Latest News

Rampumah eirawngbawlna Gas man tlahniamin Serchhip-a Gas harsatna ziaawm thuai beisei

Sawrkar laipui chuan ramchhunga eirawngbawlna Gas man bur khat zelah Rs. 200/- in a tihniam a, MIZOFED Serchhip Branch chuan tunhnaia Serchhip-a eirawngbawlna Gas harsatna thleng chu a ziaawm thui an beisei tih an sawi.
Union Information and Broadcasting Minister Anurag Singh Thakura chuan eirawngbawlna Gas man tihhniam a nih thu hi niminpiah khan puangin rate thar pawh hman nghal tur a nih thu a puang a. Ujjwala hamthatna dawngtute tan LPG cylinder pakhat zelah Subsidy Rs. 400 a ni tawh dawn a ni. Serchhip-ah chuan Gas semna point atanga Gas la te chuan bur khat zelah Rs. 1062.53 (IOC rate +7.53) leh Home Delivery a la te tan Rs. 1125 (IOC rate+Home delivery rate Rs 70) a ni ang.

Serchhip-a MIZOFED (LPG)-a thawktute chuan tunhnaia eirawngbawlna Gas harsatna thleng chu a ziaawm chhoh zel an beisei tih sawiin, tun dinhmunah an hnuaiah hian Consumer 13,200 vel an awm thu leh heng mite tan hian thla tin eirawngbawlna Gas Trip 13 vel mamawh a nih thu an sawi a. Tunhnaiah Mizoram chhunga kawngpui chhia avangin eirawngbawlna Gas thleng a khaihlak thu sawiin, July thla khan Trip 13 rawn thlengin hei hi Domestic cylinder 4180 bakah Commercial Cylinder 72, XTRATEJ Cylinder 24 leh kg. 10 chi cylinder 32 a ni tih an sawi a. Heng te hi June thlaa rawn thleng tura beisei te kha an ni tlangpui tih an sawi. August thla ah nimin thleng khan Trip 13 rawn thleng leh tawhin heng te hi Domestic Cylinder 3520, Commercial Cylinder 36,  XTRATEJ Cylinder 12 leh kg. 10 chi bur 24 a ni tih an sawi a. Tunah hian kawng laka rawn thang mek Trip hnih a awm thu leh pakhat hi Motor chhia avanga khaihlak, tun thla ni 21-a load la tawh kha a nih thu an sawi bawk a. Hriat lawk loh harsatna thleng thut a awm te a nih loh chuan Gas harsatna hi ziaawm chho tura an beisei thu an sawi a ni.

Sawrkar thuchhuak anga District khawpui-a LPG Home Delivery kalpui mek chu Serchhip-ah Veng pasarih (7) ah kalpui a nih tawh thu leh Veng dang pakhat ah pawh kalpui leh tura ruahmanna siam mek a nih thu MIZOFED-a thawktute chuan an sawi a, LPG Home Delivery kalpuina Veng-ah hian mipui ten harsatna tawk lo mah se heng Veng hrang hranga Agent te hnen atanga Gas man an dawn har thin avanga harsatna an tawh thu hi an sawi a. Serchhip P&E Veng-a Gas Home Delivery kalpui a nih hnuah Chanmari Veng, Vengchung, Hmar Veng, New Serchhip Venglai leh New Serchhip Bazar Veng-ah te kalpui lehin kar hmasa khan Serchhip Field Veng-ah kalpui tan leh a nih thu leh nizan hmasa khan Gas Booking atana hriat tur pawimawh inzirtirna pawh an neih thu an sawi a. Tunah hian Serchhip Kawnpui South-ah Home Delivery hi kalpui leh tura ruahmanna an siam mek thu an sawi a ni.

Comments

Popular News (Last 30 Days)