Latest News

Serchhip-ah Society kalphung zirhona neih a ni

Mizoram State Cooprerative Union (MSCU) buatsaihin nimin khan Serchhip District-a Society hrang hrangte tan ‘Primary Cooperative Society nihphung leh Inrelbawlna’ tih thupui hmangin Training neih a ni.
Serchhip Kawnpui VC Hall-a he Training hi Mizoram State Cooprerative Union (MSCU) President K. Lalchamreia chuan kai-hruaiin Serchhip-a District Cooperative Officer (DCO) Lalzidingi MCCS chuan training hi a hawng a, he huna kalkhawm Society hrang hranga hruai-tute chu he Training hi an Society theuh hnathawh leh hmalakna kawngah hmasawnna kawnga ke pentirtu ah hmang tur leh Coopertive Society chu a nih ang taka hlu leh hlawk zawka kalpui thar leh turin a chah bawk a ni.

Serchhip DCO chuan Serchhip District ah Society hrang hrang 112 a awm thu leh an zinga 90 vel chuan tha takin hma an lak thu te, Cooperative Society chu Central-ah Ministry hran neia awm an nih thu leh Union Minister Amit Shah kaih-hruaina hnuaiah chak taka hmalakna kalpui a nih dan te sawiin, Society din a nih a Sawrkar hnuaia an inziahluh hnuah dan hrang hrang bakah inkaih-hruaina zawm turte a sawi a, Society te chu Audit hmachhawn thin an nih avangin an hmalakna hrang hrang felfai taka ziahfel a pawimawh thu a sawi bawk.

He hunah hian Mizoram Co-Operative Apex Bank, Serchhip Branch-a Manager Nunthara chuan Society a lo ngelngheha, awmze nei leh hlu zawka kalpui chhoh anih theihna tura District chhunga Cooperative Society hrang hrangten MCAB kaltlanga Loan an lak theih dan te, MCAB sum leh pai chetvel dan kalphung tlangpui a sawi bawk.

Nimin-a Training-ah hian ‘Primary Cooperative Society nihphung leh Inrelbawlna’ tih leh ‘Cooperative Society Inkaihhruaina Dan hrang hrang chungchang’ tih thupui hmangin TC. Lalchawi-mawii (CDO, MSCU); Lalchhanhima (FEO, MSCU) leh Lalthlengliana (FEO, MSCU) ten kalkhawmte zirtirna an pe a ni.

Comments

Popular News (Last 30 Days)