Latest News

Health Minister Dr. R. Lalthangliana’n NEIGRIHMS leh Apollo Hospital te a tlawh

Health & Family Welfare Minister Dr. R. Lalthangliana chuan Inrinni khan Shillong-a North East Indira Gandhi Regional Institute of Health & Medical Science (NEIGRIHMS) tlawhin NEIGRIHMS hotute chu ZMC-a Cardiology Department bultan tur chungchang a sawipui.

Health Minister hian NEIGRIHMS Director Prof. (Dr.) Nalin Mehta; Medical Superintendent Prof. (Dr.) C. Daniala leh thawktu dangte kawmin ZMC-a Cardiology Department bultan turin cheng nuai 100 hmuh a nih thu leh bultan theih dan turte a sawipui a. ZMC a din tur Cardiology Department tana Doctor, Nurse leh Technician te tan a thlawna training tih sak tura a ngenna chu NEIGRIHMS Director chuan a theih ang angin hma a lo lak sak tur thu a hrilh a. ZMC-a Department hrang hrang te tihchangtlun leh tihphuisui nan NEIGRIHMS thiamna a bikin training tawi ang chi lam an mamawh thu sawiin, hemi kawnga thawhdun theih dan kawng dap sak turin Minister in NEIGRIHMS thuneitu a ngen a, anni pawhin a theih ang anga thawhho dan kawng an dap tur thu an sawi bawk.

Heng bakah hian Dr. R. Lalthangliana chuan Mizoram in a neih loh Critical Care Specialities – Neurology, Nephrology damlote NEIGRIHMS a inentir tura kal te chu inenkalwna tha an dawn thin avangin leh Doctor ten an lo ngaihsak avangin lawmthu a hrilh a, chutih rualin Mizoram atanga NEIGRIHMS pan damlo tam zawk chu mi harsa tak tak an nih thin avangin ngaihsak lehzual turin NEIGRIHMS thuneitu a ngen bawk a ni.

Hemi hmalam Zirtawpni khan Health Minister hian Guwahati-a Apollo Hospital tlawhin Hospital thuneitute nen an inkawm a. Minister hian Apollo Hospital chu Mizo mipuiin an pan tam pawl tak a nih avangin Mizo damlote hriatthiamna nena lo dawngsawng a, sum lama harsatna nei bill pe thei lote pawh lo hrethiam thin turin a chah bawk a. Heng hmun a tlawhna ah hian Health Minister hi Mizoram House Shillong DRC Lalchhanhima leh Mizoram House Guwahati DRC Dr. Malsawmtlunga Fanchun ten an tawiawm a ni.

Hmarchhak YMCA Chairman a nihna angin Dr. R. Lalthangliana hian Hmarchhak YMCA Regional Committee Meeting pawh Inrinni khan neihpuiin YMCA chu Hmarchhak ah pawl pawimawh tak anih dante a sawi a, Hmarchhak Kristian te inpumkhatna atan a thawhhlawk hle a ni, a ti bawk a. Kum hmasa lama YMCA North East Region tan Guwahati-a Multi Purpose Centre sakna tur ram pe tura a ngenna chungchang pawh Assam Chief Minister Himata Biswa Sharma hnenah thlenin Assam Chief Minister hian hemi atan ram pek hi a lo tiam a ni.

Comments

Popular News (Last 30 Days)