tih sawiin, thil tam tak tihdanglam a ngai tih a sawi a. “Ram kan nei, mipui kan nei. Kan mipuite an tha, hruai dik chuan a an tha mai a ni. Ram hruaitute hian he rama dinhmun dik tak a awm theih nan mawh kan phur a ni,” a ti a. “Mizoram mipui 12,34,000 enkawl hi thil harsa a ni lo a. Ram hruaitute hian ramin kan dinhmun dik tak kan neih theihna turin a mawh kan phur. Sawrkar atanga thla khat chhungin hmasawnna tam tak kum 5 chhung daih tur a thawh lawk theih a, thla khat chhung vêk hian kum 5 chhung pawha siam that theih loh pawi a sawi theih bawk,” a ti a. Congress Party Manifesto ‘Tang Puihna leh Sawrkar tha’ chu Vawiin-a Mizoram mamawh a ni tih sawiin, “Tang Puihna hmangin hnam dingchhuak kan ni anga. Tang puihna hmangin a a tang apiang kan pui dawn,” a ti bawk.

MPCC thuchhuah in a tarlan danin nimin-a mi thar an lawmluh zingah hian BJP Vice President hlui R. Vanramchhuanga leh AMC Mayor hlui PC. Lalhmingthanga bakah mi langsar thenkhat te an tel bawk a ni.