Zakapa chanchin zirhona SW&TA Minister in hmanpui

Nimin khan Aizawl-a Synod Conference Centre-ah ‘Zakapa, Fanai Lal’ tih thupui hmangin Seminar neih a ni a, Social Welfare & Tribal Affairs Minister Er. Lalrinawma chuan a hmanpui a ni.

Directorate of Women & Child Development bultuma he Seminar-ah hian Er. Lalrinawma chuan Sailulak leh Khawhri lal huaisen Zakapa chanchin zira Seminar buatsaih theih a nih chu lawmawm a tih thu sawiin, Zakapa chu lal huaisen a nih thu a sawi a, a nunna hial thapa a khua leh tuite chhan nan ‘The South Lushai Hills District’ siam thara Superintendent (Bawrhsap) hmasa ber C.S Murray (Marliana)-a'n nula mutpui tur a dil chu lo hnial in silaiin kah a tum phah hial a. Hmeichhiate a zahna chu ngaihsan awmtak a ni tiin ‘Kan hnam chin dan a ni lo’ ti-a a chhanna chu tunlai thangtharte tan entawntlak a ni tih hre turin a chah bawk.

Zakapa chawimawina atan hian sawrkar chuan ‘Zakapa Award’ siamin kumin atangin kumtin Rs. .1,00,000/- leh Citatio chu, mimal/ NGO/ Institution hnenah hmeichhiate dinhmun chawikan leh humhimna kawnga thawk thate hnen a pek thin tura ruahman a ni.