Latest News

Home Department hnuaia hmalakna hrang hrang Home Minister in thuthar thehdarhtute a hrilh

Home Minister Lalchamliana chuan nimin khan Aizawl Press Club-ah thuthar thehdarhtute kawmin a Department chan pathum- Home, Taxation leh Disaster Management & Rehabilitation Department te hmalakna leh hmasawnna hrang hrang a tarlang.

Home Minister chuan Home Department hmasawnna hrang hrang sawiin, Police Department Rank hrang hrangah Police an indaihloh thu sawiin, kum 2019 January thlaah Constable 418 ten hlawhtling taka training an zawh thu leh kumin January thlaah Compassionate-in mi 286 chu training tir leh an nih thu a sawi a. Hero Motor Corporation atangin CSR hnuaiah lirthei ke hnih nei 100 an dawn thu te, India ram hmun hrang hranga Election duty-a an chhuah thin thu te, kum 2020-a Cyber Crime Police Station puitling hawnah kumin July thla thleng thubuai 247 ziahluh tawh a nih thu te, Mizoram hmun hrang hrangah Police Office building leh Quarters sak zawh a nih thu te a sawi a. Mizoram-a Police Station 40 leh Outpost 13-ah CCTV dah a nih tawh thu leh tihchangtlun tum zel a nih thu a sawi bawk. Heng bakah hian Home Department hnuaia Directorate hrang- Fire & Emergency Services, Mizoram Home Guards & Civil Defence leh Forensic Science & Laboratory-a hmasawnna te a tarlang bawk.

Taxation Department hnuaiah kum 5 chhunga sawrkarin Chhiah a lakkhawm a pun nasat thu leh kum 5 chhunga a punna chu zaa 20 a nih thu Minister chuan a sawi a. Non Tax Revenue ang chi- Tui bill leh Electric bill te tihsan tha a tih thu leh sawrkar chu 'No loss no gain' a kal ngai a tih tawh thu sawiin, “Sawrkarin kan In-a tui leh electric min pek nan sum tam tak an seng a, man tlawm zawkin kan lei leh a, sawrkarin sum tam tak a chawi phah a ni. Chutiang chiahin ration tur buhfai pawh man tovin a lei a, mipuiin tlawm zawka kan lei leh a, sawrkarin sum tam tak a khawral leh ringawt mai a ni. Chuvangin mipui hian sawrkar kan puih let a ngai tawh,” a ti a. Hei hi politics a lak chi pawh a ni lo tih Minister chuan sawiin, “Mirethei te hmangaih loh vang tia inchirhtheh chi pawh a ni tawh lo, party anga in beihna chi pawh a ni tawh lo,” a ti.

DM&R hmalakna hrang hrangte pawh he hunah hian Minister hian a sawi bawk a ni.

Comments

Popular News (Last 30 Days)