MCAB Chairman in Thingsai-ah PACS a hawng

Thingsai Agri-Farming Cooperative Society enkawlna hnuaia PACS chu nimin khan hawn a ni.

Mizoram Cooperative Apex Bank (MCAB) Chairman Lalnunsanga chuan Thingsai Agri-Farming Cooperative Society enkawlna hnuaia PACS hi hawngin, tun dinhmunah Mizoram pumah PACS 100 a awm tawh thu leh thenkhat chu Bank dang pawh ngai lo khawpa khawtlang tana innghah ngamna tak tak an nih thu a sawi a. Chutih rual chuan a hminga ding ve mai mai an awm thu pawh sawiin, PACS hlawhtlinna chu Society hotute taihmak leh rinawmna ah thui tak a inghah thu leh thawhhona tha tak nen chuan PACS hi khawtlang leh ram economy chawisangtu pawi-mawh leh bulthut tak tak anih thu a sawi a ni.

Primary Agriculture Credit Society (PACS) hi India rama Cooperative Banking bulthut pawimawh tak niin hmun kilkhawr zawk, Bank-in luhpawh a harsatna hmunah pawh Society member ten pawisa dah leh puk an tih ve theihna tura duan a ni a. PACS hian pawisa dahthat leh puktir bakah Society te hmasawnna turin sumdawnna hrang hrang an khawih chu RBI chuan a phalsak a. PACS te hian anmahni member te hnena puktir tur pawisa an neih loh pawhin Interest Rate hniam zawkin State Cooperative Apex Bank-ah te loan an dil ve leh thei thin a ni.