Bunghmun RD Block kum 50-na lungphun hawng

Bunghmun RD Block kum 50 tlinna, Golden Jubilee lungphun chu niminpiah khan Rural Development Minister Prof. Lalnilawma chuan a hawng.

Bunghmun BDO Office Complex-a Bunghmun RD Block Golden Jubilee lungphun hawnna hunah hian RD Minister chuan Bunghmun RD Block-in kum 50 a tling ta chu lawmawm a tih thu sawiin, Block Office bul tannaa sulsutute leh tun thlenga BDO leh Staff-te inpekna fakawm a tih thu a sawi a. Bunghmun Block hmasawn nan BDO Office leh thawktute an pawimawh tih sawiin, thawktute chu anmahni dawrtu mipuite tha taka dawngsawng thin tur te, an puih theihna apiangah pui a, an puih theih lohna ah pawh tha taka thil hrilhfiah thin tur te'n a chah a ni.

Bunghmun khua hi Community Development Block hmun atan kum 1973 atangin sawrkarin ruahmanna a nei tan a. January ni 7, 1974 khan Lunglei BDO Zodinpuii'n Community Development Block hawngin a din tirh atangin tun thlengin Bunghmun RD Block hian BDO 29 nei tawhin, BDO hmasa ber chu Vanengmawia a ni a, tunah hian Dr. Lalramdintluanga awm mekin Establishment Staff 6, MGNREGS Staff 19 leh MzSRLM Staff 10 awmin, thawktu 35 an awm mek a ni.

Bunghmun khua hi Lunglei hmarthlang lamah awmin, Lunglei atanga km 145 vela hlaa awm a ni a. Mihring mipa 630 leh hmeichhia 620, an vaiin 1,250 vel khawsa mekin, In ding lai 230 vel a awm a. Bunghmun RD Block huamchhungah hian khaw 20 leh Sub-Village 2, a vaiin khaw 22 a awm mek a ni.