Darlak leh Sihthiang inkar kawng siamna sum hman ah CAG in Mizoram sawrkar a khak

/

Comptroller and Auditor General of India (CAG) chuan Mizoram sawrkar chu Darlak leh Sihthiang inkar kawng siam chungchanga tul hauh lova cheng vbc. 4.88 hman avangin a khak a. He kawng sial thawk zui lova tihtawp a nih thu sawrkar pawhin a pawm a ni.

Comptroller and Auditor General (CAG) Audit Report thar ber hi Nilaini khan Finance changtu Chief Minister Zoramthanga’n Mizoram Legislative Assembly House Dawhkan-ah a dah a. He report-a a lan dan chuan Mamit District-a Darlak leh Sihthiang inkara inkalpawhna kawng tur sialna atana Detailed Project Report (DPR) sawrkarin a thehluhah Sihthiang khua hi Mamit District khaw dang pakhatmah nena inkalpawh lo anga ziahlan a ni a. Darlak leh Sihthiang inkar kawng, KM 35 chuang hret sialna tur hian cheng vbc. 58.32 chu thingtlang khua zawng zawng kawngpui a pawhtir tura ruahmanna Pradhan Mantri Gram Sadak Yojana (PMGSY) hnuaiah ruahman a ni ta a. Hna thawktu Contractor hian KM 7 leh metre 300 chu February 2020 khan lai tanin June 2021 khan a lai zo a. Forest Clearance a awm loh avangin hemi kum vek July thla khan hna chawlhsan a ni a, PWD chuan kawnglaihna atan hian cheng vbc. 4.88 a seng a ni.

PWD Kawrthah Division-a Executive Engineer (EE) thil chhinchhiahna atanga a lan dan chuan Mamit District-a Sihthiang khua hi Chuhvel khua atangin kawng KM 11-a thui-in a pawh sa tawh reng a. Chuhvel leh Sihthiang inkar kawng hi National Bank for Agriculture and Rural Development (NABARD) pawisa puk hmanga Rural Infrastructure Development Fund hnuaiah cheng vbc. 8.70 senga lo siam tawh a ni a. Kum 2016-ah hna thawk tanin December 2020 khan siam zawh tawh a ni.

Hna thawh chawlhsan leh mai tur ni si a KM 7 lek a thui kawng laihna atana cheng vbc. 4.88 senral a ni chu tul lo taka sum senralna ah Comptroller and Auditor General (CAG) chuan a ngai tih Audit Report pharh takah hian tarlan a ni a, Sawrkar pawhin kawng awm tawh sa renga kawng sial leh chu thawk zui lova tihtawp a nih tak thu hi a pawm tih AIR Aizawl chuan a tarlang bawk a ni.

Comments

Post a Comment

Popular News (Last 30 Days)

SDVA in hruaitu tur thlang

/
Image
Serchhip District Volleyball Association (SD-VA) chuan nimin khan khan Serchhip Kawnpui VC Hall-ah kum 2024-2025 chhunga an Pawl hruaitu tur thlanna an nei a, President-ah K. Tlangthanmawia (Bazar Veng); Sr. Vice President-ah VL. Hruaitluanga (Bazar Veng); Vice President-ah H. Rohmingliana (Chhim Veng); General Secretary-ah Zothansanga (Chhim Veng); Joint Secretary-ah Jerry Lianhming-thanga (Vengchung) leh Zoramthara (Darnam Veng); Treasurer-ah C. Lalhruaitluangi (Chhiah-tlang Kawn Veng) leh Fin. Secretary-ah R. Lalhnehzauva (Vengchung) te thlan an ni.
Kimchang zawkin »

Truck 8-ah Kuhva ro man

/
Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.
Kimchang zawkin »