Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Mamawh hun apianga Tui dawn theihna enchhin

PHE Department chuan mipui ten chhum lo chat lova tui an dawn theihna tur enchhinna an kalpui mek tih an sawi.
PHE Department Serchhip-a Sr. SDO, Er. Samuel LR. Ralte chuan mipui ten an duh hun huna tui an lak theihna tur kalphung hi tunah hian Khawtetlang-a chhungkaw 49-ah enchhinna an kalpui mek tih sawiin, hemi kalpui tur hian Tui lakna Line-a tui putru thei bakah Tui Meter te enfiah hmasa vekin tunah hian kalpui mek a nih thu a sawi a. He enchhinna hi thla li (4) chhung kalpui phawt tura ruahman a nih thu leh hei hi a hlawhtlin dan a zirin Serchhip khaw pum tan pawha kalpui tura ruahmanna la siam tur a ni tih a sawi a. Tuna Khawtetlang-a an enchhinna bakah hian New Serchhip North huamchhunga chhungkaw 140 velah pawh enchhinna hi kalpui tum a nih thu a sawi a ni.

PHE Department-a Sr. SDO chuan tuna Tui an sem dan kalphung, ni bik siama sem a nih hian Tui dawng tur chhungkua ten hna thulha tui haw hun an nghah a tul chang te a awm thin avang leh hei hian chhungkaw tam tak eizawnna a nghawng theih dan te a sawi a. Tuna kalphung thar an enchhin hi kalpui vek theih a nih chuan chhungkaw tin ten an mamawh leh duh hun zelah Tui hi an lak theih dawn avangin mipuite tana awlsam zawkna a thlen theih an beisei thu a sawi bawk.

PHE Serchhip-a Sr. SDO Er. Samuel LR. Ralte chuan Serchhip khawpui chawmna atana Tuikum lui an lak chu tunah hian Phase 2 atan Concept Note siama an buaipui mek thu a sawi a, hun erawh ala duh rei deuh dawn nia a lan thu a sawi bawk.

Comments

Popular News (Last 30 Days)