Serchhip District huapa Integrated Health Campaign neih tur Serchhip District Bawrhsap in a hawng

Serchhip District-a Integrated Health Campaign neih tur chu nimin khan Serchhip District Bawrhsap David Lalthantluanga chuan a hawng a, he hmalakna hnuaiah hian thla thar September 2023 chhung khian Serchhip District chhunga khua zawng zawngah thalaite tana hriselna en runpui neih a ni ang.

Serchhip Kawnpui Villge Council Hall-a Serchhip District tana Integrated Health Campaign hawnna hunah hian District Bawrhsap David Lalthantluanga chuan mihring hriselna tha neih a pawimawh zia sawiin, India chuan China lehpelin khawvela mihring tam berna ram a nih tawh thu leh India mipuite zingah thalai hnathawk thei a ngaih kum 15 atanga 49 inkar an tam thu a sawi a, heng thalaite hian kan hriselna kan enkawl uluk a pawimawh thu a sawi a. Kan taksa tichhe thei ruihhlo bakah natna dang, HIV leh a kaihhnawih laka kan inven a tul sawiin, Hnathawk thei thalaite kutah kan ram economy thui tak a in nghah avangin hnathawk thei thalaite hian kan hriselna kan ven uluka heng natna HIV leh a kaihhnawih ten min eichhiat lohna tura theihtawp kan chhuah a tul thu a sawi a ni.

Serchhip District AIDS Prevention Control Committee buatsaih he Campaign hawnna hi DACO Dr. Lalnunhlima Khiangte chuan kaihruaiin Mizoram State AIDS Control Society (MSACS) atangin Dr. Shahnaz Zothanzami chuan kum 2023 chhung hian National AIDS Control Programme (NACP) Phase-V chhungah hmalakna thar hrang hrang duan niin chung zingah chuan Campaign Mode a hmalak beihpui thlak hi a tel a. June thla khan Integrated STI, HIV, TB & Hepatitis (ISHTH Campaign) chu Prisons and Other Closed Settings-ah kalpui a lo ni tawh a, tunah hian District thlan bikah District chhunga khua zawng zawng tuamchhuak zawngin Integrated Health Campaign kalpui leh tur a lo ni ta tih a sawi a. Mizoram-ah Serchhip District thlan a nihna chhan ber chu HIV High Prevalent lo ni tawh sa Aizawl, Champhai, Lunglei, Kolasib leh Mamit te chu nasa taka hmalak tawhna te a ni a, Serchhip hi tunhnaia High Prevalent District a lo nih ve leh tak avangin hmalakna tihchangtlun a ngai zual tih sawiin, hei bakah hian Serchhip District chu Mizoram laili a awm, hnamdang in an chiahpiah tam loh leh hnathawh vilzuina awlsam a nih thu a sawi bawk a ni.

Integrated Health Campaign (IHC) hi thla thar September thla chhung hian Serchhip District-ah kalpui a ni dawn a, hemi chhung hian heng natna – Hepatitis B leh C, Syphilis, TB, STI, HIV leh General Health chekup a thlawna neiin District chhunga khua zawng zawng chu Health Department-a thawktu ten an fangchhuak dawn a, hemi atana thawktu tur hrang hrangte hian nimin vek khan Serchhip Kawnpui VC Hall-ah hian training nei nghalin MSACS atanga lo kal mithiam ten zirtirna an pe a ni.