Damdawi In-a thihna thleng ah zangnadawmna pe turin ti

Kum 2021-a Serchhip District Hospital-a nau nei tur Hmeichhe pakhat leh a fa hrin boral thu ah Gauhati High Court chuan sawrkar chu zangnadawmna cheng nuai 5 pe turin a ti.
December 1, 2021 khan Khawzawl District-a Tlangpui khuaa mi Malsawmkimi (40) chu Serchhip  District Hospital-ah hian nau nei tura admit a ni a, Malsawmkimi hian a hma lamin a naupai pali lo chhiat tawhin December 3, 2021 khan fa mipa chu thi sa in a hring a, fa a hrin hnu darkar hnih velah thisen put nasa avangin Malsawmkimi pawh hi a boral zui ve leh bawk a ni.

He thil thleng chungchang hi Social Media lamah te thehdarh a nih hnuah chhuichianna (inquiry) neih niin khatihlaia Serchhip District Magistrate Kumar Abhishek chu Magisterial Inquiry la tura tih a ni a, ni 30 chhunga report thehlut tura tih a nih hnuah report hi thehlutin Medical thil te a nih avangin helam-a mithiam te chu endik turin a rawt a, hei hi Civil Hospital Aizawl-a naupang lam thiam leh hmeichhe lam thiam Doctor ten an enfiah leh a, Malsawmkimi pasal Zaithankima’n zangnadawmna a dil chu sawrkarin nikum May thla khan hnawl sak bawk a ni.

Hemi chungchanga thu kal zel The Frontier Despatch in a tarlan danin zangnadawmna an dil hnawl sak a nih hnuah Zaithankima hi Court ah kalin Gauhati High Court, Aizawl Bench chuan tun thla ni 9 khan thutlukna a siam a, Justice Nelson Sailo chuan sawrkar damdawi In-a a nupui leh an fapa thih chungchangah zangnadawmna cheng nuai 5 pe turin sawrkar chu a hriattir a. Cheng nuai 5 atang hian cheng nuai 3 chu a nupui sun tak Mal-sawmkimi nena an fapa kum riat mi tan Fixed Deposit-ah kum a tlin hma dah hran a ni ang. Court chuan damdawi In-a thawk Nurse-te leh Doctor chu an fimkhur tawk lo nia sawiin, hnimhlum Doctor a awm loh avang leh he damdawi In-ah tho hian a hma thla khat lekah nau piang a thih tawh avangin fimkhur lehzual tur an ni bawk, a ti bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni