Latest News

ZPM in kum 2013 inthlanpui lo awm tur atan Campaign khuhhawnna hun an hmang

ZPM Party chuan kum 2023 inthlanpui lo awm tur atan Campaign khuhhawnna hun nimin khan hmangin, ZPM Leader Lalduhoma chuan, “Sawrkar se min ti lo te pawhin kan sawrkar min rinpui ta,” a ti a. “Mihring lam inbuat-saihnaah chuan kan inbuatsaih fel thawkhat niin kan inhria,” a ti bawk.

Aizawl Vanapa Hall-a ZPM Party in kum 2023 inthlanpui lo awm tur atan Campaign khuhhawnna an neih ah hian ZPM President Lalliansawta chuan MLA inthlan atan an inbuatsaih zel tih sawiin, “Chumi atana thawktu, kan innghahna kan beisei Party Worker leh Candidate zawng zawng ten Lalpa tih ula, Vawiin hian Mizoram-ah kalphung thar, mipui sawrkar a lo pian theih nan Mizoram General Election 2023 lo awm tur atan ZPM Campaign chu ka kick-off e,” tiin Campaign a khuhhawng a ni.

He hunah hian ZPM Chief Ministerial Candidate Lalduhoma chuan, “Sawrkar se min ti lo te pawhin kan sawrkar min rinpui ta a, chutiang khawp dinhmuna min hlangkaitu Pathian leh mipuite chungah lawmthu ka sawi a ni,” tiin “Mihring lam inbuatsaihna ah chuan kan inbuatsaih fel thawkhat niin kan inhria a ni,” a ti a. Sum harsatna chungchang sawiin, “Kan budget pass takah khan kumina kan bat ngai tura chhut chu vbc. 13584 a ni a. Kan puk belh tura dah chu vbc. 2479 a ni a. Chumi belhkhawm chu chhungkaw 2,30,000 awm angah inngai ta ila, chhungtinin nuai 7 thlengin kan inchankim thei tawk chiah a ni,” a ti a. Kan budget dinhmun chu RBI in Statement a chhuah thin tih pawh sawiin, “He Statement-ah hian a zawnin India ram state a leiba nei tam ber kan ni mek a ni. Kan sum pukte hi loh theih lohin kumtin kan rulh a ngai a, kumina kan rulh tur hi cheng vbc. 1442 a ni a, a pung kan rulh tel tur hi cheng vbc 662 a ni,” a ti a, kumin-a kan lei bat sa kan rulh tur zat hi Mizoram in sum kan lakluh ve aiin cheng vbc 123 in a tam zawk niin a sawi.

Lalduhoma chuan nakum-ah Pathian leh mipui zarah Kalphung thar budget an pharh ve thei te a nih chuan an tih tur chu Zoram Mipui hnenah langtlang budget chhiarkawp dik phochhuah an tum dawn tih pawh sawiin, “Tuna kan kalphung ah hi chuan Budget Session kan han nei a, Budget kan han pass a, mipui kan bum a, keimahni pawh kan inbum a ni. Kan GSDP te pawh kan chhut sang lui a, a tak takin kan thleng pha ngai lova, chu chuan kan leibat te, kan sum indaih-lohna te a ti tlahniam a, a tilang mawi a, alanga mawi zawngin chhiarkawp diklo Budget Session apiang hian kan inhlui thin a, ZPM a sawrkar chuan kan nihna dik tak hi zahpui lovin, kumtir atangin kan bat zat tur te, kan sum indaihlohna tur te mipuite nen kan hriat vek turin kan pholang thin dawn a ni,” a ti bawk.

Hetiang hi kan sum dinhmun a nih avang hian mipuite hnenah thutiam lawmawm tak tak tiam thin mahsela, a hlawhtling thei lo tih ZPM Leader chuan sawiin, “Kan tlin leh si loh leh kan tih leh theih tur si loh hi kan sawiin kan zuar ve tur a ni lova. He sum harsatna lian tak min hmuaktu hi kumkhat chhung emaw chuan ziaawm taka kan kal chhohpui theih kan beisei,” a ti a. “Hetiang zat leiba chhawm tur kan ni chung hian a kum khatna atangin kan kuthnathawktute, kha leh chen kawng lo kham thlawn tawh, kut lo durh thlawn tawh, thlan lo far thlawn tawh te hi kan sum neih ang angin kan tuamhlawm ang kan ti a, thlai thar 4 kan lei tur leh a rate nen kan puang tawh a ni. Hei bakah hian buhhum kan lei dan tur te, kuhva te, Sangha te, Rubber Plantation, Alu te leh thil hrang hrang te hi thlai pali anga a rate siamsaa puan lawk ang em ni lo mahse, Vegetable Supply Chain te nen Contract Farming a kalpui chhoh zel kan tum a, a tahtawla hmalak chhoh zel kan tum a ni,” a ti bawk.

He hunah hian ZPM Vice President Rev. Dr. K. Thanzauva chuan ZPM MLA Candidate te inhmelhriattirna a nei bawk a ni.

Comments

Popular News (Last 30 Days)