Tuikum bialtu MLA in a bial chhunga hmalakna a tlawh

Social Welfare Minister leh Tuikum bialtu MLA Er. Lalrinawma chuan nimin khan a bial chhunga hmasawnna hnathawh thenkhat te a hmunah kal a enfiahin khawtlang hruaitute nen an hmalak zel dan turte an sawiho bawk.
Er. Lalrinawma hian Darlawng khuaa Middle School building sak mek te, Tlungvel khuaa High School leh Primary School building sak mek te, Chhingchhip Mualpui-a khelmual te, Thentlang Middle School sak mek te leh Sialhau khuaa Community Hall leh Middle School sakna hmun tur laih hna thawh mek te chu a hmunah a tlawh a. Heng hna te hi PMAAGY, SASCI leh MLA Fund hmanga thawh te an ni.

Minister leh Tuikum bialtu MLA hi khaw-tlang hruaitute leh School Zirtirtu ten lo dawng-sawngin khawchhung hmasawnna leh thilthar an neih te chu a lawmpui thu a sawi a, neitu rilru pu chunga tha taka enkawl turin khaw mipuite a chah bawk. Minister chuan vantlang hmunhma te leh zirna In te chu enkawl tha a, dimdawi tura chahin a enkawl zui zelnaah khawtlang mipuiten mawhphurna sang tak an nei tih hre turin a fuih a. Khawtlang mipuiten a hnena an duh leh mamawh hrang hrang an thlen te chu theihtawp chhuahpuia, hmalak pui zel a tum thu a sawi bawk a ni.