SEDP Phase -3-ah chhungkaw 60,000 thlan leh tum

Family Oriented SEDP kalpui mek chu a thawh thumna ah chhungkaw 60,000 huam leh tura kalpui tum a ni.

Nimin khan Deputy Chief Minister leh SEDP Executive Board Chairman Tawnluia hovin Planning & Program Implementation Department Committee Room-ah SEDP Executive Board thutkhawm neih a ni a, he Meeting hian kumin September thla chhunga Family Oriented SEDP Phase-2 hnuaia tanpuina dawng tur ten an dawn kim theih dan tur ngaihthuahin Phase-2 hnuaiah hian beneficiary 60,000 huam tura ruahmanna siam a lo ni tawh a, a thawhkhatna kaltlang hian beneficiary-ten tanpuina sum Rs. 25,000/- theuh an dawng dawn a ni. SEDP Executive Board Meeting chuan tuna FO-SEDP Phase-1 leh Phase-2 kalpui mek zawh hnuah hian chhungkaw thar 60,000 huam leh turin Phase-3 kalpui leh an rel a ni. Eizawnna ngelnghet leh hmasawnna siam tura chhungkaw tinzawna duan, Sawkar flagship program, Family Oriented Socio-Economic Development Policy (FO SEDP) kaltlang hian chhungkaw eizawnna bultanna siam sak leh tanpuina pek hmangin Mizoram chhunga mimal leh chhungkua, a tam thei ang ber dimhmun tha zawka hlankai tum a ni tih sawrkar thuchhuah chuan a tarlang a ni.