Latest News

Govt. Serchhip College kum 50 tlin lawmna Bialtu MLA hovin neih a ni

Kum 1973-a din Govt. Serchhip College chuan an kum 50 tlinna, Golden Jubilee chu nimin khan lawmin he hun hi bialtu MLA Lalduhoma chuan khuallian niin a hmanpui a, he hunah hian Govt. Serchhip College-a lo thawk tawh leh he College atanga zirchhuak mi thahnem tak an tel a ni.

Govt. Serchhip College Golden Jubilee lawmna hi nimin chawhma lam khan Serchhip Auditorium-ah neih niin he hun hmanpuitu Serchhip bialtu MLA Lalduhoma chuan Govt. Serchhip College Golden Jubillee hriatrengna lungphun (Monument) buatsaih chu hawngin, khatihlaia Mizoram Chief Minister, Ch. Chhunga’n Govt. Serchhip College a hawn laia a tel ve thu leh kum 50 vel a liam hnua Colden Jubilee lawmna ropui takah khuallian a ni thei chu lawmawm a tih thu a sawi a. Govt. Serchhip College in chak taka hma a sawnna chu ropui a tih thu leh hma sawn zel tur an nih thu sawiin, Zirlaite chu an zirna ah a tir phat atanga hun hmang tha a thiamna tak tak nei tura tan la turt leh tunlai khawvel ah mi nawlpui nunphung pangngai anga 'Mi Pangngai' anga nung ve mai turin zirlai kalkhawmte chu a fuih a. Tunlai khawvel, a thei thei dinchanna ramah theihtawp chhuah thin tura fuih bawkin, Zirna lamah mi zawng zawng tan hlawhtling vek a harsat thu leh hlawhchhamna chu inbawh behtir mai lo turin zirlaite chu a fuih a, College zirlaite chu an thil tihna kawg hrang hrangah rinawm, dik leh taima taka a tha thei ang bera ti thin turin a fuih bawk. 


Govt. Serchhip Golden Jubilee lawmna hun ah hian Jubilee lawmna Darkhuang vuak a nih hnuah a lawmna inkhawm neih zui niin he College Principal C. Laldintluanga chuan inlawmna thu a sawi a. Golden Jubilee Organising Committee Secretary C. Lalramliana, Assistant Professor chuan he Jubilee lawm tura an inbuatsaih dan sawiin, Govt. Serchhip College chu August 25, 1973 khan khawtlang tangrual in harsa taka an lo din thu leh kum 2013 khan an kum 40 tlinna lawmin hemi atang hian Golden Jubilee lawm tura ngaihtuahna sen tan a nih thu a sawi a. November 12, 2021-ah Organising Committee dinin he College-a thawk ten thla 20 chhung chu an hlawh atangin Jubilee lawmna tur hi an thawhkhawm thu leh Serchhip bialtu MLA Lalduhoma leh Tuikum bialtu MLA Er. Lalrinawma ten he Jubilee lawmna atana sum leh pai an ngaihtuahpui thu te a sawi bawk.

He hunah hian Assistant Professor K. Lalrinchhana chuan Govt. Serchhip College chanchin sawiin, he College din tur hian November 2, 1972-ah Managing Board dinin August 25, 1973-ah College hi din a nih thu a sawi a. Union Christian College, Borapani, Shillong-a Lecturer nilai HD. Rosanga chu Principal tura sawmchhuah niin ani hi Principal hmasa ber a nih thu leh Lecturer pali (4) awmin Department 5- English, Mizo, History, Political Science leh Economics te hawn nghal a nih thu a sawi a. A tirah Serchhip Town Hall-ah Class neih thin niin kum 1976 July thla ah tuna Coillege awmna, New Serchhip hmunah hian insawnin khatihlaia Chief Minister Ch. Chhunga chuan building thar a hawn thu a sawi bawk.

He College atang hian kum 1978-ah BA zirna hawn niin November 1, 1984-ah Deficit Status-ah hlankai niin, kum 1989-ah sawrkara hlankai (Provincialized) a ni leh a, heta tang hian Government Serchhip College tih a lo ni ta tih a sawi a. Kum 1995-ah Science zirna hawngin kum 1999-a tihtawp a nih hnuah kum 2004-ah hawn leh a nih thu te, kum 2005 atangin BCA zirna hawn a nih thu leh NAAC Grade A an nih mek thu te, University Exam-ah Ran Holder mi 25 an neih tawh thu te leh tun dinhmunah Govt. Serchhip College-ah hian thawktu Teaching Staff 50 leh Non-Teaching Staff 15 awmin Zirlai 476 an awm mek thu te a sawi bawk.

Serchhip Auditorium-a hun hman zawh hnu hian GSC Alumni te nen Govt. Serchhip College-ah hun hman zui leh niin zan lamah Colege Campus-ah intihhlimna neih a ni bawk.

Comments

Popular News (Last 30 Days)