Aizawl-ah Union Minister hovin Rozgar Mela hmangin thalai 85 te Appointment letter hlan an ni

Rozgar Mela (Job Fair) tum 8-na nimin khan 2nd AR Gajraj Hall, Lakhimpur Battalion, Aizawl-ah buatsaih a ni a, he hun hi Union Minister of State for Minority Affairs John Barla chuan hmanpuiin Indian Government hnuai Central Armed Police Forces (CAPF) hrang hranga hna hmu thar mi 68 leh thalai dang, an vaiin mi 85 te hnenah Appointment Letter a hlan a ni.

Nimin-a he hun hmanna ah hian Union Minister of State for Minority Affairs John Barla chuan Mizoram-a Rozgar Mela hmanna puala Central Armed Police Forces hnuaia hna hmu thar mi 68 te hnena Appointment Letter pekchhuah a ni thei chu chhinchhiah tlak a tih thu sawiin, hna hmu thar leh an chhungte a lawmpui thu a sawi a. India ram venhim leh ram tha ti chak tura bultanna a ni tih hriaa Prime Minister-in a ngaih pawimawh em em ram ralmuang leh him, chhung lam leh pawn lam buaina laka fihlim, hmasawn leh changkang siam kawnga pawimawh tak a nih thu a sawi a. Ram venhim leh rawngbawl hna thawk tura ke pen chhuak thalaite chhuanawm tiin theihtawp chhuah turin a fuih a. Ram leh hnam ziarangte chhuang tur leh mawhphurhnate tha taka hlen tura chahin, Rozgar Mela chuan thalaite hna pek mai bakah mawhphurhna an neihte hrilhfiah a, ram Dan te tha taka zawm tur leh inpekna leh thahnemngaihna nena thawk tura zirtirna pek chu a thil tum a ni, a ti bawk.

Sawrkar laipui hnuaia hna hmu tharte chu thangtharte tana entawntlak leh chhuanawm nih tum tura chahin John Barla, Appointment Letter chu an nun-a bultanna mai bakah ram tana chhenfakawm tak ni tura bultanna ni se a duh thu a sawi a. Ram leh hnam chakna leh thil tih theihna mitin kutah a awm thu tarlangin, hmasawnna rualkhai tak khua leh tui tin te'n an neih theih nana hmalak chu  Sawrkar laipui ngaih pawimawh a nih thu a sawi a. Kalkhawmte chu Rozgar Mela awmzia zau zawka midangte hnena hrilhfiah tur leh scheme hrang hrang hnuaia hamthatna awmte a hre lo te hnena hrilhhre thin turin a chah a. Thalai tam zawkin Rozgar Mela leh Scheme pawimawh dangte an hmelhriat chian a pawimawh thu a sawi bawk.

Rozgar Mela hi ramchhung hmun 45 ah huaihawt a ni a, Prime Minister Narendra Modi chuan nimin khan sawrkar hna hmu thar thalai 51,000 chuang te hnenah Rozgar Mela denchhen hian Internet kaltlangin Appointment Letters a hlan a ni.